🌸 البر 🌸 0⃣1⃣ 🌸من البر في الاية دي إنك تحافظ على صلاتك يعنى تصليها في أوقاتها يعنى لما الاذان يأذن تسيبي كل اللي في ايديك مهما كان لإن عندك موعد ولقاء مع رب العالمين فأي شيء غيره يهون 🌸من البر إنك تؤدي الزكاه وده دليل على إن الوجوه اللي اتكلمنا عليها في الانفاق من شوية داخلة تحت بند الصدقة وطبعا الزكاه انواع في زكاة الفطر زكاة المال زكاة الذهب زكاة الزروع وغيرها فواجب على كل من عنده فلوس كتير أو اراضي زراعية أو ذهب أو غيره يبدأ يقرأ في فقه الزكاة عشان يفهم ماله وما عليه. في تفسير آخر للزكاه هنا لأهل العلم: وقوله : ( وآتى الزكاة ) يحتمل أن يكون المراد به زكاة النفس ، وتخليصها من الأخلاق الدنية الرذيلة ، كقوله : ( قد أفلح من زكاها وقد خاب من دساها ) [ الشمس : 9 ، 10 ] وقول موسى لفرعون : ( هل لك إلى أن تزكى وأهديك إلى ربك فتخشى ) [ النازعات : 18 ، يعنى وفقا للتفسير ده إن الزكاة هنا إنك تزكي نفسك من الأخلاق السيئة تسعى إنك تتحلى بالأخلاق الطيبة و ساعتها تبقا ماشي في طريق البر. 🌸نوع من أنواع البر مذكور في الاية وهو الوفاء بالعهد والموفون بعهدهم إذا عاهدوا" أنا مش هستفيض كتير في النقطة دي لإن كلنا عارفينها ولكن هتكلم في نقطة واحدة بس تهمنا كنساء وكأمهات يا ترى بتوفي بعهودك لابنك لما بتتفقي معاه على اتفاق بتنفذيه ولا بتكبري دماغك لإنه طفل ومش فاهم حاجة أو هينسى أو هيزعل شوية وخلاص. أنت لما بتتفقي معاه على اتفاق أنت كده كإن عهدك ده مع الله عز و جل فتخيلي بقا لما تخلفي العهد ده هيكون الوضع ايه . عاوزين نتعامل مع أمر العهود مع ولادنا بشيء من الجدية يا جماعة متعاهديش ابنك على حاجة أنت مش ناوية تعمليها او مش قادرة تعمليها بلاش تفقدي نفسك رصيد من رصيدك في البر . عاوزين نكون من الأبرار اللي ربنا سبحانه وتعالى قال عنهم: إن الأبرار لفي نعيم عاوزين نوصل للنعيم ده بإذن الله. 🌸الناس اللي معانا المتخصصين في النحو ليه ربنا قال والصابرين رغم إن قبلها والموفون يعنى المفروض تكون مرفوعة مش منصوبة ؟ طب خلاص متزعلوش مش هتكلم في النحو 😂😂😂😂 هتكلم في لمسة بيانية ليها علاقة بالبر 😍😍😍 بعيدا عن النحو ده أسلوب للتنبيه ربنا سبحانه وتعالى بيشد انتباه قلبك و عقلك وكإنها رسالة ركزي كويس أوي الكلام اللي جاي ده مهم جدا طب ما كلام ربنا كله مههم!!! أيوه طبعا بس أحنا بنقول مهم جدا ليه ؟ عشان كل اللي فات ده واللي اتكلمنا عنه من انفاق في الصدقة واتمام الصلاة والزكاة سواء بالتفسير الأول اللي قلناه أو التفسير التاني كل ده محتاج للوسيلة اللي توصلنا إليه وبالتالي توصلنا للبر أيه الوسيلة دي ؟ الصبر عشان كده ربنا بيقولك لازم تتعلمي الصبر عشان توصلي للبر. وطبعا كل إنسان فينا ليه نصيب من الابتلاء اللي هيعلمه الصبر ويوصله للمقام ده لو تلقى الابتلاءات بفهم ورضا. عشان كده هرجع للنحو تاني بعد اذنكم واقولكم إن الصابرين هنا جات منصوبة على المدح 🌸ولو اتكلمنا عن الصبر الاية بتقول إن عشان توصلي لمقام البر لازم تكوني من الصابرين اللي بيصبروا في 3 مواضع الباساء الضراء حين البأس البأساء مقصود بيها الفقر. الضراء مقصود بيها المرض حين البأس أي وقت الحرب و ملاقاة العدو. 🌸تختم الاية الكلام اولئك الذين صدقوا لو بنقول إننا مؤمينن لازم الكلام يطابق الفعل بنقول إننا بنمشي في طريق البر يبقا لازم ده يظهر في أفعالي لو أفعالك طابقت الاية دي فأنت صادقة في إيمانك بإذن الله صادقة في برك اللهم ارزقنا البر اللهم أجعلنا من الأبرار يا رب العالمين. 🌸أختم أنا كلامي بنقطة إذا كان ده البر المطلوب مننا فما بالنا ببر الله عز وجل بنا؟! إذا كان ده البر مننا كبشر فما بالنا ببر رب البشر هو البر وبر الله بنا لا يضاهيه بر اللهم إنا نسألك أن ترزقنا خلق البر وأن ترزقنا كرم برك يا بر. ✍بقلم رضا الجنيدى #البر #أسماء_الله_الحسنى جروب حياة القلوب👇 https://t.center/joinchat/FBi6QENHPTFvEnwTEDkBFg صفحة المدربة والمستشارة الأسرية رضا الجنيدي على التلجرام👇 @Redaalgeneedy صفحتنا على الفيس بوك👇 https://m.facebook.com/Reda.Geneedy