🌸 البر 🌸 5⃣ 🌸لو حبينا ناخد جولة في بستان كتاب الله عز وجل مع كلمة البر بمشتقاتها ونشوف جمالها عشان ناخد جزء من شذاها بإذن الله هنلاقي عدد من الآيات الرائعة بس فعلا بعضها ممكن يكون يسير على النفس وبعضها محتاج مننا جهد وجهاد ❤️يعنى على حسب كل واحد فينا وطباعه وإيمانه وأيه الأيسر لنفسه في تنفيذه 🌸وفي كل الحالات محتاجين نتعامل مع الايات دي باهتمام شديد عشان نكون مع (الأبرار ) بإذن الله يوم القيامة ❤️يقول الله عز وجل: "لَنْ تَنَالُوا الْبِرَّ حَتَّى تُنْفِقُوا مِمَّا تُحِبُّونَ" الآية دي لها عدة تفسيرات 🍃منها أنكم لن تصلوا إلى الجنة حتى تنفقوا من أحب الأموال إليكم 🍃ومنها لن تصلوا إلى مرحلة التقوى حتى تنفقوا من أحب الأموال إليكم. 🍃ومنها لن تصلوا إلى الثواب الذي يوصلكم إلى الجنة حتى تنفقوا مما تحبون 🌸طيب تعالوا نشوف الصحابة عملوا ايه لما الاية دي نزلت عملوا ايه 😍😍 لما نزلت الاية دي أبو طلحة رضي الله عنه كان له بستان جميل قال للرسول صلى الله عليه وسلم يا رسول الله إنه أحب أموالي وإني جعلته لله. ❤️النبي صلى الله عليه وسلم قاله بخ بخ هذا مال رابح. 🌸عمر بن الخطاب رضي الله عنه اشترى مرة جارية عجبته جدا فراح اعتقها علطول لما تذكر هذه الاية 🌸طيب هل الاية دي متعلقة بالمال فقط؟ ❌لا 🌸العلماء قالوا مما تحبون أي مما تشتهيه أنفسكم 🍃وممكن أنا أكون بحب حاجة جدا بالنسبة لحد غيري عادية فأنا بنفقها لإني بحبها وحد غيري بينفق حاجة تانية لإن هي أحب أمواله ليه. 🌸عمر بن عبد العزيز كان يتصدق بالسكر ويكثر من صدقة السكر ولما سئل ليه بتتصدق بالسكر قال لأني أحبه والله عز و جل قال لن تنالوا البر حتى تنفقوا مما تحبون. 🌸ليا صديقة أعرفها من أصدقائي المقربين حبيت تتصدق مرة ومكانش معاها فلوس تتصدق بيها فتصدقت بايه جابت اجمل خاتم كانت بتحبه وقالت لي إنها عاوزة تبيعه وباعته بالفعل وطلعت فلوسه صدقة أيام مجاعة الصومال تقريبا على ما أتذكر. هي دايما كانت بتلبس الخاتم ده وبتحبه أوي أوي وأنا ساعتها قلت لها ممكن تبيعي حاجة تانية قالت لي ده أحلى حاجة بحبها في دهبي وربنا بيقول "لن تنالوا البر حتى تنفقوا مما تحبون" 🌸طيب ازاي نطبق الاية دي في حياتنا؟ شوفي أكتر حاجة بتحبيها وانفقي منها لما تعملي أكلة بتحبيها اوي اوي طلعي طبق منها لحد محتاج وافتكري ❤️"لن تنالوا البر حتى تنفقوا مما تحبون"❤️ 🌸جربي مرة تتصدقي بطقم من لبسك تكوني بتحبيه تقربا إلى الله عز وجل ورغبة في نيل البر وافتكري ❤️"لن تنالوا البر حتى تنفقوا مما تحبون"❤️ 🌸ولد من ولادي في فصل من الفصول اللي بعلم فيها الصغيرين مرة جاب تي شيرت في الجمعية كان لسه شاريه جديد وكان لابسه حاجة بسيطة وقال هيطلعه صدقه فقلته له مش ده التي شرت الجديد بتاعك وحبيت أشوف تفكيره وأشوف هو مطلعه بنية أيه. 🌸قالي أصله جديد وأنا بحبه وهطلعه عشان ربنا بيقول: ❤️"لن تنالوا البر حتى تنفقوا مما تحبون"❤️ كنت سعيدة بيه جدا وبمامته اللي وصلته للإحساس ده وللمعنى ده ربنا يبارك فيها يارب وفيه 🌸في انفاق تاني حلو اوي ممكن مش بناخد بالنا منه كل واحد فينا مميز اكيد في حاجة مبدع في حاجة حتى و لو بسيطة جربي تنفقي منها بالنية دي بمعنى لو أنت متميزة في علم معين وتحبي انك تكوني لك شأنك فيه وتكوني متفردة في المجال ده جربي متكتميش العلم وتقصريه على اللي معاهم فلوس وجايين يتعلموا منك أو تقصريه على الأصحاب والقرايب بس جربي تنفقي من المهارة دي اللي انت بتحبيها في نفسك وافتكري ❤️"لن تنالوا البر حتى تنفقوا مما تحبيون"❤️ 🌸دي أول أية من ايات البر وهسيب لكم المجال تقترحوا أشكال للأنفاق مما نحب وإن شاء الله نكمل شرح اسم الله البر جزاكم الله خيرا وتقبل منا ومنكم.😍😍😍 ✍بقلم رضا الجنيدى #البر #أسماء_الله_الحسنى جروب حياة القلوب👇 https://t.center/joinchat/FBi6QENHPTFvEnwTEDkBFg صفحة المدربة والمستشارة الأسرية رضا الجنيدي على التلجرام👇 @Redaalgeneedy صفحتنا على الفيس بوك👇 https://m.facebook.com/Reda.Geneedy