🌸الودود🌸 1⃣1⃣ يا رب نكون اقتربنا اكتر من معنى اسم الله الودود وبدأنا نستشعر أول معنى وأن الله الودود هو الذي يتودد إلى عباده بنعمه 🌸طيب يا ترى ايه المعنى التاني🤔 🌸المعنى التاني رائع وكلنا محتاجين ليه في حياتنا اليومية مين فينا يقدر يعيش من غير مشاعر طيبة تجمع بينه وبين اللي حواليه مين فينا لو افتقد الحب في الحياة الزوجية بيكون مستريح؟ 🌸مين فينا لو افتقد حب الاخوات بيكون سعيد؟ كلنا محتاجين نشعر بالحب 🌸والمعنى التاني لاسم الله الودود ( هو الذي يخلق الود بين قلوب عباده) تعالوا نشوف روعة الود المخلوق في قلوبنا وقلوب اللي حوالينا😍😍😍 🌸تعالوا نرجع بالذاكرة للخلف لأيام النبي صلى الله عليه وسلم فاكرين لما بنقرأ السيرة اد ايه كانت العلاقة ما بين الأوس والخزرج كلها مشاحنات وحروب وشجار 🌸فاكرين أد ايه كنت ممكن تقوم نزاعات كبيرة بينهم على سبب تافه جدا 🌸حد كان يتصور إنهم في يوم من الايام يبقوا ايد واحدة انهم يبقوا قلب واحد انهم يبقوا كيان واحد ان كل واحد فيهم يحب لاخيه ما يحب لنفسه بل واكثر كمان؟ 🌸ده حصل بفضل الله الودود الف بين قلوبهم سبحانه وتعالى يقول: "وَأَلَّفَ بَيْنَ قُلُوبِهِمْ ۚ لَوْ أَنفَقْتَ مَا فِي الْأَرْضِ جَمِيعًا مَّا أَلَّفْتَ بَيْنَ قُلُوبِهِمْ وَلَٰكِنَّ اللَّهَ أَلَّفَ بَيْنَهُمْ ۚ إِنَّهُ عَزِيزٌ حَكِيمٌ " 🌸تخيلوا انفاق ما في الارض جميعا من اموال وذهب ومجوهرات وغيره لن يزرع في قلب واحد منهم اي ذرة مودة للتاني إلا عندما اراد الله عز وجل فقال للشيء كن فكان الحب وكانت المودة بينهم وسجل التاريخ اعظم قصص حب إنساني في تاريخ البشرية 🌸فالحمد لله خالق المودة والود في قلوب عباده اللهم الف بين قلوبنا وقلوب من حولنا اللهم كل من صُد قلبه عنا أو صُد قلبنا عنه لا تجعل بيننا وبينه غلا يارب فالف بين قلوبنا وقلوبهم كما الفت بين قلوب الاوس والخزرج انك قادر على ذلك يا ودود. اللهم الف بين قلوب المسلمين واخلق بين قلوبهم الحب و الود والرحمة 🌸الود يا جماعة رزق من ربنا سبحانه وتعالى لما تشعري كده انك بتحبي حد اوي والشخص ده بيحبك اوي طبعا "حب حلال " حب بين زوج وزوجة صديقة وصديقتها صديق وصديقه اتنين اخوات وهكذا 🌸الحب ده بيكون رزق من الودود وده بيظهر لنا من كلام النبي صلى الله عليه وسلم لما كان بيتكلم عن السيدةخديجة لما غارت السيدة عائشة ويقول لها: (إِنِّي قَدْ رُزِقْتُ حُبَّهَا) 🌸محتاجين نحس مع احبتنا الاحساس ده ان الحب ده رزق من ربنا سبحانه وتعالى رزق يستحق الشكر طب لو مش عندنا الحد اللي نحبه الحب ده اللي نحس انه رزق وقتها نسأل الله عز وجل أن يرزق قلوبنا حبا حلالا يشبعها ويجعل قلوبنا تحيا في جنة المشاعر في هذه الدنيا. 🌸رجل وامرأة يمكن مشافوش بعض غير قبل الزواج بفترة قصيرة مجرد ما يتزوجوا تلاقي بينهم حب ومودة وتعلق جميل مين اللي زرع المودة دي بينهم في الوقت القليل ده وفي الفترة البسيطة دي طبعا الله الودود سبحانه وتعالى بس نخلي بالنا ربنا سبحانه وتعالى وصف العلاقة بين الزوجين بالمودة موصفاهاش بالحب 🌸تفتكروا ليه؟ احنا قلنا الحب مشاعر وتعبير عن المشاعر بالكلام المودة اعمق من كده تعبير عن المشاعر بالأفعال 🌸وكإن الله عز وجل يرسل لنا رسالة قوية بإنك أيها الزوج حبك الحقيقي لزوجتك يظهر في افعالك معها وانت ايتها الزوجة حبك الحقيقي لزوجك يظهر في افعالك وليس اقوالك 🌸ودي رسالة لينا كنساء الرجال مبيعبروش ع الحب عادة بالكلام متزعليش 🌸ربنا بيعلمنا ان المودة هي الأهم هي الأفضل هي اللي عليها هيكون استقرار البيت لكن ممكن تشبعي من الكلام الحلو لكن افعال للأسف مفيش. ✍بقلم رضا الجنيدى #الودود #أسماء_الله_الحسنى جروب حياة القلوب👇 https://t.center/joinchat/FBi6QENHPTFvEnwTEDkBFg صفحة المدربة والمستشارة الأسرية رضا الجنيدي على التلجرام👇 @Redaalgeneedy صفحتنا على الفيس بوك👇 https://m.facebook.com/Reda.Geneedy