🌸الودود🌸 9⃣ طيب ده الود العام امال ايه الود الخاص بقا 🤔؟ 🌸الود الخاص ده ود الله عز وجل للمؤمنين "يقول الله عز وجل إن الذين آمنوا وعملوا الصالحات سيجعل لهم الرحمن ودا" 🌸ودي شرحناها فوق في أول الاسم إيمانك بالله عز وجل سبب في إن ربنا سبحانه وتعالى يجعل لك ودا وزي ما قلنا يحبك الله فيأمر جبريل إنه يحبك وكذلك أهل السماء ثم يوضع لك القبول في الأرض قال قتادة: ( سيجعل لهم الرحمن ودا ) قال : ما أقبل عبد إلى الله إلا أقبل الله بقلوب العباد إليه وزاده من عنده . 🌸يعنى كل ما تقربي من ربنا ويكون رضا ربنا هو غايتك الأولى ربنا يجعل عباده يحبوكِ ويقربك ليهم ولكن أي عباد؟ المؤمنين الصالحين 🌸طيب ازاي أعيش بالأثر الايماني للمعنى الخاص للود؟ ببساطة كده أبحث عن كل حاجة تقربني من ربنا سبحانه وتعالى وأبدأ ادرب نفسي إني أعملها زي ما قلنا إن الله يحب التوابين ويحب المتطهرين أحافظ على التوبة وعلى التطهر 🌸تاني حاجة "إِنَّ اللَّهَ يُحِبُّ الْمُقْسِطِينَ" والله يا جماعة محتاجين نعيش بالآية دي عشان نرتاح ونريح اللي حوالينا وعشان نوصل لحب الله عز وجل لينا يعنى ايه مقسطين يعنى عادلين يعنى أهل العدل والإنصاف يعنى تعدلي وحتى لو كان على حساب نفسك 🌸تعالوا نشوف أمثلة للعدل الأم اللي بتبقا خايفة على بنتها وواقفة لزوج بنتها بالمرصاد في كل كبيرة وصغيرة وبنتي لازم تعمل لها وتجبلها وتعاملها كويس وتيجي لزوجة ابنها تبقا متضايقة لما يدلعها ولا يخرجها ولا يشتريلها ده نوع من الجور والظلم وعدم العدل وعدم الإنصاف 🌸الواحدة مننا اللي تبقا حابة زوجها يجيب لها كل حاجة ولما تلاقي اخوها جايب لزوجته ولا بيعامل زوجته كويس تبقا بتموت من الغيرة ده نوع من عدم الإنصاف 🌸الزوجة اللي زوجها بيعمل لها كل حاجة حلوة أو أغلب الحاجات حلوة ولما تزعل منه تقوله أنا عمري ما شفت منك حاجة حلوة ده نوع من عدم الإنصاف 🌸الأم اللي تيجي على حساب ابن عشان خاطر الابن التاني أصغر ولا أكبر ولا بنت ولا ولد ولا أجمل ولا مريض ولا كذا 🌸ده نوع من الجور وعدم العدل وعدم الإنصاف 🌸ربنا يحبك لما تكوني من المقسطين لما تكون في مشكلة بين اتنين وتحكمي بنيهم بالعدل ما تغلبيش مصلحة اختك ولا صحبتك ولا بنتك و هي غلط أو الحق مش معاها. 🌸ربنا يحبك لما تقسطي و تعدلي مع اللي بتكرهيه وده أنا بشوفه أجمل أنواع الإنصاف لإنه ميقدرش عليه غير أصحاب النفوس القوية المؤمنة إني أعدل مع اللي بحبهم ده عادي لكن أعدل مع اللي بكرههم ده قمة حسن الخلق يقول الله عز وجل: (يَا أَيُّهَا الَّذِينَ آمَنُوا كُونُوا قَوَّامِينَ لِلَّهِ شُهَدَاءَ بِالْقِسْطِ وَلَا يَجْرِمَنَّكُمْ شَنَآنُ قَوْمٍ عَلَى أَلَّا تَعْدِلُوا اعْدِلُوا هُوَ أَقْرَبُ لِلتَّقْوَى وَاتَّقُوا اللَّهَ إِنَّ اللَّهَ خَبِيرٌ بِمَا تَعْمَلُونَ) [المائدة: 8] 🌸يعنى متخليش كراهيتك لحد تخليك متعدليش اعدلي مع عدوك ومع اللي بتكرهيه ده هيجعلك قريبة اوي من التقوى وافتكري برضه إن ربنا بيحب المتقين 🌸طيب القسط والعدل ده هيوصلك لايه 🍃أولا لحب الله عز وجل 🍃ثانيا يوم القيامة تبقى على منابر من نور على يمين الرحمن عز وجل تعالي شوفي الحديث ده قال رسول الله صلى الله عليه وسلم: (إِنَّ الْمُقْسِطِينَ عِنْدَ الله عَلَى مَنَابِرَ مِنْ نُورٍ، عَنْ يَمِينِ الرَّحْمَنِ عَزَّ وَجَلَّ، وَكِلْتَا يَدَيْهِ يَمِينٌ، الَّذِينَ يَعْدِلُونَ فِي حُكْمِهِمْ وَأَهْلِيهِمْ وَمَا وَلُوا) صحيح مسلم 🌸يعنى عدلك في مواقف الحياة المختلفة عدلك بين ولادك لإن دول تحت ولايتك عدلك ما بين تلاميذك لو انت معلمة عدلك في الحكم بين المتخاصمين عدلك مع الأعداء عدلك وقت الخصام و وقت الفراق 🌸كل ده بيديك المكانة دي إنك تكوني على منابر من نور عن يمين الرحمن عز وجل تخيلي الجمال والروعة تخيلي العظمة دي والله يا جماعة العدل ده بيريح النفس اوي وبيخليها صافية ومفيهاش احقاد ولا ضغائن ربنا يرزقنا العدل يا رب. ✍بقلم رضا الجنيدى #الودود #أسماء_الله_الحسنى جروب حياة القلوب👇 https://t.center/joinchat/FBi6QENHPTFvEnwTEDkBFg صفحة المدربة والمستشارة الأسرية رضا الجنيدي على التلجرام👇 @Redaalgeneedy صفحتنا على الفيس بوك👇 https://m.facebook.com/Reda.Geneedy