🌸الودود🌸 4⃣ طيب تعالوا نشوف تاني خطوة من خطوات التوبة الصادقة احنا قلنا التوبة ندم بالقلب فهل ده يكفي؟ لا طبعا مع الندم بالقلب محتاجين استغفار باللسان والنبي صلى الله عليه وسلم كان بيستغفر في اليوم سبعين مرة وفي حديث إنه كان بيستغفر مائة مرة ده النبي فأولى إن احنا نستغفر الاستغفار ده 🌸الاستغفار عامل بالظبط زي الاستيكة اللي عمالة تنضف في السبورة 🌸أو زي الصابونة اللي عمالة تنظف في الثوب الابيض المتسخ بشدة. 🌸عاوزين نرَّجع الثوب ابيض تاني وننقي القلب. 🔴فالتطبيق العملي التاني النهارده عشان توصلي للتوبة الحقيقية وبالتالي حب الله عز وجل لك اجعلي لك ورد يومي من الاستغفار ضمن اذكار الصباح والمساء خليه كده صديقك اليومي خليه جزء منك تقدري تتخلي عن جزء منك؟ أكيد لأ 🌸يبقا خلي الاستغفار أولوية في حياتك وجددي النية انك بستغفرى عشان تحققي ركن من اركان التوبة وبالتالي توصلي لمرحلة إن ربنا يحبك النية دي جميلة جدا جدا لو استغفرنا واحنا حاطينها في بالنا أكيد هيكون أثرها عظيم. 🌸طيب دلوقتي نشوف مع بعض ركن تاني مهم جدا جدا من اركان التوبة وهو العزم على عدم العودة الى الذنب يعنى ايه عزم يعنى تاخدي النية دي وتمشي في الخطوات دي يعنى تقفلي على نفسك أبواب المعصية تشوفي ايه الذنب اللي كنتِ بتعمليه وتبدئي تاخدي خطوات عملية لتجنبه تسدي على نفسك منافذ المعصية تاخدي أول خطوة بالفعل .. أما لو ندمتِ واستغفرتِ ومعملتيش خطوة ايجابية فعلية على ارض الواقع تبقي دي توبة كاذبة للأسف ومش هتوصلك لدرجة تحقيق الأية دي "إن الله يحب التوابين ويحب المتطهرين" 🌸واحنا اتفقنا عاوزين نوصل للمرحلة اللي ربنا فيها يحبنا ويأمر جبريل أن يحبنا نوصل لمرحلة ان أهل السما يحبونا وبالتالي يوضع لنا القبول في الأرض فالواجب العملي التالت النهارده اني اشوف منفذ من منافذ المعصية انا بعمله وأبدأ اقفله. 🌸عرفنا أول مقتضى من مقتضيات حب الله للعبد وهو التوبة ولكن التوبة لا تتوقف عند ما تكلمنا عنه 🌸في توبة تانية مهمة وهي رد المظالم لأصحابها حقوق الناس اياك وظلم الناس 🌸الظلم ممكن يكون بالقول والفعل واحنا النساء معظم ظلمنا للاسف بيكون باللسان❌ غيبة❌ بهتان❌ نميمة❌ فحش في القول أحيانا❌ 🌸ربنا سبحانه وتعالى ممكن يعفو عنك في حقوقه ولكن حقوق البشر لازم ترديها لأصحابها 🌸عاوزين نبدأ نتوب توبة صادقة توبة اللسان ياريت الشهر ده يكون شهر توبة اللسان عن ذنوبه وطول ما أحنا ماشيين نذكر بعض بده رد المظالم لأهلها من شروط التوبة يعنى لو اخدتِ حق حد في حاجة رديه فورا اتكلمتِ على حد بشكل وحش ابدئي اذكريه بالخير ادام اللي ذكرتيه بالسوء ادامهم ادعيله كتير وربنا يعفو عنا ويغفر لنا زلات لساننا يارب 🌸تخيلوا حبيباتي ممكن كلمة واحدة تكون سبب في سقوطنا في النار عن أبي هريرة رضي الله عنه أنه سمع النبي صلى الله عليه وسلم يقول‏:‏ “إن العبد ليتكلم بالكلمة ما يتبين فيها يزل بها إلى النار أبعد مما بين المشرق والمغرب‏"‏ ‏(‌‏(‏متفق عليه‏)‌‏)‌‏.‏ 🌸كتير بنتكلم ونعتبر إن الكلام ده عادي نعتبر انه مفيهوش حاجة وهو شايل جواه ذنوب كتير للأسف لينا. ربنا يعفو عنا ويتوب علينا ويرزقنا حفظ اللسان يارب 🌸بنفضل نجيب سيرة صاحبتنا فلانة وجارتنا فلانا وسلفتنا وأختنا وأخت زوجنا وعمالين نشيل في ذنوب وأحنا مش واخدين بالنا السيدة عائشة بس في اشارة منها إن السيدة صفية قصيرة تخيلوا النبي قالها ايه 🌸تعالوا نشوف الحديث اللي كلنا عارفينه بس المرة دي عاوزين نتأمل فيه ونفكر فيه ونفكر كام كلمة قلناها على فلانة وفلانة وفلانة عن عائشة رضي الله عنها‏:‏ قالت قلت للنبي صلى الله عليه وسلم حسبك من صفية كذا وكذا‏.‏ قال بعض الرواة‏:‏ تعني قصيرة، فقال‏:‏ ‏"‏لقد قلت كلمة لو مُزجت بماء البحر لمزجته‏!‌‏"‏ ومعني‏:‏ ‏"‏مزجته‏"‏ خالطته مخالطة يتغير بها طعمه، أو ريحه لشدة نتنها وقبحها 🌸خلونا نعلنها النهادره توبة صريحة من الخوض في الكلام عن الناس عارفة ساعات الواحد بيكون متغاظ ومتضايق وتعبان جدا من حد معين بس بلاش تحكي لحد يعرفه بلاش تحكي إلا لو حد هتاخدي منه نصيحة عشان يحل لك مشكلتك وبغرض حل المشكلة لا بغرض التشهير بالشخص ده وربنا يرزقنا التوبة و التقوى وحفظ اللسان يارب 🌸الأمر طبعا عاوز تدريب مننا كلنا، عاوز مداومة، عاوز جهاد كبير اوي، بس الهدف اللي عاوزين نوصله يستحق الهدف حب الله عز وجل 🌸فنجاهد شوية واتنين وعشرة لحد ما نوصل بإذن الله. ✍بقلم رضا الجنيدى #الودود #أسماء_الله_الحسنى جروب حياة القلوب👇 https://t.center/joinchat/FBi6QENHPTFvEnwTEDkBFg صفحة المدربة والمستشارة الأسرية رضا الجنيدي على التلجرام👇 @Redaalgeneedy صفحتنا على الفيس بوك👇 https://m.facebook.com/Reda.Geneedy