🌸 #الودود 🌸 1⃣ لما تلاقي حد بيحبك جدا وبيتودد ليكِ، يا ترى إحساسك بيكون ايه؟ ممكن الحد ده يكون زوج مثلا ولو إن احنا عادة اللي بنتودد مش هما 😂😂😂 بس هقول مثلا يعنى 😂😂😂 طب لو اللي بتتودد ليك صديقة وبتسعى إنها تسعدك وتفرح قلبك دايما يا ترى هيكون برضه احساسك بيها عامل ازاي؟ أكيد هتبقي من جواك طايرة بيها وبتحمدي ربنا عليها وبتدعي دايما ربنا يديمها ليك خير صديقة🌺 طب لو اللي بتتودد لك طالبة عندك أو موظفة عندك أو حد تحت مسؤليتك وأنت عارفة إنها بتحبك أكيد هتكوني مبسوطة برضه. كل الحب والود ده في ميزان البشر كبير جدا جدا وبيسعد القلب ويفرح النفس وبينقل الإنسان من حال لحال مختلف تماما. 🌸لكن كل دي أمثلة بقرب لك بيها المفهوم ولله المثل الأعلى لو اللي بيتودد لك هو الله عز وجل هيكون إحساسك أيه؟ 🌸أيه ده هو معقول ربنا سبحانه وتعالى ممكن يتودد ليا؟ أيوه طبعا 🌸اسم من اسماء الله الحسنى الودود تعالي نشوف ابن القيم رحمه الله بيقول ايه : "ليس العجب من مملوك يتذلل لله ويتعبد له ولا يمل من خدمته مع حاجته وفقره إليه، إنما العجب من مالك يتحبب إلى مملوك بصنوف إنعامه ويتودد إليه بأنواع إحسانه مع غناه عنه 🌸أيوه فعلا طبيعي إننا نتودد إلى ربنا سبحانه وتعالى، ونطلب رضاه عز وجل، ولكن إن ربنا يتودد إلينا وهو الغني عنا ده العجيب فعلا 🔴معادنا النهارده مع اسم الله الودود أسأل الله أن يجعل لي لكم ودا وأن يتفضل علينا بعظيم وده 🌸أنا مش هبدأ بمعاني الأسم ولكن هبدأ ببداية مختلفة شوية كلنا نفسنا نتحب أكيد صح؟ كلنا نفسنا الناس تنجذب لينا وتميل لينا ويكون لنا في قلوب الناس مكانة وخاصة الناس القريبين اللي بنحبهم.. طيب ازاي نوصل لده؟ الروشته الرائعة إنك تكوني مع الودود الودود قادر إنه يألف بين قلبك وقلوب الناس اللي حواليك ويجعل لك في قلوبهم ودا فكل ما تروحي مكان كده تلاقي الناس بتحبك. حتى لو غبتِ عن المكان تلاقي لك فيه ذكرى حسنة والناس بتذكرك بالخير. مش في ناس بتلاقيهم بالفعل كده؟ الناس دي سبحان الله ربنا فاض بكرمه عليهم ووهبهم هبه رائعة وهي الود في قلوب عباده يقول الله عز وجل: "إِنَّ الَّذِينَ آمَنُوا وَعَمِلُوا الصَّالِحَاتِ سَيَجْعَلُ لَهُمُ الرَّحْمَٰنُ وُدًّا" حققي الشرط تتحقق النتيجة اعملي الصالحات تلاقي الود في قلوب خلق الله لك كبير جدا أكبر مما تتخيلي. ✍بقلم رضا الجنيدى #الودود #أسماء_الله_الحسنى جروب حياة القلوب👇 https://t.center/joinchat/FBi6QENHPTFvEnwTEDkBFg صفحة المدربة والمستشارة الأسرية رضا الجنيدي على التلجرام👇 @Redaalgeneedy صفحتنا على الفيس بوك👇 https://m.facebook.com/Reda.Geneedy