Лезги Газет

РикIел гъун

Къуръанда математикадин аламтар

Къуръандин жигьетдай илимдин гзаф ахтармишунар кьиле тухванва, математикадин уьлчмейралдини гьисабар кьунва: «флан гаф икьван гьатнава», «фланди акьван…» лугьуз, аятар атанвай къайдаяр, гафар эциг хьанвай чкаяр ва маса крар тайинарнава. (Мисал яз, Къуръанда «югъ» гаф теквилин кьадарда аваз 365 чкадал гьалтзава (йиса 365 югъ ава), гзафвилин кьадарда аваз ам 30 чкадал (30 йикъакай са варз ибарат я) гьалтзава. «Варз» гаф 12 сеферда гьалтзава (йис 12 вацракай ибарат я). «Жаза гун» (наказание) гаф Къуръанда 117 сеферда кьунва, амма «багъишун» (гъил къачун, прошение) гаф «жаза гун» гафунилай кьве сеферда артух, яни 234 сеферда гьалтзава. Диндай чаз чизвайвал, Аллагьдин регьим Адан хъелдилай вилик квайди я. И кар чаз, фикир гайила, инсандин уьмуьрдайни аквазва. Гьар садаз вичин гунагьриз килигайла, кьилел къвезвай дуьшуьшар лап тIимилбур тирди чизва, амма ихьтин кьатIун анжах фагьумзавай ксарихъ авайди я.

Къуръанда «дуьньядин уьмуьр» ва «Эхиратдин уьмуьр» кьведни 115 сеферда гьалтазва, Къуръанда «шейтIан» 88 сеферда лагьанва, «малаикни» 88 сеферда лагьанва, «иман» 25 сеферда лагьанва, «имансузвал» 25 сеферда лагьанва, «Женнет» 77 сеферда лагьанва, «Жегьеннем» 77 сеферда лагьанва… Ихьтин мисалар мадни гъиз жеда. -ред.)

Гьасамудин Сефибегов, «Жуьмя йикъан вязер» ктабдай, 209-чин.

РикIел гъун!

Къуръан (17-сура, 23-24-аятар, мана):

«Ва эмирнава (гьукумнава) ви Раббиди куьне садазни ибадат тавун, са Вичелай гъейри, ва (эмирнава) диде-бубадиз хъсанвал авун. Эгер абурукай сад ва я кьведни кьуьзуьвилихъ агакьайтIа ви патав - (гьич) лугьумир (вуна) абуруз (кьведаз) «Уф (эгь)!» ва гьараймир (вуна) абуруз (кьведаз), ва лагь (вуна) абуруз (кьведазни) хуш (хъуьтуьл) гафар (гьуьрметдивди рахух). (23)

Ва агъуза (вуна жуван) умунвилин «лув» абурун (кьведанни) вилик регьимлувализ (абуруз) ва лагь: «Рабби! Регьим ая абуруз (кьведазни), абуру зун аял чIавалай (сабур ва регьим авуна) тербияламишуниз килигна». (24)»

Таржума – диндин алим Ямин Мегьамедованди.