کانال رسمی کالیکلا لفور

‍ قدیم حال و کار مِه دلِ وِنِه
زَمی سَر ، تیمِ جار مِه دلِ وِنِه

سِروش وَک، تِلِر رِه تَب تَب وَنگ
نِشا کَری بِهار مِه دلِ وِنِه

تَش سَر هول هولِه پِلا بَپِتِن
کایرِ چاشتِ بار مِه دلِ وِنِه

تیساپه لینگ زَمی رِه مِن هاکردِن
اَتی اسبِ سِوار مِه دلّ وِنِه

نِواصِّر خَسِّه تَن ، بَنِ کَش هایتِن
خونِّشِ چاربیدار مِه دلِ وِنِه

مِه دل شوپه یِ وِسِّه چَنِّه تنگه
کَمِل به سَر نِفار مِه دلِّ وِنِه

دیاری اِشِمِه مِه دل تُو کِنِّه
لَفورِک سوزِ لار ،مِه دلِ وِنِه

مِه دل خوانه وچه بَوِم دِوارِه
بَنِ پِشِت هِدار مِه دلِ وِِنه

چِتی بَیِّه همه رِه اُو سَر هایتِه
قدیمِ روزگار مِه دلِ وِنِه....

📌 #سوادکوه-لفور

🖊 #بانو_سارا_سوادکوهی🌸

🥀 @kalikolaiha🥀