قصيدة گعديه....رسالة اعتذار سامحني يبن الحسن... شكد قصرت وياك بالدنيا كلبي انفتن.. شكد قصرت وياك ماترضه نفسي اتوب.. وكتابي مملي ذنوب.. شگد قصرت وياك -------------------------------------- لاتدير الوجه عني عليك امشي دموع عمتك كلي عثرات واجيتك سيدي داخل ابختك ادري بيك شكد تحبني ماعفتني واني عفتك جيتك وتارسني الخجل ماعندي غيرك كل امل مااحتمل منك زعل ولو يالمهدي خذلتك عايش حياتي بلهو... وانت بحزن وهموم والدنيه ضحك وسهو.. وانت بحزن وهموم عايشها بالمگلوب... وكتابي مملي ذنوب.. شگد قصرت وياك --------------------------------------- من يذكرونك اگبالي چنت افزن لان ناسي استحي ولوني يتغير من اخلي ايدي اعله راسي شگد خلفت وياك عهدي وهاي مأسات المأسي ماجنت صادق بالعهد وخلفت كم مره الوعد لوصحت يالمهدي المدد لاتصدگ گلبي قاسي بلساني اعجل الك... وفعالي شر افعال يالچفك امري ملك.. افعالي شر افعال جفك سترلي اعيوب.. وكتابي مملي ذنوب... شگد قصرت وياك -------------------------------------- نفسي احاول بيها اصلح للذنوب تميل وترد عمر عشته اعله هالحاله شما اجاني عنك ابعد انشد اعله احوال غيرك وانت عن احوالي تنشد اسأل على الي ماسأل راضي عليه لوزعل وناسيك وي حزن الاهل وانت يامه بخلتي اتسد يوميه ازيدك جرح.. وانت التشدلي جروح بالجرح احطن ملح.. وانت التشدلي جروح صبرك عبر ايوب... وكتابي مملي ذنوب... شگد قصرت وياك ------------------------------------ جيت يم بابك اتوبن يلي بابك باب ربك اعترف بفعالي شينه شگد چنت بفعالي اعذبك بذنبي كل صبح ومسيه بسهم زلاتي اني اضربك كل لحضه ارميك بسهم مثل الي هجموا عالحرم مااضرمت نار بخيم بس حرگت بذنبي گلبك عاصي واقر بالذنب...يارحمة الجبار يالگلبك اطيب گلب..يارحمة الجبار يالتدرك المكروب.. وكتابي مملي ذنوب.. شگد قصرت وياك ------------------------------------- مااذكرك طول ليلي منتشي وللظهر غافي ابد مامهتملك اني ونايم بأمنك الدافي ساكت واسمع سكوتك چن يگلي اصحه كافي فزيت اصرخ لاچذب مرعوب من كبر الذنب معقوله ادور عالعذب وانت حبك نبع صافي تتركني لاموصدگ... يم نبعك وعطشان موسهله من نفترگ... يم نبعك وعطشان يلعندي اعز محبوب... وكتابي مملي ذنوب... شكد قصرت وياك جواد كاظم الگرعاوي