#Study_Skills 📚🏃🏻‍♀️ السلام عليكم، وباركَ اللهُ سعيكم 👋🏻 قبل الامتحان بيوم لما يكون فيه براسك 40 محاضرة بما فيهم من معلومات تُدرك انه الطريقة السردية بالدراسة لا تنفع بهدا المقام .. ونفس الشي وقت تكتر عليك المهمّات وتحسّ كأنك واقف بمتاهة ومو عرفان من وين بدك تبلش ! 🤷🏻‍♀️ >> لهيك إشراقة اليوم جابتلكم أداة تساعدكم بهدول الشغلتين، التنظيم والدراسة. ال Mind Maps 🤩🔥 طريقة التفكير يلي اخترعها Tony Buzan وأثبت من خلال دراساته أنها الطريقة يلي بتخلّينا نفكّر بشكل فعّال أكتر. 📌 ليش الخرائط الذهنية تملك هالفعالية وهالفائدة كلها؟؟ • لأنها ببساطة بتحاكي طريقة عمل الدماغ الفعليّة، متل انه أدمغتنا بتفكر بالصور وبتعتمد على ربط المعلومات مع بعضها وبتنتقل من فكرة لفكرة بشكل متسلسل. • بتساعدك تربط المفاهيم المتعلقة بموضوع واحد ومن ثم تستنتج معلومات جديدة .. وبالتالي توفير الطاقة المبذولة بالحفظ والبصم المجرّدَين، والمساعدة على التذكُّر في حال خانتك الذاكرة بالفحص. • توفر الوقت بمراجعة مئات الصفحات. 📌 بشو بقدر أستعمل الخرائط الذهنية؟؟ بقدر استخدمها بزيادة الإبداع وتوليد الأفكار، التنظيم والتخطيط، العصف الذهني، التقديم، وأهمّ شي للطالب انه يستعملها بدراسته ! بكلّ مراحل دراستك فيك تستفيد من قوّة الخرائط الذهنية 💡 فمثلاً فيك تستخدمها لتعمل مخطط عامّ للمادة بأول السنة وتتابع تقدمك فيها خلال الفصل .. بإمكانك ترسم خريطة للموضوع يلي عم تدرسه وتضيف فروع بالترتيب لتبقى الأفكار فريش براسك، وما تنسى أول المحاضرة لما توصل لآخرها :")) وفيك كمان تستخدمها بالمراجعة والعصف الذهني، لتشوف أديش متذكر معلومات عن الموضوع الفلاني 💁🏻‍♀️ 📌 كيف بعمل خريطة ذهنية على طريقة Tony Buzan؟؟ • صورة بالوسط تُعبّر عن الموضوع • أفرع طالعة من الصورة، كل فرع بعبّر عن موضوع فرعي • من كل فرع بتقدر تفرّع إلى ما لا نهاية 📌 قوانين استخدام الخرائط الذهنية بفعالية: • استخدام الصور قدر الإمكان، لانه - متل ما أسلفنا - أدمغتنا بتفكر بالصورة وليس بالحروف المجرّدة، وكلمة وحدة بتنوب عن ألف كلمة. الصورة بتملك طاقة ! بتقوّي الذاكرة وبتحفّز التفكير وبتساعدك على توليد الأفكار 🤯 • استخدام كلمات مفتاحيّة، وليس جمل أو فقرات (لانه الجملة بتقيّد أفكارك بينما الكلمة الوحدة بتخلّيك حرّ وتُطلق العنان لإبداعك .. وإذا عم نحكي عالتنظيم فكلمة وحدة رح تكون أسهل بوقت الإعادة وأوفر للوقت) • استخدام الألوان ( ما حدا فينا ما بحبّ الألوان، الألوان كعنصر مجرّد هي أداة تفكير ووسيلة تشفير وتعليم وبتساعدنا عالتذكُّر) الخرائط الذهنية أثبتت فعّاليتها بمختلف المجالات، وهيي أداة ممتعة للتعلُّم والتنظيم بتساعدك تربط أفكارك وتبسّط المفاهيم المعقّدة لتتفاعل معها وبالتالي تحول عملية التعلم ل #تعلم_فعال 🤹🏻‍♀️ بالتوفيق لكم يا أصدقاء 🤩🎊 #إشراقة ~ @Ishraaqaa