#Study_Skills >> على درب الإنجاز 🏃🏻‍♀️ السلام عليكم ورحمة الله 👋🏻 الإنسان بطبيعته بفضل يقوم بالأشياء يلي بتوفرله عائد فوري مرضِ، متل تصفح السوشال ميديا مثلاً يلي بوفرلك سعادة مؤقتة بأصوات الإشعارات واللايكات والتعليقات .. لكن الحقيقة انه الأعمال العظيمة بالحياة، يلي بتحققلك مكاسب مادية ومعنوية كبيرة وبتخليك شخص عظيم؛ ما بتتبع هي القاعدة .. والسبب انه أي عمل كبير بيتطلب عمل دؤوب على المدى البعيد لتظهر نتائجه المرضية، لذلك انت بتدرس عشر شهور لتحظى بلحظة النجاح .. المشكلة بالموضوع انه أحياناً بسيطر علينا الملل خلال رحلة الإنجاز، ومن هون بتجي أهمية #الحافز 🏃🏻‍♀️ إذا بدنا نعرف الحافز ف هو القوة والطاقة يلي بتدفعك لتحقيق أهدافك والتطور لتحسين جودة الحياة. وهو عنصر هام جداً بمعادلة الإنتاجية 📌 (الإنتاجية = المهارة × الدافعية) المحفزات بتنقسم لقسمين: داخلية وخارجية باختصار الفرق بيناتن انه الخارجية هي شي يأتي من الخارج مثل المكافأة المادية أو العلامات والدرجات الدراسية 📝 والحوافز الداخلية تنبع من داخل الإنسان، متل الرضا عن النفس من جراء تنفيذ هي المَهمة، أو الشعور بالتسلية والمتعة، أو الاهتمام بالموضوع وممكن التحدي 💪🏻 المهام ممكن يكون الها حوافز داخلية أو خارجية أو كلاهما معاً، لكن الخطورة تكمن باعتماد بعض الأشخاص على التحفيز الخارجي بشكل كلي ! الحياة مو دائماً سهلة وبسيطة (خصوصاً بالقرن ال21 :3)، والناس مو دائماً متحمسين وفاضيين يحفزوك لتتقدم .. انت بحاجة للتحفز الذاتي .. يعني الحفاظ على همة داخلية لإكمال الطريق بدون مساعدة أو دعم من أحد .. وهدا العنصر أحياناً بيصنع الفرق بين الأشخاص المتشابهين بالقدرات، خصوصاً عند التعرض لظروف صعبة وعوائق، فالإنسان المتحفز داخلياً يلي مَوقِد الهمة عنده داخلي رح يكون تأثره بالظروف الخارجية أقل بكتييير من يلي بيعتمد عالتحفيز الخارجي. 🎯 بعد ما عرفنا المعلومات الكافية عن التحفيز، أكيد ناطرين خطوات عملية تساعدنا على التحفز الذاتي .. جمعتلكن أربع خطوات بتساعدنا نحقق هالشي: 1- التنفس بعمق: بظرف السرعة يلي بتتسم فيها حياتنا الحالية، معظمنا فقد طرق التنفس الصحيحة، وللأسف هالشي بأثر عالدماغ بشكل كبير، لذلك التنفس بعمق أول ما تفيق رح يساعدك تكون متحفز لبقية اليوم .. اوثق بكلامي 2- إحاطة نفسك بالناجحين .. دينياً وعلمياً وبديهياً حالك هو متوسط حال الأشخاص الخمسة -تقريباً- يلي بتختلط فيهن بكثرة، إذا رفقاتك وبيئتك بتدفعك للنجاح ف هدا شي عظيم .. أما إذا رفقاتك من النوع دائم الشكوى والتذمر والسلبية طوال الوقت فتوقّع انك تفقد حتى رصيدك الحالي من التحفز .. والقرار قراراك 3- وقت بدك تعمل شي مهم كالدراسة مثلاً، اسأل نفسك 3 أسئلة: هل تستطيع فعل المَهمة ؟؟ هل سيجدي ذلك نفعاً ؟ هل الأمر يستحق ؟!! فكر بإجابة كل سؤال على حِدى واستعيد التفكير بمصلحتك الحقيقية والفائدة مما تقوم به .. استشعر الفرصة الكبيرة يلي بين ايديك وقدرتك على الاختيار وخليك انت المتحكم بحياتك وليس المشتتات وسفاسف الأمور .. وانتبه انك تستجيب لمنبه الفرصة قبل ما يرن منبه الإنذار ويبدأ الشعور بالخوف والخطر .. "عندما تعي قيمة الاختيار؛ تلمس التحمس" إلين لانجر 4- تخيّل نجاحك .. خلي عندك ورد يومي من التخيل، تخيل لحظة النجاح بكافّة تفاصيلها، هالتخيل رح يخليك تعيش هاللحظة الحلوة وعقلك رح يستجيب لانه ما بفرق بين الخيال والحقيقة، وبالتالي تتغلب على كسلك وتحقق الانتصار 📌 رغم كل شي ذكرناه عن التحفز وأهميته إلا انه بتمر علينا أوقات بنفقد فيها التحفز أو بالأحرى الاستجابة للتحفز .. هون بيجي دور قوة الإرادة وإلزام النفس على القيام بما هو واجب .. مثلاً انت طالب؛ لذلك حتى في حالة ضبابية الهدف وعدم وضوحه المطلوب منك تدرس وتحصل أعلى درجة علمية .. على الأقل لبينما يوضح هدفك مرة تانية وتستعيد رغبتك بالدراسة. ختاماً بدي قول 🤗 ما حدا عنده المبرر انه ما يوصل لقمة إيفرست يلي بداخله .. الصعوبة موجودة أكيد لكن انت عندك القدرة اللازمة لتوصل لهدفك وتوقف على قمة ايفرست الخاصة فيك وتفتخر بإنجازك .. بدي منك، بدءاً من هي اللحظة؛ تتخلى تماماً عن الأعذار، لأن الأعذار بتحط بطريقنا حواجز زيادة وبتأخرنا كتير عن أهدافنا .. وخلي ببالك انه وصول القمة أكيد بيستحق 🎯 بنتمنى لكم أيام مليئة بالرضا والإنجاز 💭🤲🏻 #إشراقة ~ #Motivate_yourself 🌟 #Motivation 🧗🏻‍♀️