#Study_Skills 📚🎓 السلام عليكم ورحمة الله وبركاته ~ إحدى المشاكل يلي بتأرّق الطالب هي #تذكُّر المعلومة بالامتحان .. للأمانة فالذاكرة عامل هام جدّاً من عوامل التعلُّم .. طيب إذا أنا درست الشغلة وحفظتها؛ ليش لحتى انساها بعد فترة ؟!! 📌 المخ بيتلقّى باليوم عدد مُدخَلات كبير جدّاً، كل مدخل ممكن يحمل معلومة، تخيّل لو انك بتتذكر كل شي بحياتك .. متل انك شو أكلت عالغدا بأول يوم بال 2020 .. وموقف زعجك وقت كان عمرك 3 سنين .. تخيل لو انك بتتذكر كللل تفاصيل حياتك المهمة وغير المهمة .. وقتا كانت تحولت حياة البشر لجحيم !! لهيك المخ عنده آلية انتقائية .. بشكل واعي بيحتفظ فقط بالمعلومات المهمة بالنسبة الك .. وباقي المعلومات بيتجاهلها .. ممتاز .. لكن مهمّتي بهالحالة اقنع عقلي بالمعلومات المهمة ليحتفظ فيها أكبر وقت ممكن .. كيف ؟؟ ممكن يتم هالشي عبر طريقة التكرار المتباعد Spaced Repetition (وعدتكن احكي عنها من فترة ) بمعنى انك بعد ما فهمت المعلومة؛ بدل ما تكررها 5 مرات على نفس القعدة كررها 5 مرات بمرات متفرّقة ومتباعدة .. أولاً لأنه بنفس الجلسة الدراسية بتتوقف فائدة الإعادة عند حد معين، يعني انت كررت المعلومة لنفرض مرة مرتين تلاتة؛ بعد هيك بصير التكرار عديم الفائدة ثانياً لتقنع المخ بأنه هالمعلومة مهمة وبالتالي هيي بتستحق يبذل جهد ليحتفظ فيها > فائدة ال Spaced Repetition : الحقيقة انك أول ما تتلقى معلومة رح تقعد بالذاكرة قصيرة الأمد .. ف هالطريقة منظمة بحيث انك تعيد المعلومة كل ما تكون على وشك تنساها .. لحد ما تدخل على الذاكرة طويلة الأمد Long Term Memory ويصير تذكرها سهل بالنسبة الك > السؤال يلي رح تسأله: معنا وقت للإعادة بهالطريقة ؟؟ الجواب نعم .. لأنه إذا كنت دارس قسم ما بشكل جيد مو مطلوب منك "تدرسه" من أول وجديد بكافة معلوماته وتفصيلاته، وإنما فقط إعادة سريعة للأفكار الهامة، وممكن تعيده عن طريق مخطط بسيط أو تلخيص عالسريع .. المهم تمرر المعلومات على عصبوناتك .. >> وإذا حبيت تعيده بشكل كامل فهيي قراءة مع تركيز مو أكتر من هيك >> الطريقة المثلة للإعادة عن طريق الاختبار الذاتي او ما يدعى بال Active Recall (رح نتناوله المرة الجاية إن شاء الله) الطريقة ربما جديدة على معظمنا لكن أثبتت فعاليتها بجدارة 👌🏻💯💯 بإمكانكم تطلعوا على تفاصيلها من الإنترنت .. وبكل الأحوال المسألة بحاجة صبر .. دببتُ للمجدِ والسَّاعون قد بلغوا .. جُهدَ النفوسِ وألقَوا دونَه الأُزُرا وكابدوا المجدَ حتَّى ملَّ أكثرُهم .. وعانقَ المجدَ من أَوفى ومن صبرا أسألُ الله لكمُ التوفيق 🙏🏻 #NEVER_Give_Up ! #إشراقة 💭✨