#جوالك_كنز 💰 السلام عليكم ") نحنا وعم نقرأ في القرآن برمضان بيطلع معنا كتير كلمات بنحبّ نعرف شو معناها، أو آيات حابّين نطّلع على أكتر من تفسير الها، أو نعرف الأحكام يلي فيها أو سبب نزولها أو أو .. وبنعرف انه كل واحد من هدول المجالات هو علم بحاله 👀 عندك خَيارين: إما بتسأل عمو غوغل وبتقعد تدوّر وتبحث بين هالنتائج (او هلأ عالحديث بتسأل ChatGpt 😆) أووو بتروح عالموقع المتخصّص بالبحث في كللل ما يخصّ القرآن الكريم 🤩 موقعي المفضل وتطبيقي المُحبَّب الباحث القرآني 📖🥳🎊🎊 • ما الخدمات التي يقدّمها لك الباحث القرآني؟ ١- ميزة البحث: اكتب أي كلمة في القرآن الكريم ورح يطلعلك كم مرة وردت في القرآن، أين وردت (السورة والآية) مرتّبين وفقاً لترتيب السور التوقيفي. 🖇 هي الميزة بتخدم الحفّاظ يلي حابين يضبطوا المتشابهات، وبتخدم الباحث يلي عم يبحث عن مفهوم معيّن في القرآن الكريم. ٢- البحث في التفاسير: لما تُدخل أي آية بإمكانك تطّلع على تفسيرها بأكثر من ٣٥ تفسير، متنوّعة بين التفاسير الضخمة مثل الطبري وابن كثير والتفاسير الميسّرة مثل الجلالين والسعدي، واللغة والبلاغة متل ابن عاشور وابن عطيّة وغيييره وغيراته .. ٣- البحث في علوم القرآن: إذا بدك تبحث عن القراءات في آية محددة أو سبب نزولها او الأحكام الواردة فيها فهي الميزة رح تخدمك. ٤- البحث في المصاحف: إذا حابب تقرا من مصحف معيّن مو موجود عندك ورقي متل مصحف المدينة أو مصحف التفسير الموضوعي أو مصحف التجويد؛ بتلاقي بهدا التصنيف أكتر من ٣٠ مصحف بتختار من بينها. ٥- البحث في المعاجم: هي الميزة بتستخدمها وقت بدك معنى مُفردة معيّنة متل كلمة (العاديات) مثلاً، يتيح لك البحث في ٩ معاجم تتنوع بين البسيطة والاشتقاقية. • الوصول لأي معلومة بتخصّ أي آية بكون في غاية السهولة، فمثلاً إذا بدك تفسير آية {الحمد لله رب العالمين} بتروح على قسم التفسير وبتكتب بخانة البحث الآية بعدين بتختار بأي تفسير حابب تقرا وبيطلعلك التفسير فورا (ما بتضطر تقلّب بكتاب أو حتى بقلب السورة نفسها)، مع إمكانية النسخ لتحتفظ فيه بالمذكّرات مثلاً أو بملف تاني. • أذكركم انه تطبيق الباحث القرآني أحد مشاريع نُقاية يلي بتقدم أنفع المشاريع والتطبيقات لكل مسلم • بتلاقي الباحث القرآني على شكل: 📌 موقع على المتصفّح على الرابط 📌 تطبيق على الرابط (التطبيق أون لاين) وأخيراً، هدا التطبيق من أهمّ أهمّ التطبيقات يلي لازم تكون موجودة على جوالك، وإذا تعودت عليه ما رح تقدر تستغني عنه 😍 حمله من هون 👇🏻 الله يقدّرنا نعرّفكم على كل نافع. إشراقة ~