#Study_Skills 😎 السلام عليكم 👋🏻 بالبوست الماضي حكينا عن عقلية الثبات وعقلية النمو، وشفنا الفرق الواضح جلياً بين الاتنين .. بهدا البوست رح نتناول النقطة الأهم وهيي: كيف تحقق عقلية النمو أثناء رحلتك الجامعية ؟!! 🔝 الصراحة في خطوات للتحول من عقلية الثبات لعقلية النمو، حسب الدكتورة كارول دويك بجامعة ستانفورد: أولاً: اسمع الصوت يلي بداخلك .. بكل تحدي بتواجهه فيه صوت جواتك بيبدأ يقلك (هي الشغلة صعبة كتير)، (إذا فشلت رح يقولوا عنك فاشل وغبي)، (انت مالك منيح بهي المادة وما رح تجيب فيها علامة عالية) هدا الصوت يلي بضل يتردد داخلك، اسمعه منيح وخليك واعي شو عم يقول لك .. ثانياً: كون واثق تماماً انك بتملك الخَيار .. انت وحدك القادر على تفسير التحديات والانتكاسات يلي بتتعرض لها .. يا أما بتتجنب الصعوبات وبتبقى على نفس مستواك .. أو بتختار انك تحاول وتتفانى بالعمل وتستغل الصعوبات كفرصة لتطور أدواتك ومهاراتك 💪🏼 ثالثاً: واجه الصوت يلي بداخلك .. جزء كبير من عقلية النمو بيعتمد على حديث النفس الإيجابي أو ما يُسمى Positive Self Talk، لذلك وقت يقلك عقلك انت غير قادر على فعل هدا الشي، لا تخليه يتمادى بأفكاره؛ بل واجهه فوراً بأفكار مضادة .. أنا بقدر .. ورح حاول وابذل قصارى جهدي .. وأكيد نتيجة المثابرة والمحاولة والعمل الدؤوب هيي نتيجة ترضيني بإذن الله 🌷 رابعاً: فعلك هو الأهم !! حديث النفس هام جداً لكن بالنهاية الفعل هو يلي بحدد النتائج .. شيل كلمة الاستسلام من قاموس حياتك، وخلي خيارك الوحيد هو المواجهة والمحاولة والتعلم من الأخطاء والتطور على الدوام المختصر المفيد: الإبداع والموهبة والإنجازات العظيمة ما فيها أكتر من الالتزام ببذل جهد منتظم على مدى زمني طويل، تراكم هالالتزام بوصلك لنتيجة عظيمة 🌟 حتى الشغف هو شي يمكن العمل عليه، وممكن يبدأ صغير ومن ثم ينمو مع الوقت والجهد ليصير محبة حقيقية للمهمة يلي بين ايديك 👌🏻 "لا معنى للحياة بدون النمو والتطور" 🍃 #موفقين_جميعاً 🙏🏻 #إشراقة