وِينَ ابُويَه وْضِوَه الْعِينْ يَا زَمَنْ وِينِ الِحْسِينْ شُو أنَاشِدْ بَلَا جْوَابْ مْنِينَ اجِيبَنْ أُبُو مْنِينْ ----------------------- آنِي طِفْلَه مْدَلَلَه آنِي رُقَيَّه اخْتِنْگَتِ عْيُونِي بْدُخَانِ الْغَاضِرِيَّه تْحَيَّرِتْ مِنْ هِجْمَتِ الْوَادِمْ عَلَيَّه رَوِّعُونِي وْخَلَّوِ الْحَبْلِ بْإِدَيَّه مْنِ الرُّعُبْ رِجْفَتِ عْضَايْ وَحْدِي وِالْعَسْكَرِ هْوَايْ مَا بُگَه عِنْدِي حَمَّايْ وِانْشِعَبْ گَلْبِي نُصِّينْ ----------------------- كِلْشِي ضَاعِ بْكَرْبَلَه وْخَابَتْ ظُنُونِي زْغِيرَه آنِي وِالضَّرُبْ كَسَّرْ مُتُونِي مْنِ الْعَطَشْ حَتَّى الدَّمِعْ جَفِّ بْعُيُونِي جَدْمِي دَاسَتْ عَالْجَمُرْ مِنْ فَارِگُونِي عَنِّي رَاحَتْ هَالَاحْبَابْ وِانْتِرَسْ وَجْهِي بِتْرَابْ رُوحِي ذَبَّلْهَه الِمْصَابْ مَا رُحَمْ وَنِّتِي الْبِينْ ----------------------- مِنْ طِحِتْ فُوگِ الثَّرَى وْمَحَّدْ لِزَمْنِي بْطِيحِتِي آنِي عْرَفِتْ دَهْرِي هُضَمْنِي شْگَدْ نِخِيتَه لْچَانِ الِي خِيمَه وْيِلِمْنِي گِتْلَه إِلْحَگْ مُو إِجَه ظَالِمْ شِتَمْنِي مَا فِزَعْ صَاحِبِ الْبَاسْ وْلَا فِزَعْ عَمِّي عَبَّاسْ وِينَ اكُو طِفْلَه يَا نَاسْ يِنْسِطِرْ مِنْهَه خَدِّينْ ----------------------- رَاحَ ابُويَه اللِّي چِنِتْ أَغْفَه عْلَه زَنْدَه يَعْنِي مَا يِرْجَعْ وَاحُطْ خَدِّي عْلَه خَدَّه يِدْرِي بِالصَّارِ وْجَرَه لِعْيَالَه بَعْدَه عَمْتِي زِينَبْ وِشْكِثُرْ گَامَتْ تِنِشْدَه يَا وِسَفْ هَاذِي أُمْ عُونْ لِلسَّبِي تِطْلَعِ شْلُونْ وِالْغُرُبْ بِيهَه يِحْدُونْ كَافِلِ الْحُرَّه چَا وِينْ ----------------------- مَدْرِي لَاوِينْ الْعِدَه تَاخِذْنِي تَالِي مَدْرِي أَحْيَا لُو أَمُوتِ بْلَايَه وَالِي خَايِفَه لَا ضِيعَنِ بْهَايِ اللِّيَالِي مِنْ بَعَدْ عِينِ الْكِفَلْنِي هَاذَه حَالِي هَالدَّرُبْ كِلَّه عِدْوَانْ وِاحْنَه مَا عِدْنَه وِلْيَانْ بَسْ عِلِيلِ وْيَه نِسْوَانْ مِرْتِفِعْ مِنْهَه الِوْنِينْ ----------------------- #رقية #محرم_١٤٤٦هج https://t.center/Hassankhanafer