الناشر غيث اللآمي(للقصائد المنبريه)

#اللهم_عجل_لوليك_الفرج


بقت روحي ذهيله : بعد ياهو اشتكيله
عله تعبي وعذابي

عسه الله ايعابي مايه : لخذ من عندي رآيه
اصل نوحي ومصابي

الماي وضيمه .. خلاني اشكد اصرخ ويلي
الماي وضيمه .. هـو اول واحـد هـد حيـلي

عفت اسنيني .. ودمعة عيني .. تدعي اعليّ
ماخذ اخوتي .. من عده موتي .. ومن ايديه

حرگ الخيام .. تشكي اليتام
ياعمه نادوا
وين الكفيل .. ما عندي حيل
من عدي راحوا

=========ـ

شنو هاي المصيبه : ليش انه الـغـريـبه
يصيحولي الـغـرب

وين افياي اخوتي : رايـح حته صوتي
وما وچده الدرب

وين الخوه .. انه اشلون اركض بالهيمه
وين الخوه .. ضايع گلبي ويكتل ضيمه

مو متعوبه    چنت مهيوبه   ابفيّ صيوان
امشي اميره   ماعندي حيره  عندي اخوان

راح الــدلال .. خدر الله مال
يا بو اعيوني
ياخويه اصيح .. امشي واطيح
من عفتوني

=========ـ

چبيره الكسره بيه : وعلي روحي خطيه
التعب ما ينحمل

وينه الدگلي صدره : ابـو الجفـيه خضره
مشه وراح الشمل

گلبي ايريده .. عني اشلون اخباره انگطعت
گلبي ايريده .. گـلــوله اختك زينب ركضت

كافل هوه .. راعي امروه .. ايهمني اهواي
غربه ابدونه .. وين عيونه .. عوفه الماي

ماعندي رأي .. طايح لواي 
وابلا خيمه
نص الجروح .. گلبي الينوح
من گد ضيمه

=========ـ

الضاعوا منه اهله : لتضن روحه عدله
ضيم اشكد عشت

عله الناگه الهزيله : رايح گلبي حيله
والف موته متت

صاحوا زينب .. خـل تطـلع لشموس الـهيمه
صاحوا زينب .. حرگوا اعليهه ادلال الخيمه

اطـلـع تـالـي .. وابـــلا والــي .. تالي الشيب
كافل خدري .. يلحگ عمري .. امنين انجيب

عشت ابضياع .. يوم الوداع
من عالـناگه
يهلي انتهيت .. ماعندي بيت
صعبه افراگه

=========ـ

- خيري الصفراني ✍️