#مکالمه_عروس_حضرت_زهرا_س_با_حضرت_قاسم_ع#چوخ_مصیبتدور_عم_اوغلی_درد_هجرانون_سنونقالمارام ئولّم الیمدن چیخسا دامانون سنون
هاله تک زلفون دوتوبدور دورهٔ قرص قمر
چون قمر عقربده دور ایله بوگون ترک سفر
بو فضای پر خطردن الحذر ایله حذر
رحم قیل اؤز جانیوه گئتسن گئدر جانون سنون
دامن وصلون الیمدن گئتسه الدن جان گئدر
داغ هجرانون مگر بو سینه دن آسان گئدر
هر قدم میدانه گئتدیقجا اورکدن قان گئدر
قورخورام توکسونله ناحق کوفیان قانون سنون
روزگاره گلمیوبدی من کیمی همدم سنه
سن منه هم مهربان دلداریسن من هم سنه
بیر نه یالقور مایلم من گوز تیکوب عالم سنه
هامّی گوزلردور گوزون قربانی حیرانون سنون
قویمادی دمساز اولاق بو گردش دوران دَمی
شادی وصلون دالینجا گلدی تئز هجران غمی
شعلهٔ آهیله یاندیرّام عم اوغلی عالمی
باتسا گر قانه بو زلف عنبر افشانون سنون
نو عروسم چون کی اوستومده گَلینلیق آدی وار
ایستمزدیم راز پنهانیم اولیدی آشکار
عشق اولان یرده ولی اولماز حیا و ننگ و عار
سرّیمی فاش ایلدی بو عشق پنهانون سنون
قلبیمی بیر قید آلوب چوخ اوندان اوتری مانعم
باشیمه قاره سالام مانع اولور اهل حرم
جامه ی الوان گییَم من نه روادور یابن عمّ
بیکفن میداندا قالسون جسم عریانون سنون
بو دلیله بسکه داماده عروس ائتدی گِله
آغلیوب دلدن دوشوب داماد او دم گلدی دِله
سویلدی بو دللرین تأثیری وار بالله دِله
قلبیمی یاندیردی بالله آه و افغانون سنون
آغلاما آغلار گوزون قربانی بو جانیم منیم
چاره سیز درده نه چاره یوخدی درمانیم منیم
راضیم سینمدن آخسون چشمه تک قانیم منیم
آخماسون بیر قطره اشگ چشم گریانون سنون
تشنه لب جان وئرماق آسان سندن آیریلماق چتین
سندن آرتوقدور منه تأثیری درد فرقتین
هر سوزون وار ایمدی دئ بیر ساعت اولماز فرصتین
گئتملی اولدوم وارام بیر لحظه مهمانون سنون
نامراد اولدوم جهاندا وئرمدی مهلت اجل
ایلرم ایمدی وصیّت حفظ قیل ایله عمل
بیردم آیریلما آنامدان دامنیندن چکمه ال
خاطروندن چیخماسون بو عهد و پیمانون سنون
سالما شال قرمزی مندن صورا سن باشیوا
سن منی یاد ایله هر وقت آغلاسان قارداشیوا
دردیم آرتار آغلاما باخدوقجا بو گوز یاشیوا
جانیمه سالدی شراره آه و افغانون سنون
هئچ منیم تک اولمادی ناکام ئولن داماد عروس
یا سنون تک حجلهٔ عیشی اولا بَرباد عروس
هم منه ظلم اولدی بالله هم سنه بیداد عروس
خالق ائتسون شمریله محشرده دیوانون سنون
یاحسین عمروم توکَندی حسرت دیداریله
قسمت ایله بو(حقیره) تا گلن زوّاریله
روضهٔ پر نوریوه حاضر اولاق حضّاریله
ایلیاق شوط رواق و صحن و ایوانون سنون