#خروج_از_مکه#محمدحنفیه #راز_و_نیاز#قتلگاه#مرحوم_عبدی_قراملکیبخش ۱
او گونکه مکّه ده زهرا عزیزی میرِ عمیم
عُدولِ عُمره ایده حجّینی دوتوب تصمیم
گوروبدی توطئهء خصمی سَرورِ آفاق
مصمّم اولدی اولا عازمِ دیارِ عراق
بلوب همینکه محمّد قضیّه نی فورا"
حضورِ سیّدِ بطحایه گلدی طاقتی طاق
فدا اولوم سنه عرض ایلدی بویور قارداش
وصال وقتی ندن ایلوسن خیالِ فراق؟
طواف وقتیدی بیت اللّهه گلور حجّاج
تعجّبم بیله موقع ندور بو کوچ ایتماق
اگر بو امره مُسَبَّبدی خصم ، مکّه ده قال
خلایقه بو یری دارِ امن ایدوب خلّاق
خطیرور منه فرمایش ایتدی دارُالامان
اولوبدی قتلیمه آماده فرقهء فَسّاق
مصمّم اولموشام عزمِ دیارِ کوفه ایدم
عراق مُلکینه قارداش گرک گیدم بو ایاق
محمّدِ حنفیّه بو سوزده عرض ایتدی
که ای اولان هامی آفاقه علّتِ ارزاق
عراقه ممکن اگر اولسا گیتمه ، گیت یمنه
اقامت ایله یمنده ، او شهرلرده فواق
فدا اولوم سنه بیعت شکندی کوفه لیلر
نشان ویروبله یازان نامه لرده گر چه وِفاق
قتیل تشنه ایدر کوفه اهلی مهمانی
ویرر تنوریده یر کوفیان ، چاغورسا قوناق
آچوبدی دُرّ دهانین کانّه او دُر نثار
دوباره اولدی شکفته مثالِ غنچه دوداق
بویوردی بو گجه گیت ، فکر ایدوم صباح اولسون
نه اولدی فکر دیسون اشگیله بو دیده دِهاق
گیدوب صباح گلوب بیلمورم نه حالیله
یتوب نه گوردی محمّد که باغلانوب اوساق
اولوب کجاوه نشین بانوانِ مُلکِ حجاز
کجاوه دامنی مه رولره اولوبدی محاق
دئدی حسینه دئدون فکر ایدوم نه فکر ایتدون؟
ندور سبب ایدوسن ترک کعبه نی بو سیاق
بویوردی جدّیمی گوردوم من حالِ رؤیاده
دئدیم نه حالیدیم ای بابا گوزوندن ایراق
باخوبدی حالیمه دولدوردی هر ایکی گوزینی
نثار صورتینه ایتدی گوهرِ اَعلاق
بویوردی حق ، سنی ایستیوب اوغول شهید اولاسان
وجودِ پاکین اولا ظلمه غلافِ یَراق
بو امر ، امرِ خدادی محمّد عرض ایتدی
بو سوز بو امریده مختومیدور لب و مِعلاق
ولی بناتِ رسولِ خدانی سالما چوله
اماندی گیتسن اوزون گیت آپارما عورت اوشاق
بویوردی بو سَفره زینبیمده گیتملیدور
بو طرز باغلانوب اوّلده ایتدیقیم میثاق
بو سرخ نهضته منله شریکِ اعظمدور
چکر دمشقه باجیم زینبی گروهِ شقاق
ایله بو سوزده محمّد چکوبدی دلدن آه
قاتوبدی خونِ دله اشگینی بو محنتی شاق
آچوبدی قارداشینون بوینونا سالوبدی قولون
اولوبدی هر ایکی قارداش بیری بیریله عِناق
همین بو حالیده غم کاروانی یولّاندی
که صادر ایلدی امرِ رحیلی حقّه تیاق
طوافِ کعبهء آماله باغلانوب احرام
وصاله عاشقِ شوریده سر اولوب مشتاق
کمالِ شوقیله بیتِ خدانی ترک ایتدی
یانیندا جان به کف و صف شکن وفالی رِفاق
وفایه باخ ، نجه گور باوفادی انصاری
ویروب اوز عورتینه نچه سی گلنده طلاق
ایدوبدی طیّ مراحل او کاروان نچه گون
یتوبدی بیر یره القصّه راهیانِ عراق
دیوب بو حینیده اصحابیدن بیری تکبیر
دَلیلینی خبر آلدی او میرِ هفت رواق
جواب ویردی که واردی قباقدا نخلستان
تعجّبوم اودی تکبیریمه اولان مصداق
بو یولدان ایلمیشم من مسافرت کرّات
بو نخل زاری ندن گورمیوب گوزوم اَسباق
بویوردی نیزه دیلر باخ کمالِ دقّتیله
قشوندی بحرِ ضلالتده ایتمیش استغراق
گورون اگر بو یاخون یرده واردی بیر منزل
ایداخ مقرّ ملاقاتِ دشمنه اُتراق
غرض او قافله بیر یرده ایلیوبدی نزول
یتیشدی مین نفر حرّیله اهلِ کفر و نفاق
ایله سوسوزلیقا دوشموشدوله قریبُ الحال
هلاک اولا سوسوزرندان گروهِ پست مذاق
عزیزِ فاطمه ده لطفه باخ ، کرامته باخ
او جانی دشمنینه گور نجه ایدوب ارفاق
بیوردی لشگرِ حرّون سپاهینه سو ویرون
منیم علیه مه گر چه بولار اولوبدی تفاق
دییر که راوی سوسوزدان ایتوردوم اوز اوزومی
ایچنمدیم سویی ، بو امر اولدی چوخ مَشّاق
دوتوبدی مشکی او حضرت منی ایدوب سیراب
ویروبدی عالمه بیر درسِ مردمی بو سیاق
گوروم بو دارِ مُدَوَّر مداریدن دوشسون
ولایت اهلینی ناکام ایدوبدی ، رزّاق
همین محبّته گور بیر نجه ایدوبله عوض
امامِ کون و مکانه اولوب رعیّتی عاق
سویون یولون سو ویرن شخصه باغلادی اشرار
اولوبدی اوغلونا تحریم ، اولان آنایه صداق
قالوبدی اوچ گجه گوندوز او شاه لب تشنه
سولوب سولار نجه گل شاخه سینده گل یپراق
باخاردی حسرتیله گوزلری فراته طرف
او حالِ زارینه آغلاردی حضرتِ اسحاق
دوشوبدی کشتی حق ، بحرِ غمده طوفانه
یاخوندی نوحِ دیارِ بلا اولا اِغراق
ادامه دارد
🔽🔽🔽https://telegram.me/ganjine5