بو قدر آغلاما ای گوزلریم ضیاسی علی
او آغلین گوزوون اولسون باجون فداسی علی
مریضه ام ، منی بو حالیله قویوب گیتمه
ترحُم ائت منِ بیماره حق رضاسی علی
آنام ئولوبدی ، اوزوم ناخوشام ، غمیم چوخدور
شکسته دل اولی قیز ، اولماسا آناسی علی
خوشا رباب و سکینه ، رقیه نون گونینه
یانیندادور اولارین مهربان آناسی علی
تصوّر ایله نولور بیر مرضیه نون حالی
قالا تک ایوده گیده قوم و اقرباسی علی
عمولر ، عمه لر ، هم آتام هامی گیدیسوز
نجه اوجالماسین عرشه ، باجون نواسی علی
سنون مُفارقتون غصّه مرگ ایدر ئولّم
سن اولماسان باجیوین خوار اولار عزاسی علی
شفا امیدی ، نجه بیر مریضه ویرماخ اولور
که غصّه و غم اولا شربت و غذاسی علی
سپاهِ محنت و اندوه فوج فوج گلور
آچوبدی باشیمون اوستونده غم لواسی علی
جمالون آئینه سی گوسترور منِ زاره
نه دور سنون بو سفرده باشون بلاسی علی
ایشتمیشم بویوراردی پیمبرِ صادق
حسین ، اوغلومون حتمیدی کربلاسی علی
یخالّا قولسوز علمدارینی ، یاتار علمی
جهانی دولدوری فریاد وا اخاسی علی
او یرده قاسمه بیر طوی دوتار که دامادین
اولور باشیندان آخان قانی طوی حناسی علی
دیینده دشمنه هل من ناصر ینصرنی
گوی اهلینی گتورور درده ، التجاسی علی
علیله فاطمه اولدی علیله هم آغوش
او قدر آغلادیلار دوشدولر یره بیهوش
سو سپدی جاریه لر ، باجی قارداشین یوزینه
دوباره هر ایکیسی گلدی غشّدن اوزونه
وداع ایلدی صغرانی ، شبیهِ پیمبر
حرامسرایه قویوب یوز گوزونده اشکِ بصر
یتیشدی گوردی مهیّا اولوبدی محمللر
سوار اولماقا لیلی ، علی یولین گوزلر
کجاوه لرده حرم لر هامی دوتوبدی قرار
بتول نائبه سی زینب اولمیوبدی سوار
خیالی اولدی خانم عمّه سین سوار ایلسون
بو خدمتیله مباهات و افتخار ایلسون
دئدی ای عمه منی قوم ایچینده ممتاز ائت
منیم الیمله سوار اول ، منی سرفراز ائت
دونوب صاقا صولا بیر باخدی بِنتِ مرضییّن
بویوردی هاردادی بس قارداشیم امامِ حسین؟
گلوب اوزی منی تختِ روانه میندیرسون
مقام و شأنیمی عالملره بولوندورسون
امامِ کون و مکانه عیانیدی مطلب
ندور بو باره ده مکنونِ خاطرِ زینب
اوزون یتوردی شتابیله نازلی خواهرینه
نوازش ایلدی قائم مقامِ مادرینه
دئدی نه خواهشون اولسا باجی گوزوم اوسته
میننده محملِ زرتاره ، گل دیزیم اوسته
جلال و شوکتیله شاهِ آسمان و زمین
مدینه ده ایلدی زینبی کجاوه نشین
بو یرده آتشِ غم اولوبدی شعله ور دلده
آخوب گوزوم یاشی خامه سیزیلدادی الده
مجسّم اولدی گوزیمده بو غم کشیده خانم
بلا چولینده اولان قامتی خمیده خانم
او گونکه غارته گیتدی جلالی قارداشینون
سویولدی دشمن الینده عیالی قارداشنون
نظرده ایله مجسّم او پوزقون احوالی
یغار نه نوعی بیر عورت او قدر اطفالی؟
یغنجا بیر یره خوردا اوشاقلاری چولدن
او قدر رنج و مشقت چکوب دوشوب دلدن
یانیق چادلاری بند ایلدی بیری بیرینه
تهیّه ایلدی بیر خیمه گاه اوزلرینه
آلوب کناره هشتاده دین ، عزیزی ئولن
بش آلتی ساعتین عرضینده قامتی بوکولن
او هولناک بیاباندا تیره چادرده
نجه گیچیندیله ؟ ایتمز خطور خاطرده
گجه او خیمه ده الله بولور نه حالتیدی
کمالِ نقصیدی ظلمه دیسم قیامتیدی
فراش ، ریگِ بیابان ، چراغ شعلهء آه
طعام ، خونِ جگر ، نوحه خوان صدای سپاه
گجه گیچوب سحر اولدی ، یتیشدی وقتِ زوال
قوتولدی دفنِ ملاعندن ، او سپاهِ ضلال
اراده ایلدیلر شهرِ کوفیه گیده لر
پبمبر عترتینی ظلمیله اسیر ایده لر
ایدوبله ظلملرین ظاهر اهلِ آفاقه
گتوردولر نچه عریان مهارسیز ناقه
معیّن ایلدی سعد اوغلی بیر نچه مأمور
سوار ایتماقا ایتسونله زینبی مجبور
دایاندی خیمه قباقینده ابنِ ذالجوشن
شماتتیله دئدی زینبه ، گوزین روشن...
#طوری