#مرحوم_استاد_خوندل (مرحوم استاد حاج حیدر شبگرد)
#حضرت_زهرا_س#اسما #مقداد #ثانیبخش ۱
او گونکه سالدی مرض التهابه زهرانی
چاغوردی محضره بنتِ عمیس اسمانی
بیوردی حالیمی من اوزگه حالیله گورورم
یاخونلاشوبدی که ترک ایلیم بو دنیانی
عم اوغلومون اورگین یاندیرام فراقیمیله
گیدم، او لمس ایلیه بازتابِ هجرانی
یقین بو پهلوی مجروح و سینهء خونین
چکر قدم به قدم پای قبره زهرانی
بو سخت مرحله ده سندن انتظاریم وار
که جابجا ایده سن ایتدیقیم وصایانی
دئدیم خانم نه سوزون وار منه بیان ایله
اوامرون ندی، ایسته او امره اجرانی
سولان جمالیله اوّل او گل شکفته لنوب
تبّسمی منه اولدی رضایت اعلانی
علاوه گوردوم آچیلدی او نرگسِ مخمور
ایدوب منیم یوزیمه بیر نگاهِ روحانی
دئدی سو ایله تدارک من ایلیوم بیر غسل
نظافت اوسته دی شرعِ منیر بنیانی
گتور لباس، ایدوم بو لباسیمی تعویض
بو کوینگه قولومون سینمون دگوب قانی
علاوه بستریمی رو به قبله سال که آتام
ایدوبدی کعبیه معطوف هر مسلمانی
تلاش ایله منی اوز بستریمده راحت ایله
یاخنلاشوبدی ملاقاتِ حیّ سبحانی
صورا او حالیده بیر پرده سال منیم یوزومه
سوروشما سرّینی، سن بولمه سن بو ایمانی
اوزونده ترک ایله بو منزلی قالوم تنها
بو امری ایلیوب ایجاب امرِ رحمانی
قاپونی باغلا دایان پشتِ درده منتظر اول
او قدر من یتوروم انتهایه نجوانی
همینکه گوردون او صحبت قوتولدی سس یاتدی
کسیلدی سوزلریم اجرا ایله بو فرمانی
دایانما سرعتیله داخل اول بو منزله تا
او که گرک گورسن وار او لحظه امکانی
کنار ایله او همان حائلی منی سسله
جواب ویرسم اگر یوخدی غصّه برهانی
اگر دانیشمادیم اوندا عم اوغلوما خبر ائت
دئ گَل اولوبدی بتولین زمانِ فقدانی
بنا به امرِ خانم من او بزمی ترک ایلدیم
دایاندیم اوردا که تعقیب ایدم قضایانی
قاپی دالیندا بیر آز صبر ایدوب قولاق ویردیم
بیر آز دانیشدی دانیشدی بتول، عرفانی
سسین دانیشدی ایشتدیم، بولنمدیم نه دیور
محال امریدی من درک ایدم او معنانی
نلر دانیشدی کیمیله دانیشدی آنلامادیم
او دردِ دل نه ده اولسیدی اولدی پایانی
همینکه صحبتی قطع اولدی سس کسیلدی دئدیم
یقین فراقینه یاندوردی آلِ طاهانی
اوزی که امر ایلمیشدی او منزله گلدیم
چکم کناره حجابِ جمالِ جانانی
او دم که پرده نی ردّ ایلدیم جمالیندن
بیر آیری جلوه ده گوردوم او ماه سیمانی
گوزین یوموب، آغاروب رنگی اوزگه حالیده دور
جمالینه داغیلوب زلفِ عنبر افشانی
او ماه صورته آغ توکلری ووروب هاله
چکوب خسوفه او هاله مهِ درخشانی
او گل عذاریدن آغ توکلری کنار ایلدیم
ایدم دویونجا او مه طلعته تماشانی
اولار که زلفینون آلتیندا زیرِ معجردن
نهانیدی نچه مدّت، اولوب نمایانی
نجه دیوم که نلر گورموشم او گُل یوزده
دوتوب فروغینی مِهرین حجابِ ظلمانی
دل اهلی آنلار اوزی وار سوزون نه ایهامی
لزومی یوخدی ایدم من او رمزه افشانی
اوچ آیدان آرتوقیدی مدّتِ جسارتدن
گینه حجابیده گوردوم او ماهِ تابانی
بو نیّتیله که شاید او سخت مرحله ده
دانیشدیرام لبِ لعلِ بتولِ عذرانی
نقدر سسلدیم ایتدیم سؤال دیندیردیم
جواب ویرمدی اولدوم او وضع حیرانی
دئدیم گیدیم آپاروم مرتضایه بو خبری
بتول ایتدی مزیّن بهشتِ رضوانی
بنا به امرِ خانم سرعتیله گلدیم من
ایدم قضیّه دن آگه علیّ اعلانی
دییَم یوبانما آقا منزله شتابیله گل
که قلبون اولمیه تأخیریون پشیمانی
امام روضهء پیغمبره مشرّفیدی
ایدردی حمد و ثنای خدای یکتانی
کمالِ شرمیله عرض ایلدیم که یا مولا
بتول ایتدی عزادار اهلِ غبرانی
امام ایشیتدی که زهرانی حالی پوزقوندی
پوزولدی فاطمه تک حالتِ پریشانی
نقدر سختیدی یا رب بتولین آیریلیقی
گورون نه حالته سالدی او صبره دریانی
بو نیّتیله که درک ایلسون او ماه وَشی
دوروب ایاقه یخیلدی او شیرِ یزدانی
دوباره دوردی ایاقه شکسته حالیله
ایدوبدی عزم او دم دودمانِ والانی
گلوب نه گوردی که زهرانی رو به قبله یاتوب
کسوب علاقه بدندن قوای جسمانی
بولنمورم که نه حاله قالوب گورنده علی
او تند بادیله خاموش شمعِ سوزانی
نه حسّ و نه حرکت وار نه بیر ادای کلام
نه لبلرینده او لبخندِ نازِ انسانی
فقط اباذریدی دعوت ایلدی مولا
او سخت مرحله ده اولدی علینون اعوانی
بو مطلبین بو فرازی قاباقدا چوخ یازیلیب
قلم ایدر اورا معطوف هر نواخوانی
بیر آیری مطلب ایدوب فکریمی مشغول
اگر رفیق اولا توفیقِ حیّ سبحانی
ادامه دارد
🔽🔽🔽@ganjine5