🌺 نویسنده و ویرایش کننده از : جناب آقای بهروز کریمی
🌺عاشق عالمده گَرک ، جان بَذل اِئده جانانینه
ئُولمسه جانان یولوندا ، نقصدور پیمانینه
عشق بیر اُوددور ، دوشه جانه ، ئُولونجه یاندورار
بو اُودا ، عاشق یانار ، اِئتمز گِله جانانینه
انتظامِ عشقدور ، بلبل گُلون نازین چَکَر
عشق معناسین یازار اَشگیله گُلستانینه
عشقیدن دی ، ناره پروانه اُوزون دائم وورار
شمعه یاندوقجا ، سَپَر سو ، اُوز دِلِ سوزانینه
شور عشقُ الله باشندا ، چوخ چکوب یوسف بلا
مِصرده ، آخر زلیخانون دوشوب زندانینه
عشقِ شیرین ، ایچدیروب ، فرهاده صَبرین باده َسین
بیستون داغین قازوب ، عشقین باخوب پایانینه
بیر ایتین ، مجنون ایاقیندن اُوپوب، فخر ایلدی
سویلدی: بو ایت قویوب یوز، لیلی آسِتانینه
شیخِ صَنعان ، چَکمیوبدور دُخترِ تَرسادن اَل
وامِقَه ، عشقنده عُذرانون ، دوشوب اُود جانینه
چوخ گلوب عاشق بو دنیایه ، هامی عالم بولور
عشقیله ، عشقین هَره ، پایان وِئروب دورانینه
ایستسن امّا وفالی عاشق عالَمده اگر
باخ خلیلِ کربلانون ، بو قوزی قربانینه
گُور نجه بازارِ عشقه ، قُویدی اُوز جان نقدینی
مرحبا شش ماهه طفلین عشقینه ایمانینه
اوندا که قالموشدی یالقوز رَزمگَهده ، شاهِ دین
سَسلَنوب: هَل مِن مُعین ، غم اُود ووروب اَرکانینه
تا زبانِ بی زبانیلهز، بو طِفلِ شیرخوار
سَسلَنوب: لَبّیک ، حسینون سَس وِئروب فرمانینه
یعنی منده حاضرم ، دینه اِئدَم نُصرت بابا
عاشق عالمده گَرک ایفاء اِئده پیمانینه
عاشقِ جانباز ، دین اوسته گَرک قانه باتا
رَشگ اِئده عُشّاق عالَم ، مَنصَب شایانینه
پوزقون حالیله اِئله بیر مَنظَره وِئردی نشان
سالدی شور و وَلوَله ، مِهر و وَفا کاشانینه
آغلیوب ، آغلاتدی یِکسَر اهلِ بیت عِصمتی
یاندی هر کس که باخوبدور ، دیدهء گِریانینه
اصغرین حالی پوزوبدی ، زینبین احوالینی
آهی آه اوستَن چَکوب ، اَشگین تُوکوب دامانینه
سَسلدی آغلار گُوزیله ، ای کُمک سیز شهریار
گَل نَظَر قیل چَرخِ عشقین کُوکَبِ رَخشانینه
سَسلیَنده رزمگهده ، سن حسین هل من معین
بو بالا تغییر وِئردی ناله و اَفغانینه
تا اُوزون گَهواره َدن سالدی یِره بو صوداَمَر
چون محبّت شعله سی ، دوشدی دلِ ویرانینه
گَل آپار ایچسون محبّت جامینی ، تاپسون بَقاء
رَشگ اِئده عاشق لَر هَر آن ، عشقِ جاویدانینه
خیمیه گَلدی حسین ، زینب گَتوردی تا اُوزی
صوداَمَر سربازی وِئردی کربلا سلطانینه
آلدی زینبدن ، خلیلِ عشق ، دیلسیز فدیه َ سین
تا قوزی قربانینی گَتدی ئُولوم میدانینه
سَسلَنوب لشگر ، منم حامیّ دین ، سلطانِ عشق
من گَرک صورت وِئرَم عشقین سَر و سامانینه
بیر اَلیمده صوداَمَر ، بیر اَلده قرآن گَلموشم
یا باخون بو طِفله ، سیز یا جَدّیمون قرآنینه
یا آلون بو شیرخواری ایلیون سیراب اُوزوز
یا وِئرین سو ، گَنجِ عشقین لُوءلُوءِ مَرجانینه
قویمویوبلا وِئرسون اِتمامه سُوزون ،
بی کَس حسین
سیز باخون بو قُومِ پَستین ، غیرت و وجدانینه
ظلمه باخ، سو ایستَدی سلطان دین ، امّا نجه
وِئردی اَعدا سو حسینون اصغرِ عطشانینه
حرمله بو آلتی آیلیق طفلی سیراب ایلدی
گُل بوغازی تا هدف اولدی جفا پیکانینه
اوخ دَگَنده دیسگنوب قان ایچره چالدی اَل اَیاق
مرغِ روحی ایلدی پرواز آشیانینه
آخدی اولدوز تَک ، باشین قُویدی او داغلی سینیه
شاهِ دین یاندی ، باخاندا غُنچهء خندانینه
اُوجونا دُولدوردی قانین ، سَپدی بیر گُوی سَمتینه
بعد از آن ، یاخدی اُو قانی ، زُلفونون هر یانینه
اِئتدی فرمایش: خدایا شاهد اُول ، اِیله نَظَر
مَخزَنِ مِهر و وَفانون ، گُوهَرِ غَلطانینه
گُوردی یوخدی اَللَری اُوستَن آلان قربانینی
یوز دوتوب ، آغلار گُوزیله ، باوفا اَعوانینه
سَسلَدی اَوّل علی اکبری ، دور گُور اوغول
صوداَمَر قاراشوین، باخ اُونّوکِ اَلوانینه
تا صُورا ، نهرِ فرات اوسته دوتوب یوز ، سَسلَنوب
دور اَخا ، گُور بیر نجه ، باتدی بالام اُوز قانینه
تیرِ ظلمیله بالام اُوخلاندی ، یاندیم دینمدیم
ساخلادیم بو انتقامی حَشرَه ، حَقّ دیوانینه
#اعظمی یازدون اگر چه بولمدون مطلب نَدور
پِی آپار ، هر آن یازاندا ، مطلبین عنوانینه.
#حضرت_علی_اصغر_عمرحوم حاج بیوک
#اعظمی_تبریزیالتماس دعای فرج