اليوم وأنا راجع من سوق القات وكيس القات في يدي جالس اقلبهن وابسر كيفهن .. اشتي أدري هل المقوت برمني والا انا برمته..
المهم وصلت لاما قدنا قريب البيت.. دخلت من حارة قلت علاسب أختصر الطريق.. وكانت هذه الحارة ملان غنم بيرتعين .. وصاحبهن الراعي جالس طرف الحارة في مكان ظلال.. المهم جزعت وأخترقت ذلك القطيع وأنا سارح في علم الله جالس أفكر بعمق في مستقبلي..
مريت من وسط الغنم وأنا منهمك في التفكير.. مادريت الا حين سمعت صوت هرولة قادمة من الخلف وضربة قووية في أسفل ظهري هكذا بببمممم لاما اشتل حقي العصب العصعصي! و انبطحت أرضاً وانا الذي لاينبطح الا وسط معركة ملحمية دامية !
قمت تلفلفت بسرعة وماناش داري ايشوه هذا الذي صرعني هذه الصرعة بكلها ! احترفت ابسر وانوه طلي ضخم أسود اللون! وعادوه بيرجع ريوس ابن الكلب يشتي ينطحني مرة ثانية !! والراعي كان يصيح لي من طرف الشارع ويطلق بعض التحذيرات اللازمة للخلاص من هذا الطلي الغاضب..
ابسرته بيرجع ريوس وأنا قررت اواجهه.. لإن في هذه الحالة لو هربت ولقيت ظهري للطلي مابلا يزيد ينطحني مرة ثانية.. وقفت مكاني بكل ثبات.. والطلي انطلق نحوي بسرعة عالية .. وهنا ترددت كيف اتصدى له بطريقة صحيحة.. قلت لو قمت تصديت له براسي واتناطحت انا وياه روس مابلا يوقع عندي ارتجاج في المخ!! أما الطلي لن يصاب بأي ضرر لإن دماغه محاط بمادة هلامية تمتص الصدمات القوية !! @omnnoقلت خلاص..شاتصدى له برجلي..لكن خفت لا ينبع ويوصل ينطحني في بطني لاما يشابك لي الأمعاء!!
قلت خلاص.. الحل الأنسب هو ان اتصدى له بالثنتين الأيدي..بنفس الطريقة ذي تصدى بها سامي للرمية الملتهبة.. المهم استعديت واتخيلت رأس الطلي كرة قدم وانا حارس المرمى.. وصل الطلي قفز قفزة قوية لاحد ان جمجمته كانت مقابلة لجمجمتي تماماً!! وأنا نبعت وان قد احنا الإثنين بنطير في الهواء .. أنا والطلي.. ساع الحلقة حق الكابتن ماجد! @omnnoالمهم باغت الطلي بحركة سريعة.. وصلت دغشته برقبته بالثنتين الأيدي وخنقته بقوووة لاما خليته يفقد الوعي ويقل : هوه هوه .. هوه هوه !! وانبطحت انا وياه ارضاً وكنا نتفاحر ساع حق الأفلام.. يعني شويه افحره وشويه ويفحرني.. وهكذا.. لاما في الأخير ثبته تحتي وكنت اخنقه بقوه وهو كان يحاول يتخلص!! وفجأة مادريت الا حين مد يده دلا لاتحت ثربته وخرج مسدس هههههه وطرحه لي في رأسي وقال : انتهت اللعبة.. قوود باي..وبدأ يضغط على الزناط وانا غمضت !! قلت خلاص نهايتي.. بس مادريت الا بالراعي وصل زبط المسدس بحركة بهلوانية من يد الطلي وضربه في رأسه بالعصا لما دوخ!! @omnnoوانتهى الفيلم .. ههههههه عموماً والله العظيم انوه نطحني طلي صدق.. بس حبيت اكتب لكم القصة علىشكل فلم أكشن..
النكبه لما واحد يجي بالعيد يسلم عليك ويسرد عليك الشريط كله (السلام عليكم عيد مبارك وكل عام وانت بخير ومن العايدين الفايزين الغانمين وإن شاء الله حريو ) ما تدري أيش ترد عليه ترجع تقول له .. سابر. ههههههههههههههههههههههههههههههه🐸
