​​ТОНГ ҚАЧОН ОТГАНДИ? Тунга етибман, Тунгоҳ излаб дили хунга етибман. Тонгни қарши олган бўз йигит қани? Водариғ, бир кунда қариб кетибман. Водариғ, сочимга тушдими шудринг, Чил-чил бўлди қадаҳ, титрар қўлларим. Тонгда юрагимни куйдирган чўғнинг, Туннинг тул товуғи титар кулларин. Тонг қачон отганди? Тунинг қўйнида Менинг тамакимни чекаётган ким? Менинг бўйинбоғим кимнинг бўйнида? Бу қандай чол бўлди, менинг кўзларим, Менинг қўпол бурним бурни ўрнида, Кўнглида сир сақлаб юрган сўзларим. Бу сўзлар қиличдир, аммо қинидан Чиқмасдан қабрга киргай, дўстларим. Нега менинг пальтом унинг эгнида, Қандай гуноҳкор у, бунча бўзлайди? Тонг қачон отганди? Тонг қачон отганди? Шўрлик тун бўйи, Ёлиз шу саволга жавоб излайди. Бек АЛИ