*** Ohista qoʼnadi sochlarimga qor, Ohista qoʼnadi koʼnglimga hadik: Biz mitti muhabbat bilan taqdirning, Ulkan qarichiga sigʻmagan edik. Irgʼitib yubordi bizlarni dunyo, Oʼzidan nariga, toledan, baxtdan. Haddan tashqarida edi tuygʻular, Endi ayriliqlar muvozanatda. Chap koʼksim toʻladi sadaqalarga, Loʼli ilkidagi xurjunga oʼxshash. Hammani mensimay kelgan dunyoni Qo'limdan kelyapti mensimay yashash... Shu asno ko'nglimga moʼralar ko'klam, Gullari ayoz-la qiladilar jang. Lek uni tark etmas iztirob, alam- Oqlikka aylanar yana turfa rang. Osilgan arosat dori yonida, Qatlga shaylangan hislarim qator. Bahordan ulugʻvor, bahordan gʻolib - Ohista qoʼnadi sochlarimga qor! Aziza SHOKIROVA @AzizaShokirova