عصر دلفان

بوری تا لشکرِ خم شهره در کِیم
وه دنگ سازی ولاتی با خَوَر کِیم
بپیچیمن وه گرد بادِ شَمالان
بوری تا باخ و بوسان پر ثمر کِیم
خُوا ار زعمِ یَک پاشین چه فایده
کمی سیفا ارا داخِ جگر کیم
بوری ملحم بنیمَر زعملِ  یَک
خصه اژ سویکِ سینه دروه در کیم
مزونم بی خیالی وی زمانه
فره سخته، ولی شق القمر کیم
دو روژِ زندگی ارزش یه نئری
وه کردارِ گنی دوسی پکر کیم
بوری کاری بکیم صدکار بِهرزی
کلنگ مالی اگر هس، تاجِ سر کیم
طمارزو دل قبادی عی گَپَسه
لکِسانی پر اژ علم و هنر کیم

#اردشیر_قبادی
#شعر_لکی
@asredelfan

زندگی لیژی یا بناری که
یا کُچک کوعه یا هماری که
یا ترش و شیرین چوی اناری که
یه روژ تله چوی ژهر ماری که
یه روژ سرد و سِرّ چوی یخ بنانه
یه گِل رنگای رنگ چوی وهارانه
زندگی فرصت بی مجالی که
یا نفسی عه وا شَمالی که
یا گه عه هوس خط و خالی که
قولی لکه میر قیل و قالی که
یه روژ تم توز چوی سویر شیطانه
یه گل رنگای رنگ چوی وهارانه
زندگی تومه اَر چالیه مشت
اول چِکِره ایگل ماوه کشت
باید بسازین خشت اَر بانِ خشت
گهی پشت به زین گهی زین به پشت
یه روژ پاپتی اَر بیاوانه
یه گل رنگای رنگ چوی وهارانه

#اردشیر_قبادی
#شعر_لکی
@asredelfan