عصر دلفان

💫کِلِ ژاری 💫

سِتَم تا کِئ راوا دیری ،وه ناحق گیون سَنِن تا کِئ ؟

مِدوم هر گیونَه سَر کِردِن ،مِدوم هر گیون کَنِن تا کِئ؟

هَماری وه هُمالداری ،وه سیلی روئ وِژم سویر کِرد

کُچِک وَر دالِ چیئم تو بیین ،وه بِرژِنگ تیر شَنِن تا کِئ؟

چیئمم دِیر خو قِلا پیک بی ،یَسه هومسایَه سا وژمم

هونَه چوی دوره گرد دوریش ،وه در مالِت مَنِن تا کِئ؟

تَموم سازَل خوشیم اِشکو ،کِلِ ژاریم هموتَر دُویل


کُرِ دل جونَمرگ بی مِرد ،وه سازِ خَم ژَنِن تا کِئ ؟


نُلِق آیلِ دِلِم ایر نات ،کِز و کور هار هَلورکی خَم


وه مور ئَر سَر لَشِ آیل دل ،کَلیمَه خَم‌ خُونِن تا کِئ

چیئمت هیتلر ،دمت چنگیز ئو بالِ بِرژِنگت تیمور


و ظلمت ریشی ایرون و لهستان اُور کَنِن تا کِئ ؟


بچو ئَژ مِلکِ دل ناکَس ،سِتم تا کِئ راوا دیری ؟


و سیلی گیونه سَر کِردِن وه سیلی گیون کَنِن تا کِئ ؟


#مهدی_کیانی_برخورداری


@asredelfan

شعرلکی در وصف امام زمان
((( حضرت اباصالح المهدی )))

"تاگَه تو نای إ سَفَر ئَسِر چیئمِم سا نِماو"

وَختی جُمعَه مای هَنی داخِ دلِم تازَه ماو

دفترِ دل پَریشیمْ یِگِل هَنی وازَه ماو

منیشمَه شعر وِتِن تا خودِ صوئ مَگیرِم

هَر اخَسَه بِخُونمِت بيتِم پِر آوازَه ماو

مَر و دَمَه مدحِ تو ،بیت و مَتَل کشکَه کُل

خدا فقط قادِر ئَه بیونِ ای رازَه ماو

بختِم پِرَه أژ گِری وه دس کسی آ نِماو

تا گَه تو نای إ سفر ئَسِر چیئمِمم سا نِماو

بونگِ دِلِم برزَه هَم اورِ خَمَه ماواری

دلِم مَچو تا فِلَک دنگِ هاوار هاواری

صوئ وه سحر ئَر نِماز وِردِ زِوونمَه دُعات

یارِ سَفر کِردَه مِه أنی مِه کِه گلاری

دِلِت إ دس کی پِرَه نمای وژت نِشون دِی

تا چیئمَلِم پِر آو بو چوئ گُلَه اُور وِهاری

دویریِ تو بردیِه صبرِم و طاقَت و تاو

تاگَه تو نای إ سفر ئَسِر چیئمِم سا نِماو

تا کِئ چیئم ئَر دِراخِل ،تا کِئ دِلم کاوا بو

سایَه وِژت نشون دَه تا چیئمَلِم پِر آو بو

ساِمِرا و قُم گَپَه ،تو هاینِه کُل وِلاتی

دَسِت بِکیش إ سَرِم بَلکَم أریت ثواو بو

ای جمعَه چی نِهاتی هَنی چیئم ئَر دِراخِل

اخکَه مِه بوئمِه گِری تا چیئمَلِم خِراو بو

اگر إ داخِ دویریت هردِک چیئمِم بو خِراو

تاگَه تو نای إ سَفَر ئَسِر چیئمِم سا نِماو

#مهدی -کیانی-برخورداری

🌹🌹🌹🌹🌹🌹🌹🌹🌹
@asredelfan
🌺🌺🌺🌺🌺🌺🌺🌺🌺‌