" إِنِّي لَأَعْرِفُ أَسْمَاءَهُمْ وَأَسْمَاءَ آبَائِهِمْ وَأَلْوَانَ خُيُولِهِمْ هُمْ خَيْرُ فَوَارِسَ عَلَى ظَهْرِ الْأَرْضِ يَوْمَئِذٍ أَوْ مِنْ خَيْرِ فَوَارِسَ عَلَى ظَهْرِ الْأَرْضِ يَوْمَئِذٍ" فبعد ما الجيش يرجع للشام هيخرج الدجال فعلا ساعتها. ☆قبل ما نعرف مين هو الدجال في سؤال: المفروض إن المهدي هيكون عارف أحاديث رسول الله ﷺ وإن الدجال لسه مخرجش ليه بقى هيرجعوا ويبعتوا العشرة فوارس عشان يتأكدوا🤔 من الممكن إن المهدي أو المسلمين إللي معاه موصلهمش الأحاديث إللي بتتكلم عن صرخة الشيطان، أو ممكن إنه فعلا وصلته الأحاديث ولكنه نسيها وده وارد، احنا نفسنا بنعرف أحاديث رسول الله ﷺ وبننساها، ده غير كده إللي ربنا قدره لازم يحصل بأي طريقة، يعني مادام ربنا قدّر إن الشيطان هيصيح في المسلمين وإنهم هينخدعوا بكده فأكيد هيحصل لا محالة👌 إيه بقى قصة المسيح الدجال ده😁 المسيح الدجال هو رجل من بني آدم ربنا هيعطيه معجزات عشان يفتن بها بني آدم أو خلينا نقول يختبر بها بني آدم، وأعظم فتنة واختبار هيمر على بني آدم هي فتنة المسيح الدجال، حتى إن رسول الله ﷺ قال: "ما بين خلق آدم إلى قيام الساعة أمر أكبر من الدجال" وفي حديث تاني رسول الله ﷺ قال للصحابة إنه مش خايف عليهم غير من الدجال، وقال لهم لو الدجال خرج ورسول الله ﷺ لسه موجود فهو إللي هيتولى إقامة الحجة على الدجال وإظهار باطله، أما لو هو مش موجود فكل واحد مسؤول عن إقامة الحجة بنفسه، ودفع شر الدجال عن نفسه بنفسه، وربنا هيحفظ ويعين كل مسلم على الفتنة دي، قال رسول الله ﷺ: " غيرَ الدجال أخوَفني عليكم، إن يخرج وأنا فيكم فأنا حجِيجُه دونكم، وإن يخرج ولست فيكم، فامرؤٌ حجيج نفسه، والله خليفتي على كل مسلم" وكلمة المسيح بتُطلق على الصدّيق وعلى الكذاب إللي بيضل الناس، يعني المسيح عيسى ابن مريم الصدّيق ، مسيح الهدى ، يُبرِئ الأكمه والأبرص ، ويُحيِ الموتى بإذن الله، أما المسيح الدجال هو الكذاب إللي بيضل الناس ، مسيح الضلالة يفتن الناس بالآيات والخوارق إللي ربنا أعطاها له، زي إنزال المطر وإحياء الأرض بالنبات وغيرهما من الخوارق زي ما هنشوف بعدين، والمسيح الدجال سماه رسول مسيح لأن له عين ممسوحة، قال رسول الله ﷺ : " الدَّجَّالُ مَمْسُوحُ الْعَيْنِ" ☆ملحوظة مهمة: مفيش حاجة اسمها 《المسيخ》 الدجال، اللفظ الصحيح هو المسيح مش المسيخ، بعض الرواة عشان يعظموا عيسى عليه السلام ويفرقوا بينه وبين الدجال وضعوا النقطة على الحاء وقالوا إنه المسيخ، مع إن رسول الله ﷺ وضح وقال : "مسيحُ الضلالة" قال الحافظ ابن حجر : "من قرأه بالخاء المعجمة فقد صَحّف" يعني إللي يقول المسيخ يبقى قرأ الكلمة على غير صحتها. فمحدش يقول المسيخ الدجال، لكن نقول المسيح الدجال زي ما رسول الله ﷺ قال اسمه في الحديث👌 ومعنى كلمة الدجال هو المُمَوِّه الكذاب يعني إللي بيُكثِر من الكذب والتلبيس، ولفظ 《الدجال》بقت عَلم على المسيح الأعور الكذاب، والدجال اتسمى كده لأنه يغطي على الناس كُفْرَه بكذبه وتمويهه وتلبيسه عليهم، ولأن فتنة المسيح الدجال خطيرة وهي أعظم فتنة هتمر على البشرية فمفيش نبي من الأنبياء إلا وحذر قومه من الدجال، قال رسول الله ﷺ: "ما من نبي إلا أنذر قومه الدجال" ولأن أمة الإسلام هي آخر الأمم وهي إللي هيظهر فيها الدجال ربنا وضح لنا صفاته إللي بتميزه عن غيره عن طريق رسول الله ﷺ عشان الناس تعرفه ويحذروا من شره ومحدش ينخدع ولا يُفتن به، وقال لنا إزاي نحمي نفسنا منه، فاللي هيتبعه بعد كل ده هيبقى جاهل سبقت عليه الشِّقوة👌 ◇طيب إيه هي صفاته إللي رسول الله ﷺ قال عليها🤔 هو رجل شاب قصير وجهه أحمر ،أَفْحَج يعني يمشي مشية معيبة، وفيه عرج بسبب إن في تباعد ما بين ساقيه، عارفين إللي عنده تقوس في الساقين بيمشي إزاي، أهه تقريبا زي كده😅 شعره مُجعد كثيف، يعني زي ما بنقول شعره أَكرت وثقيل، وأقرع من مقدمة الرأس وصدره عريض، وعينه اليمنى ممسوحة وهي مش غائرة داخلة لجوة كده لكنها منتفخة وبارزة كأنها عنبة طافية، أما عينه اليسرى عليها ظَفرة غليظة يعني عليها جلدة غليظة تنبت عند حدقة العين يعني عينيه الاثنين معيبتان وفيهم عَور، ومكتوب بين عينيه " ك ف ر " بالحروف المقطعة ، أو "كافر" بدون تقطيع ، يقدر يقرأها كل مؤمن سواء بيعرف القراءة أو ميعرفش، ولا يقرأها الكافر حتى لو كان بيعرف يقرأ، لأن ربنا يجعل المؤمن يرى بعين بصيرته، فيخلق الله للمؤمن الإدراك من غير ما يتعلم ، ودي حاجة طبيعية في الزمن ده لأنه زمن تنخرق فيه العادات، ومن صفات الدجال إنه عقيم لا يُولد له، وهو ضخم وحجمه كبير، والصفات دي موجودة كلها في الأحاديث الصحيحة لرسول الله ﷺ، من الأحاديث دي قال رسول الله ﷺ: "إِنِّي قَدْ حَدَّثْتُكُمْ عَنْ الدَّجَّالِ حَتَّى خَشِيتُ أَنْ لا تَعْقِلُوا ، إِنَّ مَسِيحَ الدَّجَّالِ رَجُلٌ قَصِيرٌ أَفْحَجُ جَعْدٌ أَعْوَرُ مَطْمُوسُ الْعَيْنِ لَيْسَ بِنَاتِئَةٍ وَلا حَجْرَاءَ"