وفا ایرانشاهی:
🍒🍇🍒🍇🍒🍇🍒🍇🍒🍇رباعیات بختیاری وفا
مو کر لرم و نوم خوم فخر اکونم
گهپون ولاتمون هیدن تاج سرم
ز ئی قوم دلیر مرد و فرهنگ غنی
تجلیل اکونم و افتخاری ابرم
هر مرد لری و ملک خوس داره نظر
دون که تلاش و علم هو داره ثمر
باید بدونه که روز گاری بووس
وا جنگ ز ملک دشمنه کرده و در
قومی که ز عهد رودبانی منده
از کاسی و کیمری . کیانی منده
پیشینه کاری پیشدادی ز هونه
ئی قوم لره که جاودانی منده
کوروش که و جنگ ماد ن از پا وند
وا قدرت لر بید که بید قدرتمند
لوحی زگل پخته نوشت سی قوم لر
ئی خط های چوخام ز اوسه سیم مند
اسکندر مقدونی آود تا ایرون
هر شهر ن کرد وا قشونس ویرون
وا آریو برزه کوفتن اسکندر ن
لر جنگس و سی ولاتمون دادن جون
لر وا سورنا کراسوس و فیبوس کشت
نصمی ز اروپان گرهد ور مین مشت
اموال و اسیرونی آوردن سی ارد
از جنگ نکرد هیچ ور دشمن پشت
ارد پادشاه اشکانی
قومی که سرافراز زمون بیده و هید
وا علم و تلاش وجون فشون بیده و هید
وا حمله تاتار و مغول . ترک و عرب
جنگسته و نسل هو مصون بیده و هید
گهپون و اتابکون لر خوب بیدن
وا تیمور لنگ سالها جنگیدن
از کار هزار اسب و مردون رشید
نومی ها و جا که پاک و ری اسپیدن
وا جنگ تفنگ .یاور زند . لره
وا روس نبرد و بیده فرمند. لره
مشروطه گرون قدر لرون دونن
ملی و مبارز و هدفمند . لره
باوطاهر ن بانی فرهنگ بدون
از فرخی و رزم قدم خیر بخون
صمصام و اسد خون و علیمردون هم
وا ممد للری بیدن از شیرون
وا صنعت و علم سازگاره کر لر
پاک و قدر و سلسله داره کر لر
تاریخ سراسر ز هنو یاد اکونه
سی خاک ولات جون نثاره کر لر
تا افسر و پژمون و اوستا داریم
زرین کوب و قائد مین دنیا داریم
اسم لر و فرهنگ لری هید زنده
وا شعر« وفا »شهرت والا داریم
مندرج در « کتاب گذر طایفه ایرانشاهی از گدار تاریخ» اثر اینجانب
🍒🍇🍒🍇🍒🍇🍒🍇🍒🍇https://t.center/sherlori