rawêjîsm | ڕاوێژیسم

یاریزانی زار (لاعب النرد)

شیعر و خوێندنەوەی: #مەحموود_دەروێش
وە‌رگێڕان: پێشە‌نگ سە‌ركە‌وت
ئەنیمەیشنی: Nissmah Roshdy
مۆسیقا: Le Trio Joubran

تێبینی: ئەنیمەیشنی "The Dice Player" بەرهەمی "Nissmah Roshdy" براوەی خەڵاتی ساڵی ٢٠١٤ـی فیلم فستیڤاڵی شیعری "ZEBRA"ـیە لە بەرڵین.


@rawezhism

"خانمەکە بە پیاوەکەی وت"

"شەو مێژووی تامەزرۆییە و تۆش شەوی منی"
ئەمەت پێ وتم و جێتهێشتم
هەم شەوی من و هەم شەوی خۆتت بەساردی
بۆ جێهێشتم...
زستان و یادەوەرییەکانت ئازارم ئەدەن...
هەوای بۆندار بە بەرامەی گوڵەشلێرەکانی منیش
تۆ ئازار ئەدەن.
لێ چ باک!... ئەبێ
یەکەمین ڕێبوارم خوشبوێ
بۆ ژنێ بگری تووڕی دابێ
وەکو چۆن تۆ منت تووڕ دا
من و ئەو غەریبە، خەمی شەوی خۆمان ئەخۆین و ڕۆشنی ئەکەینەوە
ئەبەدییەتی بچووکی خۆمان چێ ئەکەین...
من و ئەو غەریبە... بە وردی پێخەف و هەستەکانی خۆمان هەڵئەبژێرین
لەوانەشە... من و ئەو غەریبە
پێکەوە ئەو شیعرە بڵێینەوە
کە تۆ پێشکەشی منت کرد:
"شەو مێژووی تامەزرۆییە و تۆش شەوی منیت"

✍🏻 #مەحموود_دەروێش
و: #ئازاد_بەرزنجی

@Rawezhism | #ڕاوێژیسم

"بۆ ئەوروپا کۆچ ئەکەن و بە یاساکانیانەوە پابەند ئەبن، وە جگەرەکەتان فڕێ نادەنە سەر زەوی و لە شوێنە تایبەت و گشتیەکاندا جگەرە ناکێشن، لە جادەکان ئەپەڕنەوە و ئەبنە خاوەن هەستێکی ئەمنی وا ئەگەر لە پێش پەنجەرەکەتان پشیلەیەکیش بدزرێت ئاگاداری پۆلیس ئەکەنەوە!. قایشی سەلامەتی ئەبەستن لەکاتی لێخوڕینی ئۆتۆمبیلدا، وە کورسیەک لە دواوە بۆ مناڵەکانتان دائەنێن، لە ڕیزدا ئەوەستن هەتا ئەگەر بگاتە کیلۆمەترێکیش، وە کاتێکیش دەبنە خاوەنی جنسیەی ئەوروپی نوێنەرەکانیشتان هەڵدەبژێرن، بەدوای مێژووی ڕابردوو و پسپۆڕیەکەیدا ئەگەڕێن.. ئەگەر هەموو ئەمانەتان لە وڵاتەکەی خۆتاندا بکردایە؛ نە گرووپە تاوانکارەکان ئەهاتن و نە هیچوپوچەکان دزیان لێ ئەکردن.."

#مەحموود_دەروێش | #ڕاوێژیسم
ژێدەر: ل.ف Nergiz Bookstore

@Rawezhism

“فیشەکی ڕەحمەت”

ئیرەیی بە ئەسپ ئەبەم: چونکە کاتێ قاچی ئەشکێ و
چیتر ناتوانێ بەناو "با"دا بێت و بچێ و
هەست بە سووکایەتی ئەکا...
بە فیشەکێکی ڕەحمەت تیماری ئەکەن.
منیش گەر شوێنێکم شکا
لە جەستەما... یا لە ڕۆحما
بەدوای بکوژێكی شارەزادا ئەگەڕێم
تەنانەت گەر دوژمنیشم بێ
کرێ و پارەی فیشەکەکەشی ئەدەمێ
هەم دەستی و هەم دەمانچەکەشی ماچ ئەکەم
گەر توانای نووسینیشم مابوو
بە شیعرێکی دانسقە ستایشی ئەکەم
شیعرێک... ئەو خۆی کێش و سەرواکەی بۆ دانێ.

✍🏻 #مەحموود_دەروێش
و: #ئازاد_بەرزنجی
▪️#ڕاوێژیسم

“Horses Never Lie” - dancer & choreographer: #CarolineRichardson
film by: #KathiProsser

@Rawezhism

باران ئەگەر ببارێ؛
ئەم زەیتوونانە تێرمان دەکەن باوکە؟
درەختە گڕ گرتووەکان
گۆرانی‌مان بۆ دەڵێنەوە باوکە؟
ڕووناکی مانگ ئەم هەموو بەفرە دەتاوێنێتەوە باوکە؟
سێبەرە ترسناکەکانی شەو ئاگر دەگرنەوە باوکە؟

من هەزار پرسیارم هەیە باوکە
هەزار هەزار پرسیار و
لە چاوەکانتدا بێ‌دەنگی بەردەکان دەبینم
وەڵامی پرسیارەکەم بدەرەوە باوکە...

باوکی من تۆ بووی
نەکا باوکم جێگای لەگەڵ خاچی‌سوور گۆڕی بێ؟

✍🏻 #مەحموود_دەروێش
▫️ و: #ئەمیر_سیراجەدین

📷 وێنەگر: #شاھۆ_دەوڵەتی
▪️ #ڕاوێژیسم

@Rawezhism

هەندێک هەن لە "زستان" دەچن، خۆشماندەوێن، بەڵام دەبنە هۆکاری نەخۆشبوونیشمان...!

شیعری: #مەحموود_دەروێش

گۆرانیبێژ: Ghalia Benali
ناوی گۆرانی: Ya Msafer

▫️ #ڕاوێژیسم

@Rawezhism

بەیرووت/ پاشنیوەڕۆ/ ئێستا/ پاش سبەی:
سروودێکی پاییزی
وێنەگەلێک لە ڕۆژاوا
سێبەری ژنێکی نامۆ

نیشتمانم جانتامە
وە جانتام نیشتمانم،
بەڵام... شوستەم نییە
دیوارم نییە
زەوییەکم لەژێر قاچان نییە کە بە دڵی خۆم بمرم
ئاسمانێک ڕووی لە هاوێرم نەکردووە
کە بیقڵیشێنم و خۆم بخزێنمە ڕەشماڵی پێغەمبەرەکانەوە.

پاڵم بە دیوارەوە داوە و
دیوار/ ڕماوە

نیشتمانم جانتامە
وە جانتام، نیشتمانی قەرەچییەکانە.
نەتەوەیەک کە لەنێوان دووکەڵ و ئاواز ڕەشماڵی هەڵداوە
نەتەوەیەک لەنێوان فیشەک و باران
هەڵوەدای شوێنە.

دەموچاوم پڕ لە گوڵە
گوڵ/ پشکۆ

نیشتمانم جانتامە
شەوانە بڵاوی دەکەمەوە
تێیدا قسە دەپڕژێنمە نێوان کیژانەوە
وە خۆشەویستەکانمی تێدا دەنێژم
ڕازیم پێی کە چارەنووسم بێت...
وە تێیدا دەمرم
دەستم بەسەر ئەستێرەوەیە
ئەستێرە/ ڕەشماڵ

نیشتمانم جانتامە
لە پێستی یارانم و لە ئەندەلۆسی نزیکەوە
نیشتمانم بەسەر شانمەوەیە
پاشماوەی زەوی لە گۆڤدەی عەرەب بوون
دڵم لەسەر بەردە و
بەرد/ ئازادە

ماڵاوا... ئەی خەڵکی لوبنان!
سپاس
بۆ هەر کیژێ کە خوێنمی پێ بوو
کە ئاهەنگی نان بۆ نەداران بگێڕێ
یان دەموچاومی بۆ داگیرکەران درەوشاندەوە
کە بمبینن و جلی دووڕوویی لەبەر بکەن.
سپاس بۆ هەر هەورێ کە دەستەکانمی پۆشی و لێوەکانمی خووساند
کە رێگەیەکی تر ڕوو لە نەیاران بکات، یان بەردەماخ.
سپاس بۆ هەرچی دەمانچەیە
کە کۆچی کردە جلی سەوزەڵانی و گوڵ
یان بە هەموو هێزی خۆیەوە گریا، یان قریواندی.

ئەی فرمێسک
بەس تۆ ماوی
لە وڵاتێکی کە پاڵی بیرەوەرییەکانم بەوەوە داوە

ماڵاوا
ئەی خەڵکی لوبنان.

🖊 #مەحموود_دەروێش
وەرگێڕانی: #ڕێبوار_چراغی
▫️ #ڕاوێژیسم

@Rawezhism

ليس للكردي الا الريح - کورد هیچ پەنایەکی نیە، جگە لە؛ با

شیعری: #مەحموود_دەروێش
وەرگێڕانی: #ئاکام_کافرۆشی
ئامادەکردنی: #وەرزێر_عەبدوڵلا

@Rawezhism | #ڕاوێژیسم

‏من بەبێ فرمێسک فێری گریان بووم!...

‏✍🏻⁧ #مەحموود_دەروێش ⁩
‏وێنە: Saul Leiter

لە تویتەر لەگەڵمان بن:
https://twitter.com/rawezhism/status/1008805190651215875?s=21

گەواھی دەدەم کە
ھەبوونت مەرگێکە و،
نەبوونت دوو مەرگ!

✍🏻 #مەحموود_دەروێش

@Rawezhism | #ڕاوێژیسم

«پاشماوەی ژیانێک»

ئەگەر ڕۆژێ پێیان وتم:
تۆ ئەم ئێوارەیە ئەمریت
ئەم ماوە کورتەی لەژیانتا ماوە چی ئەکەی؟
- سەیری سەعاتەکەی دەستم ئەکەم
پەرداخێ شەربەت ئەخۆمەوە
گازێک لە سێوێ ئەگرم
لە مێروولەیەک ورد ئەبمەوە
کە ئازووقەی بۆ خۆی پەیدا کردووە
ئینجا سەیرێکی سەعاتەکەم ئەکەمەوە
کاتم بەدەستەوە ماوە بۆ ڕیش تاشین
ئەچمە حەمام و خۆم ئەشۆم
شتێ بە بیرما گوزەر ئەکا:
"نووسین ڕازانەوەی ئەوێ
کەواتە با جلەکە شین بێ"
تا نیوەڕۆ لەسەر مێزی کارەکەی خۆم دائەنیشم
ئاسەواری ڕەنگ لە وشەکانا نابینم
سپی.. سپی.. سپی
دوا قاوەڵتیی خۆم ساز ئەکەم
دوو پێک شەرابیش تێ ئەکەم
یەکێ بۆ خۆم
یەکێکیش بۆ ئەو میوانەی بێ وادە دێ
ئینجا.. لە بەینی دوو خەونا سەرخەوێ ئەشکێنم
بەڵام لە پرخەپرخی خۆم بەئاگا دێمەوە
پاشان سەیرێکی سەعاتەکەی دەستم ئەکەمەوە:
کاتم بە دەستەوە ماوە بۆ خوێندنەوە
بەشێ لە "دانتی" و نیو "موعەللەقە" ئەخوێنمەوە و
ئەبینم چۆن ژیان لە منەوە ئەڕوا بۆ ئەوانی دی
ناشپرسم کێ ئەو بۆشاییە پڕئەکاتەوە
- ئاوا؟
- ئاوا، بەڵێ ئاوا
- ئەی دوای ئەوە؟
- قژم دائەهێنم، شیعرەکە فڕێ ئەدەم
ئەم شیعرە فڕێ ئەدەمە تەنەکەی خۆڵەکەوە
ئینجا تازەترین کراسی ئیتاڵیم لەبەرئەکەم
ئاپۆرەیەک کەمانچەی ئیسپانی دوای خۆم ئەخەم و
بەرەو گۆڕستان مل ئەنێم.
ـــــــــــ
#مەحموود_دەروێش
وەرگێڕانی: #ئازاد_بەرزنجی
▪️ #ڕاوێژیسم

📎 @rawezhism

‍ «بۆ دایکم»

بیری نانەکەی دایکم ئەکەم
بیری قاوەکەی
بیری دەستی.. کاتێ ئەیهێنا بەسەرما
ڕۆژبەڕۆژ مناڵی لەناخما گەورە ئەبێ و
عاشقی تەمەنی خۆم ئەبم
لەبەرئەوەی ئەگەر بمرم
شەرم لە ئەشکی دایکم ئەکەم
ئەگەر ڕۆژی گەڕامەوە
بمکە بە شاڵ بۆ برژانگی چاوەکانت
بەگژوگیا ئێسقانەکانم داپۆشە
ئەمەوێ پاک بمەوە بە بنی پێیەکانت
بە چەند تاڵێ لە پرچی خۆت بمبەستەوە
بە داوێ لە داوەدەزووەکانی دامێنی کراسەکەت
بەڵکو.. ببم بە خواوەند
ئەگەر دەستم بەر قووڵایی دڵت کەوێ
ئەبمە خواوەند
ئەگەر ڕۆژێ گەڕامەوە
بمکە بە دار بۆ ئاگری تەنوورەکەت
بکە بە تەناف بۆ جلەکانی خۆت لە سەربان
لەوەتەی لە نزاکانی تۆ بێبەشم
ناتوانم خۆم بەپێوە ڕاگرم
پیر بووم دایە
ئەستێرەکانی مناڵیم بۆ بێنەوە
تا لەگەڵ زەڕنەقووتەکانا
بەرەو هێلانەی چاوەڕوانیی تۆ بێمەوە

#مەحموود_دەروێش #ڕاوێژیسم
وەرگێڕانی: #ئازاد_بەرزنجی
📷وێنە: #ماردین_فەرەجی

📎 @rawezhism

«لە ماڵەکەی نزار قەببانیدا»

ماڵێک لە شیعر.. ماڵی پیاوە دیمەشقییەکە
هەر لە زەنگی دەرگاوە تا سەرپێ‌خەفەکە
وەک‌ئەوەی قەسیدە مەنزڵ و ئەندازەی هەور بێ
ئەو لە نووسینگە و لەسەر مێز نەیئەنووسی
ئەو لەسەر بالیف ئەینووسی
خەونەکانی.. یادەوەرییەکانی کۆترەکێویلەیان تەواو ئەکرد
بە هەناسەی ژنێ لە دارخورماکانی عیراق بێدار ئەبۆوە
کە یاسەمینی لە گوڵدانا بۆ تەیار ئەکرد
ئەو وەک پەڕی تاوس شیک بوو
وەلێ «دۆن جوان» نەبوو
ژنان وەک کەنیزەکی مانا لەسەر دڵی ئەنیشتنەوە و
ئەچوونە وشەی گۆرانییەکانەوە
ئیتر ئەو بەتەنیا ئەڕۆی
نیوەشەوان خەون قسەی پێ‌ئەبڕی:

لەناوما کۆمەڵێ ژوور هەن
کەسێ نییە بۆ سڵاو پیایانا تێپەڕێ
لەوکاتەوەی کە دیمەشقم جێهێشتووە
وەکو ڕوباری «بەرەدا» لەزمانما هەڵقوڵیوە و
هەراو بووم.

منی شاعیری ڕۆشنایی و گوڵەیاسەمین
سێبەرێک نییە.. سێبەرێک نییە لەزمانما
هەموو شتەکان ئەمانبەنەوە لای یاسەمین
منی خۆڕسک و گەش.. ئەسپی جۆش و خرۆش
لەسەربانەکانی گۆرانيیا ئەخەمەسەما و
هەورێک تێکم ئەشکێنێ.

وێنەم ژیانمی نووسیوەتەوە و
بۆ ژوورەکانی کەناردەریا دووری خستوومەتەوە.
ماڵی پیاوە دیمەشقییەکە..
ماڵێک لە شیعر
زەویی دەستەواژە شینە، ڕوونە.

شەویشی شین وەکو چاوی
گوڵدان شین و پەردەکان شین
ڕاخەری ناو ژوورەکەی شین
فرمێسکی شین.. کاتێ لە ڕاڕەوەکانا بۆ مەرگی کوڕەکەی ئەگری.

کەلوپەلی ژنەکەی لە باوڵا شین
چیدی زەوی پێویستی بە ئاسمان نییە
کەمێ «بەحر» لە شیعریدا
بەسە تا شینێکی ئەبەدی
بەسەر ئەلفوبێدا بڵاوبێتەوە
کاتێ کە پێکەوە مردین
بەتەنیا و لەلاوە پێم وت:
تۆ پێویستیت بە هەوای دیمەشق هەیە!
وتی: کەمێکی تر بازئەدەم
تا لە چاڵێکی ئاسمانی دیمەشقا پاڵکەوم.
پێم وت: چاوەڕێ‌کە تا چاک ئەبمەوە
تا دوا پەیڤت لێ وەرگرم
چاوەڕێم کە و ئێستا مەڕۆ
تاقیم مەکەرەوە و بەتەنیا مەبە بە ئاسی یەک‌ لۆ
وتی: تۆ چاوەڕێ‌کە، تۆ دوای من بژی
خۆ ئەبێ شاعیرێ هەبێ چاوەڕێ کا
منیش چاوەڕێم کرد و .. مەرگی خۆم دواخست.
ــــــــــــــــــ
#مەحموود_دەروێش #ڕاوێژیسم
وەرگێڕ: #ئازاد_بەرزنجی
سەرچاوە: ل. فەیسبووکی ئازاد.ب

🔸«مەحموود دەروێش» هاوڕێی نزیکی نزار قەببانی بووە و کاتێک دوای مەرگی نزار دەچێت بۆ ماڵەکەی لەدیمەشق، ئەم شیعرەی بۆ دەنووسێت.

@rawezhism @rawezhism