طنز تلخ
#شهر_بره✍ نورمحمد محمدی نژاد / رادیوپل
چارمیش فرختـــــم دَم وِ دِلالِی
کاش وَنیمْشـونِی هـِی دِ گِلالِی
وا لالکِحــاس وُ،واقــــُرو قِسَم
زور وُ نارِضا پیلیاشـــــون اِسَم
یه روشُوصوزی که وِدَرکِـــردِم
پیلیا دِجیوِم ری وِشَهــرکـــِردِم
سوارماشی ویــــم دلم دِهِوَس
خم واخـــم گوتِم باج ندیم وِکَس
حالا نـــومامـــی برسم وِشَهر
گـــوتم نــــــوبوئِم دِپاتا وِسَر
حاسِم پیا وام شوفِرگـــوت کِرا
طوری وِم بیی که خـــرجـم دِرا
نِنْشِسه ویم دِصنــــدلی پُشتِش
ده هزارتومـه نیام وِمین مُشتِش
روننده ماشی کوفتموکاری کرد
کِران چَن بـــراوَراین پاری کِرد
سیل ایــــــن روننده هَنِلِم بُری
دِه ماشـــی پیا ویم وِه دلخُـری
پیلیا مِنِســــــی تَشــَن ده کِلِم
شِبِرون زردِی گِــــــِرت وا دِلِم
قیمتش پرسیــــم وِناز وُ،وِفیس
بی کم و زیاد زَ دِمــــین دِویس
راق و ُیه گَر وی خَمِ چَم نکــرد
هرکاری کردم قــروکم نکـــرد
جومه دِ دُکو دیم وِدارکــــــِرده
پُرسیم هیه نووِ یاکه کارکـــرده
بی رو بی فرزن بی خدابی پیر
ایفتام د چنش بدتــــــر دِ اسیر
طوری کلاون نیایــــی وِ سِرِم
نونم جومَن کی کـــردی دِ وِرِم
بوسِم کِرد،دِرزَه دکمـه این بالش
رِمْلاقِ پیل گِل دَه دِ جـــــــالِش
هی ویدویدِسِم وِ پـــی شلوارِی
دَس فِروشی دیم وِسـا این دارِی
شلــــوار زیاده چیـدی وا تسمه
خیال کردم که فقیـــــر ولَسمه
ایواش فِچنیم واش،قیمت چطوره
گوت ضرر کنه هـــرکسی نوره
هـــــی نگرِتمِش وِباو این لَشِم
یَکشون تا کِردِم نیام وِبیخ کَـشِم
فهمم کور ویدی دِحِســــاوکِتاو
بیابَشنوپیلیان کُل ونمـــــه دِ آو
کم کوته دِشو هــم دَم وِشیــره
ســــی عیالم که گسنه نمیــره
مه شهروُبِرَن آسوفرض کـــردم
دِه ورگَشتِنِم کِرا قرض کــــردم
سوار ماشی ویم اومام وِحــونه
تعریف کردم که اوضاع چنـــونه
زینه گوت بپوش ،جومه،شلوارِت
بینم چطورن،هان وِبـــاو لارِت ؟
پـــوشیم،نشسم،دیر،زِ،ری شِما
شلــــــوار وِرتَکِس دِ وِر وُ دِما
جومه هم هه دِ شِفتِ شـور اِوِل
جِنجِره ویـــــــدی وُ وَر دَ کِوَل
وِی سی گِرونـی وِی وِروزِگار
کَس رحم نکنه وِ فقیـــــر وژار
پِناه یارم وِت خــــــــدا بیکَسو
حقِم دِ هـــــــرکی ظالِمه بَسو
#رادیوپل📻 T.me/RadioPoll