#قصائد_محرم_ #محرم_الليلة_الرابعة_ مولاتي ام البنين (ص)وهيه گاعده چانت تتأمل عودت مولاي سيد الشهداء
💔😭 وتتخيل ذيچ اعيونه وجمالة واذا بلخبر يجي خبر الفراق فمولاتي تحاچي بشر بعد ما سولف القصه وما جرى في كربلاء وتگله...
چنت اتأمل اعيونه ...ليش تگلي مذبوح
انذبح گلبي وتفاصيله...وكلشي بعده مجروح
حملي الضيم ياروحي..حبيبچ جسمه مطروح
عود امحضره فراشه...وگولن يجي ويرتاح
وغسل بيدي هندامه...اشوفه وعيني ترتاح
لچن خرب مواعيدي...راسه صار برماح
جسمه صبح حدر الشمس لا ولله مو مكانه
وطبع الشمس تحرگ حرگ شگد عذبت حنانه
الف وتسعميت جرح بي ما نصف زمانه
اه اه لضعنكم روحي تشتاگ
اه اه شسوه بروحي الفراگ
1
______بارد ماي حضرته...اگولن خاف عطشان
اصب الماي ودموعي...تگلي باقي ذبلان
شعنده العطش بعيونك...ما يدريك تعبان
تعال ارجع بعد روحي..ونطيك العمر ماي
وخي يعيش العطش بية..شوفك هوه سگاي
شوية باقي من طولك..وخيل الجايه اهواي
بعيونك شسوه الذبح ماعنده كل مخافه
ما يدري من ذبحك ذبح بلدنيه كل ترافه
چا ما قره عيونك عجب حنيه مو صلافه
اه اه لضعنكم روحي تشتاگ
اه اه شسوه بروحي الفراگ
2
_______
حچيت اهواي وي روحي...ماقنعت بلوداع
شما اصبر يفز جرحي...لأن جسمك عله الگاع
متاعي جانت ارموشك..وهسه فراگك امتاع
يجيني الليل وسهرلك...ويبدي صبحي بلنوح
غيابك مو سهل تدري...ولله يطلع الروح
عمت عين الحوافر ذيج...چي زادتلك جروح
صدرك ترف بس العدو حضر الك حوافر
منك كسر وسفه الصدر وانة كسرلي خاطر
بلكت اموت اتعذبت ماريدن ابقة باااچر
اه اه لضعنكم روحي تشتاگ
اه اه شسوه بروحي الفراگ
3
_______
(اهنا اتاني مولاتي وصول الضعن ولهناك الضعن يجي )
گعدت الفجر وتنطر..وشفت لانة الضعن جاي
وركضت وگلبي يسبگني..وبيدي شايلة الماي
گلت هذا الضعن النة..لچن متغير اهواي
وصل گلبي قبل جدمي...وجاب لروحي الاخبار
الضعن مابيه بس نسوان...وشويه من لزغار
گلبي ماعرف زينب...وضل يرگضلي محتار
لا يا گلب احچي الصدگ زينب مشت اميره
لا تنتحب وحچي بعجل لتگلي اجت اسيره
وين الاهل وين الضعن لا راية لا عشيره
اه اه لضعنكم روحي تشتاگ
اه اه شسوه بروحي الفراگ
4
_______
زينب فدوة حاچيني...شو وحدچ بلضعون
وين اخوانچ الراحو...شو بس انتي يم عون
وين اعيون كفالچ...وليش الغربه يحدون
( مولاتي زينب تجاوب مولاتي ام البنين )
يمة الدهر طشرنه...وراحت ذيچه الاخوان
لچنت ادخل علة اعيونة..ادخلت بغيابه ديوان
ضل بس الدمع عندي..وهسه دمعي خجلان
مو چف اخو يُمة الحبل هوه صبح بدية
بديره وغرب عين العده كلهن نضر علية
بحساسي بين چم جرح لمن صرت سبية
اه اه لضعنكم روحي تشتاگ
اه اه شسوه بروحي الفراگ
5
_______
#محرم_1444هـ_ خادم الزهراء ص
✍️محسن الباوي
________ــــــــــــــــــــــــــــــــــــــــــــ
ـ ـ ـﮩﮩৡ✦ عَدَمُ حَذْفِكَ لِلتَّوْقيعِ يَدُلُّ عَلىٰ خُلُقِكَ الرَّفيعِ ✦ৡﮩﮩـ ـ ـ
…~…~…~...~…~…~…
t.center/MINBARIYOON