خدابیل بمدرسه میرود
(قسمت هَجدهوم _ 18)
تا ما خمونه گرم کردیم وو میشونه حُشکسون کردیم …
بهزاد هم که جغله ترو فرزی بی ، تنده پوست شیشک کندو پاکس کردو یه رونسه حیرد کرد وا دلو جیرس کشیدسون به یه چنتا لِشک درخت که وا چقوو جُور سیخ راستسون کرد …
بس معلوم بی که بِ کُهه زیاد گشته بی ، دونست وا چه بکنه …
ایما هم کِ یکی یه پتیر نون تیری منه کیفمون بی سی چاسمون ، نونانه دِراوردیم مهرجونم نهادسون منه سرفه نونی خوس وو هر کی هرچی داشت نهادسون سر سرفه ، نمک هم دا به جغله رهد کد کوواوا …
منه همیو بیدیم که شنبدی وا یه پیا دیه ارسن او تا اَوو ، دیدمون …
یواش به مهرجون گدوم :
اَ … دیدی چه وابی ؟ تازه چی بمون اگوو …
بَنگ کرد گوو خسته نباشید حضرات ، پ تارُف ایما نیکنین بیویم یه چند گِند ز کواواتون بخوریم ؟
جغله هم گوو :
قدمت بری تیام ، تشریف ایاری ایطرف یا بیاروم حذمتت ؟
راسیاتس ای میشون ز ای بچیله یکیسون داشت حروم ابی ، سرس بریدوم که حروم نوابوو او دوتانه هم ز روو گرهدم ، یکیسونه هم خسون جُستن ، الانم در خذمتیم …
شنبدی بس گوو :
کوواوی که خُوری ز شیر دات حلالتر ، یونون ز مونن طناف جَهره بُهرست وَستن ب اَوو ، الانم داروم اروم طناف بجوریم بلکه جهرنه راستس بکنیم
ای میشونه هم بده ب بچیل با خوسون برنسون مال ، ای لاش هم حلالتون ، هرچنسه ترین بخورین هرچنسم نترستین با خوتون برینس …
بعد هم به ایما گوو :
دستون درد نکنه صندوقینه ز اوو کشیدین سهرا …
به مهرجونم گوو :
دوهدر هی ، ب بووت بگوو ، به همو تیر نشون که 100 تومن ز پیلا تیم واستادن ، ای میشون وادار طی خوت تا بیام میش چال وآ بَرنه هم زت بستونم ، وو ره وستن طرف سرزیر …
ایما هم جاتون خالی با خیال راحت نشستیم به کواوو خردن …
خردیم تااااااا دی زگلیمون نیرهد بلَم …
اشکمامون ک تِنگ اوی جغله نیشت بمون گو :
خاوو ایسا خوو گودین میشون ز ایمانه چطور صحاوسون یکی دی بی ؟
ایر ایسا هم نیرسیدین امندوم تا صحاوسون بیا ز پیسون ، ادونستوم ز هر کی بوو تازه یا ز دینسون …
اما ز غیرتتون خوشوم اوی …
ری کرد بوم گوو :
خاوو جغله سیم بگوو بینوم تو کینی که مونه یشنی اما مو نیشنومت ، وا سیم بگوی …
گدومس :
مو خدابیل کر سرتیپ هدوم که پار با یَک شَوو ب کُوهه بیدین …
گود :
تش نگرای جغله مو دیدوم جَد بر جَدومه یشنهدی ، خدا پیرت کنه کردام …
بچیل ز ای لاشِ لازم دارین زس بدومتون …
گودیم نه دستتم درد نکنه ایما که این اپوکیم زبس خردیم ، بَرس سی خوت…
جغله هم چقونه بست ، نها پر کد ، لاشه هشت ری شون جور کوگ ز دِر رَه وا رُوهه ایما هم میشون روندیم رهدیم بمال …
ادامه در قسمت بعد ..
#خدابیل ،
#داستان ،
#هجده ،
#هفده ،
#شانزده ،
#پانزده ...
@lorestanaligoodarz