پیلَه خدا نومی نَه زَیرون ببی تالش
#شاعر؛مهرداد برزگردوست(دیل گِتَه تالش)
🌸مه ویرآ
🌸چوئه کَه گیلَه دیاری مه ویرآ
سِیلَه بن، چَمَه بجاری مه ویرآ
چای باغ، کوتوم، تلار و کیلاغا
چَمَه باغی سیفَه داری مه ویرآ
واش بریم و لِلِکی جَم آکَریم
ایسبی جو، پیلَه رواری مه ویرآ
حَبیبی جنگل و اَ کیشَه دارون
چِه مینی اَلاشَه داری مه ویرآ
چیری و دولچَه نَه شیم آو ووئریم
چِمَه بنی چوئه لاری مه ویرآ
تونَه پِشت جیخسَه مزا کَریمون
چم^ اَ قدیمنَه یاری مه ویرآ
گِشَه سرا، دمبلی و مَجمَه وَری
تالشَه شِی و شواری مه ویرآ
زلماتَه شَوون شالِن زوزَه کَرین
بَبَه خلِه و زاهاری مه ویرآ
خَیرَه شال سرا پیشی کو ویمونی
اسپَه گِری تیلی ناری مه ویرآ
خ^ر که آی گرَخنَه صتا کَری
رَگ ویدِی کلاک که واری مه ویرا
کوچاکوچ و گیریَه آسِرَه هوا
رَمَه دارون رَمَه داری مه ویرآ
پارگاه و شوونَه و چه فترَه لس
یِنَکون اَسبَه سواری مه ویرآ
گل و بلبل،کلکاپیس و میرکیَه
گیلونی شَنگَه باهاری مه ویرآ
دیل گِتَه هر جا اشتَن شعرون نَه وا
تالشون کنش و کاری مه ویرآ
دیل خشی،سَقه جانی، میرَوونی
اَ خشی یَه روزیگاری مه ویرآ
✍مهرداد برزگردوست(دیل گِتَه تالش)
@Deelgeta_talesh