وِرَهلا کَه کاوَهمارونِ گیسِت
بِلُویلِن شَپشَپَهتُویتُونِ گیسِت
خِری باریرَه وختِ چُویچومُویچَه
بِگرمِه باوِشت چُوی گَرتَهچُویچه
دَماکه، ئی انار تُرشَه بِشکِن
تِکی آو ئَر لِچِ لوچِم بِپِشکِن
بِنیش ئَر «دَمتنگ» و نو بارِه بازار
اناری ئِه انارِ «ژیرتنگ بار»
بِخَن تا باوَهجِد شوگار بایِهر
گِه هور ئِه پِشت «ویزنیار» بایِهر
سیاو ئَر سر سیاو ئَر سر سیاوم
تونی گِه مِه بِچی کم بورِه خاوِم
تو گِه زیتُوین سُوزی، تو گِه کاوی
تو گِه خوینی من و خوینی سیاوی
بِچم ئَر ئی تَنگَه نُومت بُواشِم
بنالم، «داگله» ئِه یک بپاشم
بچُویچِنمِت، بِچِنمِت ئِه دُوارَه
بِکَنمِت، ئِه نُوا بِنمِت دُوارَه
گِه آخر کی دیه آگِر حُنِک بو؟
تو دیتَه گِلمِتی عاشِق کُچِک بو؟
تو دیتَه مُونگ ئَه نوک دارا؟ مِه دیمه
هور و آساره ئَر یه جا؟ مه دیمَه
مه دیمه، هِن یَسَه هُونَه مَنالِم
اگر بُوینی مَزونی چُوینَه حالِم
تو دیته کَنی و کَل ئِه بَخَل یَک؟
کتوُن و باد و مشعل ئِه بخل یک؟
مه دیمه، هن یَسَه موشم مه دیمه
مه دیمه هِن یسه دیوانه بیمَه
نِموشی «بایبِردَه» دِلمَه موُری؟
مَلوُیلی، منزل ئَر منزلمَه موُری
کَل ئَر کَل تیمو ئَر تیمو وَه تُورتا
کل ئَر کل، آهو ئَر آهو وَه تُورتا
گُلاوِت داسَه دَس بادِ شَمالا
انارِ تو انارِ باخِ بالا
خدا وِژ باخِ تو آباد کَردَه
انار تو انار «باخزردَه»
خدا وژ نُومِ نازارِ تو ناسی
وِژِه یِه شاخَه ئِه دارِ تو ناسی
گِلاناری وِجاخِ باخ سردَه
گِلارا لامَصُو ایلاخ سردَه
مه بی تو آومَه مُوری، چیشی ئَر سر
مَچو بی کِش ئِه «خورچیکش» میِه دَر
تو نُومِت «تنگسیاوه» باخِت آباد
رَگِت «وار آسیاوه» باخِت آباد
دَمِت شِلکینیهُ و خُرما و رُوینَه
لُوهت تِلیاقَه، گیسِت مار و پُوینَه
وَه ئی حالا گه ئِه داخِ تو داخِم
ولی مِه کُر کو و بوسون و باخِم
مَتُرکِم مامَه تُور دارَل انارا
دلم ئِه آو گِلادَه بِیتَه وارا
مَتُرکِم مامَه تُور دارَل انگُویرا
دیارَه دارَلِت ئِه بَرزِ دوُیرا
کَل أر کَل تیمو ئَر تیمو وه تُورتا
کو ئَر کو، آسو ئَر آسو وَه تُورتا
هُورهتاوِت کَموتَر هاتیهرَه
انارت شیر مادر هاتیهره
داوار و مَشکَه و مالار و هیزَه
انارت خاصَه انجیرت عزیزه
#مرتضا_خدایگان پی نوشت:
۱- داگِله: نام کوهی که زیرتنگ را از پشتتنگ جدا میکند و تنگهی زیرتنگ در این کوه ایجاد شده است.
۲- بایبِردَه: بادی سرد و معروف در میان بومیان منطقه که قبل از طلوع خورشید شروع شده و تا چند ساعت وزیدن دارد و از تنگهی سیاب وارد انارستان می شود.
۳- دمتنگ: ورودی زیرتنگ پس از عبور از تنگهی سیاب که روستایی کوچک با همین نام در آنجا واقع شده است.
۴- خُورچیکُش: نام قسمتی معروف و با جریان تند در پایین دست رودخانهی سیاب که از مناطق خطرناک این رودخانه است.
۵- وار آسیاو: قسمتی از رودخانهی سیاب که پایینتر از یک آسیاب قدیمی قرار دارد و سالهاست محلی مناسب برای آبتنی اهالی است.
@asredelfan