إبداعات حسينية

#دخول_الضعن
..

شايل غبار القافله رساله
من المدينه لكـربله رساله
يرض النواويس الضعن جاي
يـمچ امـانه حسـين مولاي
..................

يا كربله ضيفچ نوه يشد الرحيل بضعنه
بليـــل راح لـفاطــمه ودع گبــرها بــونّه
ومر برسول الله وبچه وقرر الــچ يتعنه
ياجنة الله استقـبلي ســيد شـباب الجنه

يمچ مصـابيح السـمه امانه
يا كربله من فاطمه امانه
من يوم راح و ظلمه دنياي
يـمچ امانه حسين مولاي

..................

هاي الضعينه اسبعطش كوكب يدور اعليها
عاف المدينه خاليه ولا هاشمي الظل بيها
حته الطفل وياه مشه بس طفلته مخليها
ظلت عليــله بلا دوه وداع الابـو مبچـيها

وام البنين تطش دمع وداعه
خلاها محنية ضلع وداعه
سِمعي وصيـة ام الوفـه هاي
يـمچ امانه حسين مولاي

..................

عباس اجه بهالقـافله وراية علي بيـمينه
قائد الجيش الهاشمي بخدر السمه موصينه
يا كربله وصــي النــهر لا تنـگطع چفـينه
ولا تنطفي عينه بسهم زينب امانه بعينه

وحسين يفگد عالنهر اخيه
وبطيحته يكسر ظهر أخيه
من يوگـع الـعباس عالماي
يـمچ امانه حسين مولاي

..................

يا كربله حسينچ اجه وشايل رسـالة جده
يذبحون اخوته وصحبته وبالعاشر يظل وحده
عالمهر لو شفتي السهم لظهر الحسين اتعده
يا كربله وصي الرمــل لا ينچـــوي بي خده

والشمر روح المصطفه يذبحه
بثنعش طبره من الگفه يذبحه
يـا كربله بجـروحه الـهــواي
يـمچ امـانه حســين مولاي

..................

يا كربله زينب اجت والبالخــدر معروفه
وصيلي تل الزينبي لا بشر ظــلها يشوفه
من توگع اچفوف الوفه تمشي بحبل مچتوفه
هذي حبيبة فاطمه مو مال شام وكــوفه

ما لايگ اعليـها إســم ســبيه
ويلاه تمشي اويه الزلم سبيه
تناديچ من يحديـها حــداي
يـمچ امانه حسين مولاي
........................

الشاعر كرار حسين الكربلائي
( ابو كميل)

┏━━━ • ◾️ • ━━━┓

@AsoaatHoseneua

┗━━━ • ◾️ • ━━━┛

https://youtu.be/KeyUuLW9yfQ