#قسمت_بیستوهشتم(پایانی)
گوت: روله! دِه روزی که تو رتی
خیر و برکت دِه حونمو رت ، ناونم چه گناهی وه درگاه خدا کردم که اولاد چِنینه دَه وم...
رتم مین آشپزخونه که چایی سیش بیارم ، شیرین وه گاموله اوما بغلش
کدخدا گوت: نوم نیر خدا! ینه دختر کیه؟
گوتم: کنیزته کدخدا
گوت: دختر خوته؟ مَر تو بچه دار مویی؟
گوتم: عَه! اَلوَت دِه بالایی خدا!
سرش وَن وه هار هیچی نگوت
بَنه خدا دِه بردیا خجالتی کَشی
بردیا که متوجه بی وِریسا رت وه در
کدخدا گوت: روله دوس ناری دونسویی بعد تو سعید چی کرد؟
گوتم: سیم مهم نی! خدا خیری وش بِیه
گوت: ولی دوس دارم سیت بوئم!
بعدشم گوت که زینه سعید آدم گَن و بی آوِریـه بی ، هیچوَخت کوچکترین احترامی سی من و دا سعید قائل نیی
سعید مریض بی افسردگی گرت ، بَچشو هم عقب مَنه دِه آو دِروما
وَختی سعید وه رفتار زینه مشکوک بی ، یه روز زیتر دِه سر کار اوما و متوجه بی که پیایی ها دِه حونش ، وا پیا درگیر بی ، پیا هم وا چو زَه دِه مین سر سعید
شانس آورد که هِه او روز مه رتم وه در حونش ، هرچی در زَم کسی درن واز نکرد
دِه بالا دیوار رتم و وَرَز یِنه که بمیره ، بردمش بیمارسو ، سعید دِه هر دو چَش کور بی ، زینه هم وا پیا جِست رت
ایسه من و زینَم شو و روزمو بیه وه پرستاری و تیمار سعید و کُرش...
🐞وا اِشنفتن ایـ حرفیا خیلی گِریوسم
دوروسه که سعید خیلی وه مه ظلم کرد ولی ایسه که خوم خوشبخت بیمه دوس ناشتم بدبختی سعیدن بئینم...
موقه که وه کدخدا گوتم که حلالشو کردمه مین سرم ماچ کرد و سی همیشه خدافظی گِرت و رَت
🐞بعد چَن سال یه روز لیلا وا بَچونش اوما حونمو
چِنو خوشحال بیم که متوجه جومه سیه که دِه ورش بی نئیم
بعدا گوت که میرَش که دِه ارتش بی دِه جنگ نیرویا متحدین و متفقین مُرده
گوت: چَن روز جا بِه ومو تا چَن روز هَنی روئیم حونه برارم
وش گوتم: ایـ حرفیا چینه
من و بَچو ، همه زندگیمونه مدیون تونیم عزیزدلم ، اَر منت بَنی وه سرمو ، بَمونی تِه خومو و سایه سرمو بایی خوشحال موئیم...
🐞لیلا و بَچونش و خسرو رتن طبقه بالا و سی همیشه مَنن تِه خومو
نازگل و ساتیار هم بچه دار بین و تا آخر عمر خوشبخت وا یَک زندگی کردن
بردیا و انوشیروان هم بیِن وه معروف ترین تاجریا وِلاتمو و امتیاز واردات خیلی چیانه دِه دولت گِرتن...
🐞خدا رحمت کنه رفتگانتونه!
مرحوم دام همیشه میگوت: روله عاقوئتت وه خیر با
ایسه بعد ایـ همه سال وه حرفش رَسسم...
سعید وا هوسبازی و بی بند و باری هم عاقوئت خوشِن "آخرشرّ" کرد ، هم آورِی و نوم نیک کدخدا فقیرن وه باد دَه!
🐞امید خدا هممو دِه ایـ بیبی درس بیریم و عاقوئتمو وه خیر با
🐞#پایانخدا دیار سرتو
✋
🎼 🍁 #گلونی_Laki 🍁🎶 🟠 @Alshtariii 🔥