#قسمت_بیستودومروزیا وه سختی میگذشتن...
مه خومِن وا کاریا حونه مشغول میکردم که گذشته دِه یادم روئه
مردم آبادی هم طلاق مِنه فراموش کردن و همه چی وه روال عادی ورگشت
کم کم پا کیخایی کِنو هم وه حونمو واز بی
ولی بیشترشو یا "زن مُرده" بین و چون دونِسن مه بچه دار نموئم ، فک میکردن میتونم دا خویی سی بَچونشو بام
یا ریش اِسپی هومدا مرحوم پاپام بین ، ناونم وا چه ریِـه میومان کیخایی!
ولی مه اصلا وه شی فک نمیکردم ، دوس داشتم بِسم بالا سر خوئر و براریام تا گَپ بان...
🐞یه روز اول صو وا صدا تَق تَق در حونه دِه خاو وِریسام
اولش نمیهاسم درن واز بکم بعدش که خیلی اصرار کرد رتم درن واز کردم
لیلا بی!
گوتم: لیلا! سِقه سرت بام ، چَنی خوشحالم که اوماییه
مِکیسش کردم اوما وامی
ولی نازگل دوس ناشت بئینش ، وش گوتم: عزیزم! لیلا تَخصیری ناشته ، خیلی دِه حق ایما خویی کرده ، راضیش کردم اوما وه تِش
لیلا گوت: قضیه طلاقت که فهمسمه خیلی سیت ناراحت بیمه ، خدا خوش جواوشون بِیه انشالله
بعدشم گوت که زندگی خویی دِه آبادان داره و میرَش خیلی دوسش داره
اَلوَت میرَش حق داره ، لیلا خیلی زن مهربون و خوئیه
مین او چَن ساعت ، لیلا خیلی دلشوره داشت که اَر خسرو ایچه بئینش چه واکنشی نِشو دیـه!
ایواره که بَچو دِه سر کار اومان ، اوّلش خسرو شوکّه بی
بعدش رت بغل داش و افتا وه گِریوه و گِلی کرد که سیچی هیشتیمه و رتیه!
ایقه گِریوِسن که هممونه وَنن وه گریوه!
لیلا گوت: روله! تو خو دونی مه مجبور بیم! مه هیچوَخت سی دل خوم شی نکردمه...
او روز که لیلا اوما یکی دِه بهترین روزیایی بی که بعد چَن سال وه چَش دیم
بعد شوم لیلا وه خسرو گوت: مه باید روئم حونه پاپات ، تو هم بیا که ایـ چَن روز که مه هام ایچه تِه یَک باییم
ولی خسرو قبول نکرد، گوت: دالکه دِه روزی که رتیه نه پاپام نه حالویام ، یکی دِشو سر وه دیارمو نیاورد بئینه زنّه ایم یا مُردیمه!
دلم سی لیلا میسوخت که خسرو واش نرت ، ولی خسرو هم حق داشت...
🐞افسوس...
آخم سی او روزگارو
چَنی روزیا خویی داشتیم
کاش بوئم و ننه قمرتاج زنّه بین
دلم سی غُرّ زدنیا ننه قمرتاج تنگ بیه...
🐞اوسِنو خو بی که مال دِه مالگَیا بی
دام کِیوِنو و بوئم کدخدا بی...
🐞روزی که قرار بی لیلا ورگرده وه آبادان اوما حونمو سی خدافظی
گوت: تیام! مِزگونه بِه!
گوتم: مِزگونه سیچی؟
گوت:خَوَر خویی سیت دارم!
اَر گوتی امروز کینه دیمه؟؟؟
گوتم:ناونم! کی؟
🐞#ادامه_داره...
🎼 🍁 #گلونی_Laki 🍁🎶 🟠 @Alshtariii 🔥