#باسم_الكربلائي_Bk 📜قصيدة : زينب ياغريبة مكتوبة
✒للشاعر : سيد عبدالخالق المحنة
ها يزينب وحدج والدنيا ليل
يا غريبة وشايلة بدمعج نهر
منين اجيبلج يبت حيدر كفيل
بهالظلام منين ادورلج قمر
🔹🔹🔹🔹🔹المسافة بين عينج والفرح
غيمة عطشانه وتدور بلا مطر
ها يزينب طالعة بهذا الظلام
اسم الله صاح اليل لو جدمج عثر
خطوة اجدامج مثل طير الغريب
بين الف صايود وجناحة انكسر
عاصفة حزنج تنوح الهه الجبال
وانتي راسج عالي يتحده الخطر
اليل يا زينب يطول على اليخاف
وانتي من كثر العتب ليلج قصر
🔹🔹🔹🔹🔹شوفة خيالج قبل بالمستحيل
هسه ياهو الجان من حقة النظر
النوم سلطان ويسيطر عالجفون
الا انتِ نايمة بعينج سهر
يا بحر من الالم موجاته اه
يا وكت صار النهر يقهر بحر
ليلة العاشر عن الف عام وتزول
بين دمعه ودمعه نمشيهه بدهر
خفي دمعج خلي للشام الدموع
لمي صبرج باجر وداع وسفر
🔹🔹🔹🔹🔹لو ركبتي الناقة من يلزم اديج
مدي جفج يمكن الكافل حضر
من تعبرين الصحاري على الهزيل
عالرمال دموعج تخضر شجر
حزنج هوايه لجن عمرج قصير
وانا كل عمري لجل عينج صفر
وية طولج بي قصر جرح اليطول
وية ابو الغيرة وية طولج جف قبر
ها يزينب لا تمرين على اخوج
يموت صبرج من تشوفين النحر
🔹🔹🔹🔹🔹سحقته الخيل وتزع عالتراب
خنصرة المقطوع ينطيج الخبر
مثل ابوج امشي وانظري للامام
حيدر بصدرين يمشي بلا ظهر
يالقصدتي على النهر قلج عتاب
هله هله بكافلج من اعتذر
جفوفة ذبلن مستحه وطلبن سماح
لخاطر القادر اعذري الما قدر
ها يزينب وحدج والله المعين
انتِ دمعه والخصم كلبه حجر
🔹🔹🔹🔹🔹