#الخلفاء_الراشدون_إيمان_شلبي #سيرة_أبو_بكر_وعمر #الحلقة_الثامنة_عشرة #إدارة_الشؤون_الداخلية_في_المدينة_الجزء_الثاني اتكلمنا المرة إللي فاتت عن الأعمال إللي بدأ يعملها أبو بكر رضي الله عنه داخل المدينة كخليفة للمسلمين، ومع انشغاله بإدارة شؤون المدينة وتدبير أمور المسلمين فهو لم ينسَ رعاية أهله وتوفير احتياجتهم من الطعام والشراب، فبعد ما تولى الخلافة خرج للسوق ليتاجر عشان يصرف على أهل بيته👌 ☆وهو بالمناسبة في الوقت ده كان عمره حوالي من ستين إلى واحد وستين سنة وكان متزوج من زوجتين هما: ¤أسماء بنت عُمَيس، إللي سماها عمر بن الخطاب رضي الله عنه البَحريّة لو تفتكروا كنا اتكلمنا عنها في السيرة😅 وهي عالسريع كده: من المهاجرات الأوائل إلى الحبشة، أسلمت قديما قبل دخول الناس دار الأرقم، وهاجرت مع زوجها جعفر بن أبي طالب إلى الحبشة وبعدين هاجروا إلى المدينة، وبعد ما استشهد جعفر في غزوة مؤتة تزوجها أبو بكر، وولدت له محمد، وكان وقت ولادة ابنها في ذي الحُلَيْفة في حجة الوداع. ¤الثانية هي حبيبة بنت خارجة بن زيد الأنصارية الخزرجية، وهي دي إللي كان عندها أبو بكر رضي الله عنه في يوم وفاة رسول الله ﷺ وكانت تسكن في السُّنْحِ في أعالي المدينة، ودي هيموت عنها أبو بكر رضي الله عنه وهي حامل وهتولد بعد موته ابنته أم كلثوم👌 واحنا كنا قلنا قبل كده إنه كان تزوج امرأتين، هما《قُتَيْلة بنت عبد العزى》ودي طلقها، والثانية 《أم رُومان بنت عامر بن عُوَيْمر》ودي ماتت في المدينة في شهر ذي الحجة من السنة السادسة من الهجرة، يعني في نفس السنة إللي حصلت للسيدة عائشة حادثة الإفك👌 فيبقى أبو بكر تزوج أربع نساء أنجب منهن: عبد الله وأسماء، وعبد الرحمن وعائشة، ومحمد وأم كلثوم، وكلهم أسلموا👌 فلما خرج أبو بكر للسوق للتجارة عشان يصرف على أهله وعياله؛ أراد الصحابة وعلى رأسهم عمر أن يتفرغ أبو بكر لإدارة شؤون الدولة فقال له عمر إنه يتفرغ للخلافة وأمورها وهيتم صرف له زي مرتب كده يصرف بيه على نفسه وعياله، فوافق أبو بكر رضي الله عنه وتم صرف مبلغ له من بيت المال يكفيه هو وأهله. وقال أبو بكر رضي الله عنه: "لقَدْ عَلِمَ قَوْمِي أنَّ حِرْفَتي لَمْ تَكُنْ تَعْجِزُ عن مَؤُونَةِ أهْلِي، وشُغِلْتُ بأَمْرِ المُسْلِمِينَ، فَسَيَأْكُلُ آلُ أبِي بَكْرٍ مِن هذا المَالِ، ويَحْتَرِفُ لِلْمُسْلِمِينَ فِيهِ"《صحيح البخاري》 يعني بيقول إن المسلمين عارفين إني تاجر من قبل ما أتولى الخلافة، وإن عملي بالتجارة يكفيني إني أصرف على أهلي وأكفيهم احتياجاتهم، لكن إللي حصل دلوقتي إني انشغلت بأمور المسلمين وإصلاح شؤونهم فبقى من الصعب إني أتفرغ للتجارة زي الأول، فبقى لازم له إنه يأخذ نَفقةً لنفْسِه وأهله مِن بَيتِ المال، ففي مقابل النفقة دي فهو سيَجْعَلُ خِبرتَه وحِرفتَه ومِهْنَته الَّتي يَستَحِقُّ الأَجْرَ عليها في خِدمةِ بَيتِ مالِ المُسلِمينَ، وأَلزَمَ نَفسَه بأنْ يتاجِرَ للمُسلِمين في أَمْوالِهم؛ حتَّى يَعودَ عليهم مِن رِبْحِه بِقدْرِ ما أَكَلَ أو أكثَرَ، كأنه يعني بيتاجر للمسلمين في أموالهم و المرتب إللي بيأخذه ده في نيته إنه بيأخذه مقابل مجهوده في التجارة في أموال المسلمين وليس أجر على الخلافة، يعني هو بيسخّر خبراته في التجارة لخدمة مال المسلمين في مقابل الراتب إللي هيأخذه من بيت المسلمين👌 وإللي عمله ده كان من باب التطوع منه رضي الله عنه، يعني مش إنه واجب عليه إنه يسخّر خبرته في خدمة أموال المسلمين، وده يدل على ورع أبي بكر رضي الله عنه وإنه مش عايز ياخد حاجة من أموال المسلمين حتى لو كان حقه👌 ☆الواحد هنا ممكن يحس بالفرق الكبير جدا بين أفعال أبي بكر رضي الله عنه وحرصه على مصالح وأموال المسلمين وبين أفعال حكام المسلمين دلوقتي ويتحسر على نفسه وعلى الناس ويتمنى إن الحكام يقتدوا بأبي بكر ويحرصوا على مصالح المسلمين😅 لكن إيه رأيكم بقى إن المشكلة مش في الحكام فقط😕 يعني هتلاقوا الناس كأفراد لا يهتموا برعاية مصالح المسلمين وأموالهم👌 يعني تلاقوا مثلا حد بياخد أدوية من المصلحة الطبية إللي شغال فيها وهي مش من حقه، وإللي ياخد أقلام وأوراق من شغله ويستعملها استعمال شخصي، حتى الإهمال في المرافق العامة أو تخريبها وعدم المحافظة عليها، ماهي كل الحاجات دي من أموال المسلمين، فهتلاقوا إننا كأفراد بنهدر أموال المسلمين واحنا مش حاسين ومفكرين إن دي حاجة عادية🤷 فإذا كنت انت شخصيا كفرد متضايق من أفعال الحكام ومش عارف تغيرها؛ فانت كفرد تقدر تحافظ على أموال المسلمين من الهدر👌 ¤ممكن طبعا حد يقول: يعني أنا إللي هغير الكون😑 أنا لو حافظت على أموال المسلمين غيري كتييير مش هيحافظوا، فخلاص خلينا زي ما احنا🤷