#الخلفاء_الراشدون_إيمان_شلبي #سيرة_أبو_بكر_وعمر #الحلقة_العاشرة #بين_المهاجرين_والأنصار_في_السقيفة وقفنا المرة إللي فاتت عند وصول أبي بكر وعمر وأبو عبيدة لسقيفة بني ساعدة بعد ما اجتمع الأنصار في الرأي على اختيار سعد بن عبادة خليفة للمسلمين ولكن لسه محصلتش البيعة، بعد ما دخل الثلاثة وجلسوا، مفيش وقت بسيط إلا وقام خطيب الأنصار وبدأ يتكلم، اسم الخطيب إللي تكلم ده غير معروف، لم يذكره المؤرخون، وممكن يكون الخطيب ده هو ثابت بن قيس رضي الله عنه؛ لأن هو إللي كان يُطلق عليه خطيب الأنصار، فالله أعلم🤷‍♂️ فقام الخطيب وتكلم، فَأَثْنَى عَلَى اللَّهِ بِمَا هُوَ أَهْلُهُ، ثُمَّ قَالَ: " أَمَّا بَعْدُ ، فَنَحْنُ أَنْصَارُ اللَّهِ وَكَتِيبَةُ الإِسْلاَمِ، وَأَنْتُمْ مَعْشَرَ المُهَاجِرِينَ رَهْطٌ..."《صحيح البخاري》 يعني بيقول إن الأنصار هم كتيبة الإسلام وأنصار الله بينما المهاجرون رهط، يعني عدد قليل. وفي رواية: رهط منا، يعني عدد قليل بالنسبة لنا، وكأنه توقع إن المهاجرين هيكونوا عايزين الخلافة، فسبّق بالكلام عشان يُبطل أي حجة للمهاجرين بأنهم أعداد قليلة بالنسبة للأنصار، وطبعا الأنصاري يقصد المهاجرين قبل فتح مكة الذين هاجروا إلى المدينة وإللي عايشين حاليا في المدينة، وإلا فلو اعتبرنا أعداد القرشيين في مكة مع إللي أسلموا بعد الفتح فهيكونوا أضعاف أضعاف الأنصار💁‍♂️ المهم هو قال الكلام ده كتلميح إلى أن الخلافة يجب أن تكون في العدد الأكبر الذي نصر الإسلام في كل المشاهد والمواقع بنسبة دائماً ما تكون أكبر من المهاجرين. ☆فالكلام ده كده فيه بوادر أزمة ومشكلة😬 كلامه في البداية كان مجرد تلميح، لكنه بعدها قالها صريحة كده: "وَقَدْ دَفَّتْ دَافَّةٌ مِنْ قَوْمِكُمْ، فَإِذَا هُمْ يُرِيدُونَ أَنْ يَخْتَزِلُونَا مِنْ أَصْلِنَا وَأَنْ يَحْضُنُونَا مِنَ الأَمْر"《صحيح البخاري》 يعني بيقول إنهم بعد ما خلاص استقروا على رجل يكون هو الخليفة جاءت مجموعة قليلة من المهاجرين《 إللي هم أبو بكر وعمر وأبو عبيدة 》عايزين يستثنونا من الخلافة في بلادنا، يعني الخلافة حق الأنصار وانتم جايين عشان تاخدوها مننا، وبعدين سكت الخطيب. ☆الموقف ده كده ممكن ياخدنا لدعوى القَبلية والجاهلية والفُرقة وده يقول احنا المهاجرين والتاني يقول احنا الأنصار وتحصل أزمة بين الطرفين زي ما حصل قبل كده وكان رسول الله ﷺ نهى عنها، فلازم هنا الحكمة الشديدة والحرص البالغ في معالجة الموقف والموضوع لسه في الأول👌 عمر كان قاعد بيسمع كلام الخطيب، فكان بيجهز في نفسه كلام عشان يرد بيه على خطيب الأنصار، فلما سكت الخطيب؛ لسه عمر هيقوم عشان يتكلم راح أبو بكر موقفه وقال له: عَلَى رِسْلِكَ🤚 يعني استنى استنى متقومش، أنا إللي هتكلم👌 لأن أبو بكر رضي الله عنه عارف عمر وشدته، فخاف أحسن يقول كلام شديد يعقّد الموقف😅 فعمر رضي الله عنه بيقول: "فَكَرِهْتُ أَنْ أُغْضِبَهُ، فَتَكَلَّمَ أَبُو بَكْرٍ فَكَانَ هُوَ أَحْلَمَ مِنِّي وَأَوْقَرَ، واللهِ مَا تَرَكَ مِنْ كَلِمَةٍ أَعْجَبَتْنِي فِي تَزْوِيرِي، إِلَّا قَالَ فِي بَدِيهَتِهِ مِثْلَهَا أَوْ أَفْضَلَ مِنْهَا حَتَّى سَكَتَ"《صحيح البخاري》 يعني عمر بيقول إنه محبش يزعل أبا بكر فسمع كلامه وقعد وخلّاه هو إللي يتكلم، وكل الكلام إللي كان في نَفْس عمر وكان عايز يقوله؛ أبو بكر رضي الله عنه قاله كله وأحسن منه كمان، وقال الكلام بهدوء ووقار ومن غير أي شدة، وكان رضي الله عنه إذا تكلم الصحابة رضي الله عنهم بينصتوا له👌 ☆أبو بكر رضي الله عنه قال إيه بقى 🤔 نقدر نقول إن أبا بكر رضي الله عنه قسّم كلامه إلى ثلاثة أقسام أو ثلاث مراحل في غاية الحكمة: ◇أولا: ذَكَر فضل الأنصار. قال عمر: "فَلَمْ يَتْرُكْ شَيْئًا أُنْزِلَ فِي الْأَنْصَارِ وَلَا ذَكَرَهُ رَسُولُ الله مِنْ شَأْنِهِمْ إِلَّا ذَكَرَهُ"《السلسلة الصحيحية》 يعني ذكر كل المديح الذي جاء في الأنصار سواء في القرآن أو في السنة، زي مثلا قول رسول الله ﷺ: "الأنْصارُ لا يُحِبُّهُمْ إلَّا مُؤْمِنٌ، ولا يُبْغِضُهُمْ إلَّا مُنافِقٌ، فمَن أحَبَّهُمْ أحَبَّهُ اللَّهُ، ومَن أبْغَضَهُمْ أبْغَضَهُ اللَّهُ"《صحيح البخاري》 وقوله: "لولا الهجرة لكنتُ امرأً من الأنصار" وذكّرهم بقول رسول الله ﷺ: "لو سلك الناس وادياً وسلك الأنصار وادياً لسلكتُ وادي الأنصار" 《صحيح البخاري》 وغيرها وغيرها من فضائلهم رضي الله عنهم، فبعد ما ذَكَر فضائلهم كلها قال: "وما ذكرتُ فيكم من خيرٍ فأنتم أهله، وإنا والله يا معشر الأنصار ما ننكر فضلكم ولا بلاءكم في الإسلام ولا حقكم الواجب علينا" يعني كل الحاجات إللي أنا قلتها انتم فعلا تستحقوها ودي حقيقة مش محتاجة مجاملة، واحنا لا ننكر فضلكم ولا تضحياتكم إللي انتم قدمتوها لخدمة الإسلام ولا نُنكر حقكم الواجب علينا👌