الضعيف لما بيلاقي نفسه مُحبط أو مصدوم بسبب ظروف ما، بيلجأ لأغنية يسمعها، أو يشرب حاجة تلهيه سواء مخدرات أو دخان بأنواعه، أو يشوف حاجة محرمة علشان ينسى اللي هو فيه! والقوي هو اللي ربنا موفقه فبيلجأ إلى عمل من أعمال الخير زي الصدقة أو الصلاة أو الاستغفار، ودا اللي بيطمن قلبه وبيزرع جواه المزيد من الثقه والهدوء. بعد شوية هنلاقي الضعيف بيزداد ضعف، ويبدأ يدافع عن اللي بيعمله لغاية ما يتمكّن الضعف منه، ويسيطر عليه، وهيلاقي للأسف شياطين الإنس بتسوّله أفعاله، وبالتالي هيقعد طول عمره بينتقل من ضعف إلى ضعف، وعمره ما هيحس بلذة التوفيق واللي بتخلي الإنسان يبعد عن هواه ويدوّر على رضا مولاه. أهل الباطل والهوى بيتصرفوا دايماً بلغة الضعف، لكن بيصوروه للناس على أساس إنه عادي، وبلاش تشدد، وخليك فري، وبلاش تضيقوا على الناس عيشتها، وغير ذلك من مصطلحات تهوين المحرمات، وكل يوم القلب بيتلوّث لغاية لما بيوصل لمرحلة إنه مش بيفرق بين المعروف والمنكر، وشوية كمان وتلاقيه بينكر المعروف وبيأمر بالمنكر!! ودا اللي اسمه الانتكاس، فالله يكرمك متمشيش ورا اللي بيوصلك ليه، لإنه مش هينفعك في الدنيا، وهيتخلى عنك في الآخرة. ✍️ محمد سعد .