#داري "29" "لم أعي النظرية النسبية بأي شكل من الأشكال، بإستثناء اللقاء الأول، الذي جعلني أشعر بعد مرور أربع ساعات على أنها خمسُ دقائقٍ فقط..)) ___ "بـ لسان أسرار" الأيام رتيبة بدون يوسف .. فجأة دخل حياتي عمل فيها ضجة وطلع بكل هدؤ .. ما أكذب إنه فارق معاي شديد بس إحترمت قرارو .. في النهاية كل واحد وليهو طريقة يتقرب بيها من ربنا .. طلعت على الجامعة لقيتو قدامي في المحطة مركز في تلفونه لما قربت سلمت : =السلام عليكم. _"رفع راسه عاين ليها نظرة سريعة وحول نظره" .. وعليكم السلام أسرار كيفك؟ =بخير الحمدلله .. وإنتَ؟ _في نعمة الحمدلله. سكتنا على كده حسيت مافي شي يتقال .. أنا شايفة هو قدر شنو بجاهد نفسه فما حبيت أضغط عليه .. وقفت الحافلة الجات وركبنا كان في مقعد واحد قعدت وهو وقف شماعة .. مد لي دفترو وتلفونه مسكتهم ليه .. بالصدفة تلفونه نور وتطبيق الأذكار إشتغل في الشاشة .. اللفت نظري إنو في البايو كاتب "أبو آية" .. إبتسمت لا شعوريًا لأني في وحدة من ونساتنا قلت ليو لو ربنا رزقني بت بإذن الله حسميها آية .. فحسيتا إشارة إنو يوسف لسة محتفظ بمكانتي في قلبه. لما جا وقت الدفع هو حاسب وأشر لي إنو ما أدفع .. وصلنا وقف الحافلة وشال مني تلفونه ودفترو وهو بقول: _شكرًا يا سرو. =العفو ولو. _بالمناسبة دي مبروك لـ ننا .. قولي ليها يوسف قال ليك الله يهني سعيد بـ سعيدة. ="ضحكت" .. حاضر حوصلو ليها. _وراي إمتحان مهم دعواتك بالله. =ربنا يسهلا عليك يا يوسف. ودعتو على كده وفضلت أعاين ليه لحدي ما إختفى من عيوني .. ياخي بقع في حبه كل ما أشوفه .. الله يصبر قلبي على قرارو ده. _____ "بـ لسان نود" صحيت على مكالمات كريم .. أنا أكتر شي بكرهو في الحياة دي زول يصحيني .. إلا إذا الزول ده كريم هنا الموضوع بختلف .. رديت ولسة نعسانة: =خلاااااص صحيت يا كريم. _طيب قولي صباح الخير. =خليني أنوم شوية وبصحى أقول ليك. _لأ قومي ورانا شغل مهم. =اوووف .. طيب قُمت أقفل. _طيب قومي جد عشان أقفل. =أحييييا من حياتي الما بشبع فيها من النوم دي. _ذكريني بعدين أخليك تشبعي منو. =بعدين سنة كم أنا عايزة هسي ده بس. _إنتِ كسلانة كده مالك .. هسي بعدين ما حتصحي تعملي لي شاي ولا كيف؟ =لو العرس بصحوا فيهو بدري من هسي ما عايزاه. _ما عايز أصدمك بس بعد تعرسي حتشوفي بعينك. =أقفل خليني أجهز طيب. قفلت منو وجهزت لبست عباية وطرحة وما شربت الشاي لأني إتأخرت .. أنا كان مالي أحكي لي كريم بي سر بيت المساكين ده .. هسي كان شبعت نوم لولا الأخ إتحمس ومصحيني من ستة عشان نباري مواضيع قديمة .. حاسة نفسي مرهقة وفترااانة جرجرت خطواتي ومشيت لقيته واقف مستني .. اول ما وصلته قال: _مالك مستاءة كده؟ =نعسانة أسكت مني. _ده كله نعاس ولا في حاجة تانية؟ =إنتوا ليه بتستهونوا بالنوم .. لما أقول ليكم نعسانة معناها أنا جادة في الموضوع والله. _خلاص نلغي البرنامج أرجعي نومي. =ما جادي طبعًا بعد صحيتني جاي تقول كده؟ _فاكرك بتستهبلي والله .. لكن بالجد أرجعي نومي يا نود. =حأشرب قهوة وبصحصح أرح. _أنا أسف والله ما إتوقعتك.... ="قاطعته" .. كريم خلاص الموضوع ما بستاهل .. حأشرب قهوة وبصحصح .. آها أحكي لي عرفت شنو جديد؟ _خلاص بعد نصل المكتب وتشربي نتفاهم. ركبنا وأنا فضلت ساكتة وكريم خلاني في حالي .. كنت مساهرة مع مفاز لأنو أمس تعبت بعد أكلت ملاح الروب وطلع فيهو "جلوتين" تقريبًا خالتو هدى كابة فيهو دقيق .. وهي بدون ما تنتبه أكلتو وتعبت شديد .. فضلنا واقفين في راسا طول الليل وأخر شي قلت لماما ووريف يمشوا يرتاحوا أنا بقعد جنبها .. عشان كده ما نمت كويس. لما وصلنا كريم قال لي أطلعي قدامي بلحقك .. وأنا ما صدقت لقيت المكتب رقدت في الدرج وغفيت .. بعد مسافة ما عارفاها كم صحيت على صوته وهو بقول لي: _نود حبيبي قومي جبت ليك قهوة. =إنت يا كريم أمك ولدتك عشان تصحيني يعني؟ _"ضحك" .. حقارة حتى وإنتِ حتموتي من النعاس؟ =ما ممكن معاك أنا أمس ما نايمة الليل كله ياخ. _كدي اول شي إشربي القهوة دي ووريني مانمتي مالك؟ =واااي جبت لي قهوة يعني؟ _من قبيل أنا بغني؟ =شكرًا يا كيمو. _دي حاجة بسيطة يا حبي. ="إبتسمت وأخدت الكباية بدت تشرب". لاحظت إنه مركز معاي وما شال عيونو مني، سألتو: =في شنو؟ _عندك شامتين في وشك أول مرة أنتبه ليهم. =فيك الخير وتاني؟ _ما إنتِ لو خليتني كنت عرفت بس أنا عايش مع هادمة ملذات أسوي شنو؟ =مصحيني عشان تقول كده؟ _صراحة لأ .. في حاجة. =غني طيب. _هي حاجة غريبة. =ياربي .. طيب قول ما تحرِّق روحي. _متذكرة يوم مشيتي العرس معاهو داك؟ =على فكرة اسمو أحمد .. وهسي فاتح السيرة دي مالك؟ _المهم لما كنت زهجان وكارهكم مشيت قعدت في شجرة الخالة زينب. =إنت بتكرهني يا كريم؟ وصلت معاك للدرجة دي؟ _لن تستطيع أن تكره شخص كنت تحبه .. للأسف ما كنت كارهك إنتِ.