قصيده للاربعين *على طور /بجت يم نحر ابنها ومايحاجيها/* ** اجيت من اليسر كومو وتلكوني مشتاكه يخوتي حيل تدروني ** فك باب الكبر يبن امي يحسين وكلي وين جنتي يلاخت وين وأحجيك اسوت هل الملاعين حيل هظموني حيل هظموني اني امدللتكم حيل هظموني ** صعبه اعليه خويه طبت الديوان وفرجه للخلك لن صارت النسوان ماجان الامل منكم ابد ماجان انكطعت اظنوني انكطعت اظنوني من عدكم يخوتي انكطعت اظنوني ** رحت احجي اهمومي للبطل عباس واكله ظلت اختك فرجه للناس ترظاها صدك ياصاحب النوماس اكعدو وتلكوني اكعدو وتلكوني طرو اكبوركم كعدو وتلكوني ** مشتاكه اجيتك والكلب لهفان انهظلي يكافل ياكمر عدنان مليان الكلب بهموم واحزان اعداك شتموني اعداك شتموني تقبلها يخويه اعداك شتموني ** منهم ايست والروح خلصانه صحت ابصوت كومو يخوتي ويانه ماتدرون بيه اهوايه تعبانه نهظو ودوني نهظو ودوني اروحن للمدينه نهظو ودوني ** لشاعرة اهل البيت ام عمار الصائغ