ليش قاعدة بحكي ؟ لأني حاسة رح أنفجر، حاسة قلبي بدو ينفجر، جماعة حياتنا كأننا في مرطبان مكدوس هيك مكدسين فوق بعض الشمال تقريباً تم تطهيره عرقياً بالكامل، والناس الباقيين كلهم قتل، مثلا بيت ٧٠ شخص متجمعين فيه، بيفجروهم بضربة وحدة، الناس محدش بحكي عنهم لأنه لا صحافة ولا اسعاف ولا حتى الناس قادرة تحكي عن حالها .. مدينة غزة تقريباً تم تطهيرها ٧٠ بالمية رفح دمروها وطهروها وجرفوها ولغوا رفح القديمة ١٠٠٪ خان يونس منطقة كلها مدمرة، ٩٠ بالمية مدمرة والناس ال فيها هم على المواصي ال أصلا برضو شغالين ضرب فيهم .. فكدّسونا كلنا في محافظة الوسطى ... غير فكرة الحصار، انه انت محاصر من كل الجهات، جواً محاصر، من شمالك محاصر، من جنوبك محاصر، من البحر محاصر والك حدودك والا الزوارق بتقسمك نصين، يخي حتى أنك تطفش من البلد كمان محاصر، تستسلم وترضى بالواقع، حاصروك بالمجاعة، محاصر بالبشر والخيام من كل الجهات، محاصر بالفيران، محاصرينك بالزنانة ال بترحمش راسك ولا لحظة ... يعني اشي في منتهى ال " طريقك مسدودٌ، مسدودٌ، مسدودٌ يا ولدي "