​​SAFAR Yangilandi devorda taqvim, Yana yoʻlga chorladi Yanvar. Yangi chipta qildi u taqdim – Uch yuz oltmish besh kunlik safar. Oshiqadi yuraklar behad Orzulari porlagan tomon – Toʻrt iqlim va oʻn ikki bekat, Kunda yigirma toʻrtta dovon. Kim qalbini usturlob qilib, Yulduzlarga qarab yoʻl topar. Kim sarobni haqiqat bilib, Oyparastdek sarsari chopar. Kim yombiga yoʻliqar bexos, Kim hamyonin yoʻqotar nogoh: Kimga Zuhro chiqadi peshvoz, Kimga Yetti Qaroqchi hamroh. Bari sinov, imtihon bari – Quvonch, qaygʻu, dildosh-u raqib. Kim oʻziga yursa teskari, Oʻz iymoni aylagay taʼqib. Qilkoʻprik bu… Oʻtgaydir albat Shoh-u gado, oqil, avom-da. Kimdir qolib ketgusi abad Qaysi bekat, qaysi dovonda… Qismat toʻsiqlarin yengib va Yetib kelsang manzilga omon – Kutib turar seni zoʻr tuhfa, Sabotingga toʻlangay tovon: Yangilanar devorda taqvim, Yana yoʻlga chorlagay Yanvar. Yangi chipta qilgay u taqdim – Uch yuz oltmish besh kunlik safar… --------------------- САФАР Янгиланди деворда тақвим, Яна йўлга чорлади Январь. Янги чипта қилди у тақдим – Уч юз олтмиш беш кунлик сафар. Ошиқади юраклар беҳад Орзулари порлаган томон – Тўрт иқлим ва ўн икки бекат, Кунда йигирма тўртта довон. Ким қалбини устурлоб қилиб, Юлдузларга қараб йўл топар. Ким саробни ҳақиқат билиб, Ойпарастдек сарсари чопар. Ким ёмбига йўлиқар бехос, Ким ҳамёнин йўқотар ногоҳ: Кимга Зуҳро чиқади пешвоз, Кимга Етти Қароқчи ҳамроҳ. Бари синов, имтиҳон бари – Қувонч, қайғу, дилдошу рақиб. Ким ўзига юрса тескари, Ўз иймони айлагай таъқиб. Қилкўприк бу… Ўтгайдир албат Шоҳу гадо, оқил, авом-да. Кимдир қолиб кетгуси абад Қайси бекат, қайси довонда… Қисмат тўсиқларин енгиб ва Етиб келсанг манзилга омон – Кутиб турар сени зўр туҳфа, Саботингга тўлангай товон: Янгиланар деворда тақвим, Яна йўлга чорлагай Январь. Янги чипта қилгай у тақдим – Уч юз олтмиш беш кунлик сафар… 3.01.2025 @n_jonuzoq