يمته شراع جيته تهب بيه الريح
وصوت آذان فجرك يكسر السكته
ومن گد ما لسان الشوگ يمته یگول
صرنه بظيم بعدك نكره اليمته
ما اريد اعترض بس اليحب معذور
إذا عاتب حبيبه والحچي يگته
رجعت كلها رجعت وانت ما رديت
ويا حچي التريد احچيه وما گلته
واني ادري الشمس من تطلع بميعاد
وقطار الليل يوصل للسمه بوگته
بس طگ الگلب والعمر ما يراد
إذا حسره ودمع وهموم خلصته
شحچیلك عليمن ع الشباب الضاع
وعلى الحيطان ظلت سوده لافته
على حسرة أبو گضاها ظيم بظيم
گبل ليموت تلگه الحسره گاتلته
على دموع امهات طاحت من اسنين
ونهر من الدمع ع الوجنه حافرته
شسولف عن طفل يمشي اعله درب حسين
فطره وحب لبو السجاد دافعته
يمشي وبيده شايل رأيه العباس
وابو فاضل تخرج أبطال مدرسته
طفل بس كفل اخته وگلها لتخافين
حضن رأس اخته بيده وهي حاضنته
ومن صار انفجار احتاروا شيلگون
إذا شدة ورد وتطشرت جثته
شافوا ع الرصيف چفوفه مكطوعات
وأثر دمعه الشارع طاحت بسكته
لگو چف بي بقايا الرايه العباس
وچف الثاني بي لازم حجاب اخته
وما كلك تعال واني كلي ذنوب
ومازيدك مرار ويكفي ماشفته
بس طگ القلب والعمر ماينراد
إذا حسره ودمع وهموم خلصته
#يا_مهدي*اللَّهُمَّ عَجِّلْ لِوَلِيِّكَ الفَرَج*
*واثق العيساوي*