Фавворалар тинган, ўриндиқлар бўш, Мажнунтоллар кетган қайгадир дайдиб. Ортимдан эргашар синиқ ёмғирпўш, Барглар шитирлайди исмингни айтиб. Оғир тортиб қолган автолар гўё, Бекатлар мунглидек кўринар кўзга. Сени кутавериб сарғайдимми ё, Ва ё айландимми сен севган кузга?! Сен эса қайдадир – бошқа бекатда Турибсан заъфарон ўйлардан холи. Гўёки ям-яшил барглар қатида Ярақлаётган бир япроқ мисоли. Фавворалар тинган, ўриндиқлар бўш, Изғирин тортқилаб тўкар оҳорим. Ортимдан эргашар синиқ ёмғирпўш, Қайси бекатдасан менинг баҳорим?! @mujdauz