يعني شنو تميت 25 سنة؟! رياضياً ما زالت في24 من عمري لأني مولود في أواخر اكتوبر و عندي شهرين بس في 96 ، و دا ما بنفي حقيقة إني كبرت في العمر و دخلت منطقة الخطر . أنا ما من النوع البحتفل بعيد الميلاد و الحنك دا ، صراحة لأنو ما بعتقد إنو دا إنجاز خطير و بستحق. الحاجة المهمة و المفروض نحتفل بيها (أنا وانت و أي زول تاني ) هي إنجازاتنا في السنة الحالية . سواء إنك دخلت الثانوي ، إمتحنت الشهادة السودانية ، إتخرجت من الجامعة ، إتزوجت شريكة حياتك الكنتوا بتحبوا بعض من زمان أو أي حاجة إنت معتبرها إنجاز حقيقي. أحتفل لأنك حققت إنجازات كنت مخطط ليها من زمان و لانك إنت حالياً أفضل من السنة الفاتت. _ كونك دخلت سنة جديدة في حياتك دا ما بتطلب منك الإحتفال مفروض تحمد ربنا لأنك ما مُت في السنة الفاتت و مفروض تغير تعاملك مع الأخرين ، ناس بيتكم و والديك . لأنك كل ما كبرت سنة في عمرك عمرهم بنقص سنة و في يوم من الأيام ممكن تفقدهم فجأة و ما تلحق تعبر ليهم عن مشاعرك و إمتنانك ليهم علي كل صغيرة و كبيرة و التضحيات القدموها عشانك و عشان تحقق كل أحلامك و إنجازاتك الكنت بتقولا ليهم و إنت صغير. نحنا كمسلمين عندنا عيدين بس (عيد الفطر و عيد الأضحي المبارك) وما صح زاتو نحتفل بأي مناسبة تانية مهما كانت. الثلاثاء الجاية 26/10 اليوم البقعد فيهو مع نفسي وأعمل ليها تقيم .. • سنتي الحالية دي أنا عملت فيها شنو وهل حققت الإنجازات الأنا كنت مخطط ليها بداية السنة ولا فشلت وما حققت شيء؟ • أنا عايز أصل وين في السنة الجاية ومفروض أكون في أي نقطة وحققت شنو؟ • الحاجات الأنا غلطات فيها في السنة دي مفروض ما اكررها لقدام. • أغير طريقة تفكيري و رؤيتي عشان أقدر احقق إنجازاتي وما اتعطل زي السنة القبلها ( أتكيف مع المحيط الحولي عشان أقدر أنجز). _ "كلنا بنغلط. لكن الناجحين هم الإتعلموا من اخطأهم". في نوع من الناس بشاركوا اخطأهم للعامة و ما عشان يتفاخرو بيها ، لكن، عشان يوعوا الأخرين و مايقعوا في نفس اخطأهم و يتعلمو من تجاربهم. • فقدي للاخ في الأسرة خلاني أتعامل مع الناس بلطف زيادة عن اللزوم و إني بقيت أثق سريع في كل زول أتعامل معاها وخش بيتنا، بتعامل مع كل شخص كأنوا أخوي الصغير . خلال السنة دي لاحظت إنو تعاملي دا خلق لي مشكلة كبيرة في حياتي ، فقدت هويتي ونفسي وما حاولت أسعد نفسي ، بقيت بسعي بكل جهدي عشان أسعد ناس هم أصلاً مامقدرين وجودي في حياتهم أو لية انا بعاملهم بالطريقة الظابطة دي. وثقت إنو من خلال تعاملي اللطيف معاهم أنهم حيفضلوا معاي للأبد و حيعوضوا فقدي والفراغ الانا حاسس بيهو . ⭕️ | السنة دي علمتني إنو دا مستحيل طبعاً ... #يومياتي #التقييم_السنوي #خمس_وعشرون_سنة_في_المعاناة