#رجوع_الضعنرد ضعن الغريبات - رد بس گله حسرات
وردت زينب اتصيح - حداي الضعن مات
ردن للمديــــنه وبالضعـــن حـســـره
امشيب جم گلب من ضيم هالسفره
وازغر طفــل صاير شايـــب اشكبره
والسجــــاد محني ومنـــكسر ظهره
رد ضعــن المداليـل - بس مابــيه رايـه
كبرانه وعلي اهواي - زينب موش هايه
ردت زينـــــب بـ آه - شتذكـر اهــــوايه
بس هـيـه البدايات - مو مثـل النـهــايه
آه آه ياضعن الحــسـين
ـــــــــــــــــــــــــــ
كبــرانـه يعيـنــــاي - أتغير شكلج أهـــواي
شمسوي الدهر بيج - امتعبج زينـب المـاي ؟
العطش ما تعبــاني التعب بالفـــــــرگـه
وموش اخيامي تسعر روحي محترگـه
من طـاح الگـمر يمـه اشهگـت شهـــگـه
منـها وبـگـت روحـــي لهسه مخـتنـگـه
آه يفـــراك عبـــــــاس - هـوه الكبــراني
امشيب گلبي والراس - يافگده عمـــاني
لأجل اطفال الحسين - ما ميته تره اني
عفت اخواني ميتين - والچـاتل سبـاني
آه آه ياضعن الحــسيـن
ـــــــــــــــــــــــــــ
مگابـل صـار الونــين - زينــــب وأم البنيــن
وحده اتصيح عبـاس - وحده تصيح يحسين
صارت فاتـحــه وكـثــرت نواعيـــها
بديـــار الخليــه المـاهـــو راعيـــــها
التنعئ ام البـنيـن التمــن اعليــــــها
امضيعه اربع ولد وحـسيـن ياذيــها
احجـــن يالنســــاوين - عـن الـغـاظـريـه
عبد الله الطفــل ويـن - شو ماناغــه ليـه
الجــان يعوف الگماط - وينـام اعله اديه
دورت الظــعــن زيــن - هم مابيه رقيـــه
آه آه ياضـعـن الحـسـيـن
ـــــــــــــــــــــــــــ
اليعشگ يوصل الموت - يون سكته بلا صوت
أرقيــه تحب الحسين - وماتت فوگه بسكوت
مشتاگـــه لبـوي ارقيـــه من صاحت
جابوه الها راس اوشبگــته اوطاحت
بيه ريحــة محنه من الطشت فاحت
ماتـت بالخـــــرابـه ابكـــثر ما ناحت
شبگت فوگه بالشــوگ - محتـامه الوليـها
شهگت شَهگـة المـوت - ومالحـــگنه بيها
جــان يحبها الحسين - ومايـبعـد عليـها
اخذهـا اتمــوت ويـاه - ما يحمل بچيــها
آه آه ياضـعـن الحـسـين
ـــــــــــــــــــــــــــ
شفنه اهموم الايــــام - من طبيــنه للشـــــام
طبـونه ابــدواويــــن - وخرايـب ماهن أولام
باگــــو نوگـــــنه وبهـــــزله ردونــــه
طبونـه ابــخــرابـه وبيـــها خلـــونه
شرد احجي بعد بالشــــــام أذونــــه
بالسب والظـرب هالنــاس جـازونــه
اه يمعاين النــــــاس - شيب گلب زينـب
ومن صاحو سبـيات - رمش العين شيب
من فوگ الحياطين - الماي اعلينه ينذب
أه يا علة الشــــــام - نـــار وبيـــه تلهب
آه آه ياضـعـن الحــسـين
ـــــــــــــــــــــــــــ
محمد المشعلاوي
