"الأيَّام دونَ لقاءَات الأصدِقاء مُؤذِية!)) ما لاقتني جُملة أصدق من كدا عشان تشرح حاجتنا لأصحابنا .. لقاء الأصدقاء ببعضهم عمرو ما كان خُطة بديلة ولا ملي فراغ بقدر ما هو تعافي من ضغوطات الحياة والمشاكل الفيها. بحكي لصحباتي موضوع مُضايقني قبل ما يفكروا ينصحوني أو يقدموا أي حُلول بقولو لي لازم نتلاقى .. كلمتين بس بتطمني وبتديني إحساس إنو مشكلتي دي تافهة وحلها بس أشوفهم. محطاتنا البتلاقى فيها ..! خطواتنا البنمشيها سوا ..! خالتو ست الشاي البنجوط ليها مكانا بصوتنا العالي ونحن بنضحك على أحزان بعض .. أيوة والله أصحابك الحقيقين حيضحكوا اول ما تحكي ليهم المزعلك ويخلوك إنت ذاتك تضحك في نفسك وتنسى الزعل ..! في كُل شبر في الأرض دي في مسطبة .. شجرة .. راكوبة .. مكان شاي لبن .. محل بوش .. شاهد على ضحكاتنا ونقاشاتنا السطحية ..! شجرتنا المُفضلة وما بنشرب قهوة إلا تحتها ..! مسطبتنا البنفضل نقعد فيها عشان نعاين للناس في الشارع ونحن ساكتين متكئين على أكتاف بعض ..! راكوبتنا المرشوشة وباردة وفيها بنابر أو كراسي نحن حاجزينها وكُل زول فينا عايز يقعد في مكانو المناسب ..! كبابي الشاي لبن وصحانة الزلابية وشَكَلنا في الُسكر ونحن بنزودو ولازم واحد يكون شليق عايز يمد يدو اول بينما التاني بِجهز تلفونو عشان يصور ..! محل البوش المعروف منو بظبطو وبيعرف يقدم لينا وجبة برغم بساطتا بتصنع جواك إحساس إنك مليان أكل وسعادة .. الشير وترتيبنا للكراسي ونحن ماشين ..! دقيقة نتصور عشان نحفظ اليوم دا للذكرى ..! إستنوا نودع خالتو ونرجع ليها الصحن ..! تعليقاتنا ونحن ماشين .. أسي يعني غلبكم تتموا الحبة دا؟ مخلي باقي النعناع دا في الكباية لشنو ما تاكلو ولا خلاص بطنك إتملت .. ضحكتنا بصوت واحد وكأننا متفقين عليها. تفاصيل ما مُحتاجة أي جُهد مبذول.. ما عايزة ليها أي تخطيط .. ما حنوطي صوتنا ونتقيد بالبرستيج عشان دا كافي مقفول وما صاح نزعج الناس .. ما حنشيل هم الشير لأنو حتاكل وتشرب وفي النهاية بطلع حاجة تافهة قُصاد الإحساس الحترجع بيهو .. ما مُحتاجين نلم قروشنا شهر كامل عشان نطلع مرة واحدة ناكل بيتزا ما حنقدر نشبع منها لأنها ما بتكفي أصلًا عكس صحن البَمبي البكون مليان ناكل لما يفضل وخالتو مُستعدة تزود لينا الشطة ..! على الهامش: "ربنا يبارك في الأصحاب صاحب صاحب💛" #نُوودين_بتْ_مِنْ_حُبّ